އޭސީ މިލާން ބަލިކޮށް، އެޓަލަންޓާ އިން މަގާމު ދަމަހައްޓައިފި

އިޓާލިއަން ލީގުގައި އޭސީ މިލާނާ ދެކޮޅަށް ކުޅުނު މެޗުން މޮޅުވެ، އެޓަލަންޓާ އިން އެއް ވަނަ މަގާމު ދަމަހައްޓައިފި އެވެ.

އެޓަލަންޓާގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި އެޓަލަންޓާ އިން ލީޑު ނަގާފައި ވަނިކޮށް، އޭސީ މިލާން އިން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ހާފުގައި ދެ ވަނަ ލަނޑެއް ޖަހައިގެން އެޓަލަންޓާ ވަނީ މެޗުން މޮޅުވެފަ އެވެ.

މެޗު ފަށައިގެން 12 ވަނަ މިނެޓުގައި އެޓަލަންޓާ އަށް ލީޑު ނަގައިދިނީ ޗާލްސް ޑީ ކެޓެލައެރޭ އެވެ. އޭގެ ފަހުން މެޗުގެ 22 ވަނަ މިނެޓުގައި އަލްވާރޯ މޮރާޓާ ވަނީ ލަނޑު ޖަހައި އޭސީ މިލާނަށް ނަތީޖާ ހަމަހަމަ ކޮށްދީފަ އެވެ. އެ ލަނޑުގެ ފަހުން ދެ ވަނަ ލަނޑެއް ޖަހާނެ ފުރުސަތު ވެސް އޭސީ މިލާނަށް ލިބުނެވެ. ނަމަވެސް މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، އަޑެމޮލާ ލުކްމަން ވަނީ ދެ ވަނަ ލަނޑެއް ޖަހައި މެޗުން އެޓަލަންޓާ މޮޅު ކޮށްދީފަ އެވެ.

މޮޅާއެކު އެޓަލަންޓާ އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ 15 މެޗުން 34 ޕޮއިންޓު ހޯދައިގެންނެވެ. 11 މެޗުން އެޓަލަންޓާ މޮޅުވެފައިވާއިރު، އެއް މެޗުން ވަނީ އެއްވަރުވެފަ އެވެ. އަނެއް ތިން މެޗުން އެ ޓީމު ވަނީ ބަލިވެފަ އެވެ. އެޓަލަންޓާ އަތުން ބަލިވި އޭސީ މިލާން އޮތީ 14 މެޗުން 22 ޕޮއިންޓާ އެކު ހަތް ވަނައިގަ އެވެ.