ސަސުއޯލޯ ބަލިކޮށް، އޭސީ މިލާާން ކުއާޓާ ފައިނަލަށް

އިޓާލިއަން ކަޕްގެ ގަދަ 16 ވަނަ ބުރުގައި ސަސުއޯލޯއާ ދެކޮޅަށް ކުޅުނު މެޗުން މޮޅުވެ، އޭސީ މިލާން އިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.

އަންގާރަ ދުވަހުގެ ރޭ ސަސުއޯލޯއާ ދެކޮޅަށް ކުުޅުނު މެޗު މިލާނުން ކާމިޔާބު ކުރީ 6-1 އިންނެވެ. މެޗުގެ ފުރަތަމަ ހާފުގައި މިލާނުން ވަނީ ހަތަރު ލަނޑު ޖަހައިފަ އެވެ. އަނެއް ދެ ލަނޑު ދެ ވަނަ ހާފުގައި ޖެހިއިރު، މި ހާފުގައި ސަސުއޯލޯ އިން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން 12 ވަނަ މިނެޓުގައި މިލާާނަށް ލީޑު ނަގައިދިނީ ސަމުއެލް ޗުކްވޭޒީ އެވެ. އޭގެ ފަސް މިނެޓު ފަހުން މިލާންގެ ދެ ވަނަ ލަނޑު ޖެހީ ޓިޖާނީ ރެއިންޖާސް އެވެ. ދެ ވަނަ ލަނޑު ޖެހިތާ ހަތަރު މިނެޓު ފަހުން ޗުކްވޭޒީ ވަނީ މިލާންގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އަދި މި ހާފުގައި އެ ޓީމުގެ ހަތަރު ވަނަ ލަނޑު ޖެހީ ރަފައެލް ލިއާއޯ އެވެ.

ދެ ވަނަ ހާފު ފަށައިގެން އެގާރަ ވަނަ މިނެޓުގައި ޑޭވިޑް ސަލަބްރިއާ ވަނީ މިލާންގެ ފަސް ވަނަ ލަނޑު ޖަހައިފަ އެވެ. އޭގެ ތިން މިނެޓު ފަހުން، މެޗުގައި ސަސުއޯލޯގެ ހަމައެކަނި ލަނޑު ޖެހީ ސަމުއެލް މުލަޓިއޭރީ އެވެ. އަދި މެޗުގައި މިލާންގެ ހަ ވަނަ ލަނޑު ޖެހީ ޓަމީ އަބްރަހަމް އެވެ.

މިލާންގެ އިތުރުން ދެން ކުއާޓާ ފައިނަލްގެ ފުރުސަތު ހޯދި ޓީމަކީ ބޮލޮގްނާ އެވެ.