ސަލްސްބާގްގެ ކޯޗު ލިންޖާސް މަގާމުން ވަކިކޮށްފި

އޮސްޓްރިއާގެ އާރްބީ ސަލްސްބާގަށް އިރުޝާދު ދެމުން އައި ނެދަލެންޑްސްގެ ޕެޕިން ލިންޖާސް، އެ ކުލަބުގެ ކޯޗުކަމުން ވަކިކޮށްފި އެވެ.

އުމުރުން 41 އަހަރުގެ ލިންޖާސް ސަލްސްބާގްގެ ކޯޗުކަމާ ހަވާލުވީ މިއަހަރުގެ މެއި މަހުގެ ތެރޭގަ އެވެ. އެ ކުލަބާ އެކު އޭނާ ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާން އޮތީ 2027 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް ކުލަބާ ހަވާލުވިތާ ހަސް މަސް ދުވަސް ފަހުން، ސަލްސްބާގުން ލިންޖާސް ވަކި ކޮށްފައި ވަނީ އޭނާގެ އިރުޝާދުގެ ދަށުން އެ ކުލަބުގެ ނަތީޖާތައް ދަށްވުމުގެ ސަބަބުންނެވެ.

ލިންޖާސްގެ އިރުޝާދުގެ ދަށުން ސަލްސްބާގުން ވަނީ މިހާތަނަށް 29 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ 13 މެޗުންނެވެ. ހަތް މެޗު އެއްވަރުވެފައިވާއިރު، ނުވަ މެޗުން ވަނީ ބަލިވެފަ އެވެ. މި ސީޒަންގެ ލީގުގައި ސަލްސްބާގުން ވަނީ މިހާތަނަށް 16 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ ހަތް މެޗުންނެވެ. ފަސް މެޗު އެއްވަރުވެފައިވާއިރު، ހަތަރު މެޗުން ވަނީ ބަލިވެފަ އެވެ. ލީގު ތާވަލްގައި ވެސް އެ ޓީމު އޮތީ ފަސް ވަނައިގަ އެވެ. އެއް ވަނައިގައި އޮތް އެސްކޭ ސްޓާމް ގްރޭޒް އާއި ސަލްސްބާގާ ދެމެދު 10 ޕޮއިންޓުގެ ފަރަގެއް އެބަ އޮތެވެ.

ލިންޖާސް އޭނާގެ ކޯޗިން ކެރިއަރު ފެށީ 2015 ވަނަ އަހަރު ލިވަޕޫލްގެ އެސިސްޓެންޓު ކޯޗުކަމުންނެވެ. އެ ކުލަބުގައި ތިން އަހަރު މަސައްކަތް ކުރުމަށްފަހު، 2018 ވަނަ އަހަރު ދެން އޭނާ ބަދަލުވީ ނެދަލެންޑްސްގެ ކުލަބަކަށެވެ. ހަމަ އެ އަހަރު އެ ކުލަބު ދޫކޮށް ލިންޖާސްް ވަނީ އަލުން ލިވަޕޫލަށް ބަދަލުވެފަ އެވެ. އޭގެ ފަހުން މިއަހަރުގެ މެއި މަހާ ހަމައަށް، ލިވަޕޫލްގައި ޔާގަލް ކްލޮޕްގެ އެސިސްޓެންޓު ކޯޗުގެ ގޮތުގައި ލިންޖާސް ވަނީ މަސައްކަތް ކޮށްފަ އެވެ. އޭނާ ލިވަޕޫލަށް ދޫކޮށްލީ، ކްލޮޕް ލިވަޕޫލް ދޫކޮށްލަން ނިންމުމާ އެކު އެވެ.