ގްރޫޕްގެ އެއް ވަނަ ޓީމްގެ ގޮތުގައި ޗެމްޕިއަންސް ލީގު ދެ ވަނަ ބުރުން ޖާގަ ޔަޤީންކޮށްފައިވާ މެންޗެސްޓަރ ސިޓީން ގްރޫޕް ސްޓޭޖްގެ ފަހު މެޗުގައި ޒުވާން ކުޅުންތެރިންނަށް ފުރުޞަތުދޭނެކަމުގެ އިޝާރާތެއްކޮށްފިއެވެ.

އާއްމުކޮށް ސިޓީގެ ޓީމުން ޖާގަ ނުލިބޭ ކުޅުންތެރިންތަކެއް ސެވިއްޔާ އާ ދެކޮޅަށް ކުޅޭ ފަހު މެޗުން ފެންނާނެކަމަށް ކޯޗު ޕެޕް ގާޑިއޯލާ ވަނީ ބުނެފައެވެ. ޓީމުގެ އެއް ވަނަ ފޯވާޑް ހާލާންޑް އެ މެޗުގައި ވެސް ބޭނުން ނުކުރަން ކޯޗު ވަނީ ނިންމާފައެވެ. ހާލާންޑް %100 ފިޓެއް ނޫނެވެ. ބަދަލުގައި ފުރުޞަތު ދޭނެކަމަށް ބެލެވެނީ ކޯލް ޕަލްމާ އާއި ރިކޯ ލެވިސްއަށެވެ.

ސިޓީ ގްރޫޕްގެ އެއް ވަނަ ކަށަވަރުކުރީ 11 ޕޮއިންޓާ އެކުއެވެ. ސެވިއްޔާ މި މެޗަށްފަހު ވާދަކުރަން ޖެހޭނީ ޔޫރޮޕާ ލީގުގައެވެ. އެޓީމަށް ލިބުނީ ގްރޫޕްގެ ތިން ވަނައެވެ. ޕްރިމިއަރ ލީގުގައި ފުލަމް އާ ދެކޮޅަށް ކުޅޭ މެޗުގެ ކުރިން ސިޓީގެ ކޯޗު ޕެޕް ގާޑިއޯލާ ސްކޮދް ރޮޓޭޓްކޮށް ގިނަ ކުޅުންތެރިންނަށް ފުރުޞަތުދޭނެކަމަށް ބެލެވެއެވެ. ގާޑިއޯލާ ބުނީ ކަންކަން ޕްރެކްޓިސް ކުރުމާ އެކު ވެސް މެޗުން މޮޅުވާން ބޭނުންވާކަމަށެވެ.

މެންޗެސްޓަރ ސިޓީ އާއި ސެވިއްޔާ ވާދަކުރާ މެޗު ފަށާނީ ބުދަ ދުވަހުގެރޭ ރާއްޖެ ގަޑިން 01:00 ގައެވެ.