އޭސީ މިލާނާއެކު ސްޓެފާނޯ ޕިއޯލީ ހަދާފައިވާ އެއްބަސްވުން އައުކޮށްފި

އިޓާލިއަން ލީގުގެ އޭސީ މިލާނާ އެކު ހަދާފައިވާ އެއްބަސްވުން އެ ޓީމުގެ ކޯޗު ސްޓެފާނޯ ޕިއޯލީ އައުކޮށްފިއެވެ.

އިޓަލީ އަށް އުފަން އުމުރުން 57 އަހަރުގެ ޕިއޯލީ އޭސީ މިލާނާ ހަވާލުވީ 2019 ވަނަ އަހަރުއެވެ. އޭގެ ކުރިން އޭނާ ވަނީ އެކިއެކި ކުލަބުތަކަށް ކޯޗުކަން ކޮށްދީފައެވެ. އޭގެ ތެރޭގައި ގިނައިން ހިމެނެނީ އިޓަލީ އަށް ނިސްބަތްވާ ކުލަބުތަކެވެ. ކުޅުންތެރިޔެއްގެ ގޮތުގައި އިޓަލީގެ ގިނަ ކުލަބުތަކަށް ސެންޓަ ބެކެއްގެ ގޮތުގައި ކުޅެފައިވަނީ ޕިއޯލީ ކޯޗިން ކެރިއަރު ފެށީ 1999 ވަނަ އަހަރުއެވެ. ޒުވާން ޓީމުތަކަށް އިރުޝާދު ދިނުމަށްފަހު ޕިއޯލީ ކުލަބެއްގެ ކޯޗުކަމާ ހަވާލުވީ 2003 ވަނަ އަހަރުއެވެ.

އޭސީ މިލާނުން އެ ޓީމުގެ ކޯޗުކަމަށް ޕިއޯލީ ހަމަޖެއްސީ އޭނާގެ ކުރިން އެ މަޤާމުގައި ހުރި މާކޯ ގިމްޕައޮލޯ ވަކިކޮށްފައެވެ. އޭރު އޭނާ އެ ކުލަބާ ހަވާލުވީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. ޕިއޯލީގެ އިރުޝާދުގެ ދަށުން މިލާނުން ރަނގަޅު ނަތީޖާތަކެއް ހޯދުމުން، އެ ކުލަބުން ވަނީ އޭނާގެ އެއްބަސްވުން އައުކޮށްފައެވެ. ދެ އަހަރު ދުވަހަށް އައު ކުރި އެއްބަސްވުން މިއަހަރު ހަމަވާނެއެވެ. އެހެންކަމުން މިލާނުން މިހާރު ވަނީ އޭނާގެ އެއްބަސްވުން އިތުރު ތިން އަހަރަށް ދަމަހައްޓާފައެވެ. ޕިއޯލީގެ އައު އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ.

ޕިއޯލީގެ އިރުޝާދުގެ ދަށުން މިލާން ވަނީ މިހާތަނަށް 153 މެޗު ކުޅެފައެވެ. އޭގެ ތެރެއިން އެ ޓީމު ވަނީ 87 މެޗުން މޮޅުވެ، 29 މެޗުން ބަލިވެފައެވެ. އެއްވަރުވެފައިވަނީ 37 މެޗުންނެވެ. އޭސީ މިލާނާ އެކު ޕިއޯލީ ވަނީ ނިމުނު ސީޒަނުގެ އިޓާލިއަން ލީގު ކާމިޔާބުކޮށްފައެވެ. މި ސީޒަންގެ މިހާތަނަށް ކުޅުނު 12 މެޗުން 26 ޕޮއިންޓާ އެކު މިލާން އޮތީ ތިން ވަނަ މަގާމުގައެވެ.