އަންނަ އަހަރަށް ދައުލަތުން ލަފާ ކުރި ބަޖެޓުގައި ކުޅިވަރު މަޝްރޫއުތަކަށް 190 މިލިއަން ރުފިޔާ ހިމަނައިފިއެވެ.

ކުޅިވަރުގެ ދާއިރާއިން ހިންގި ގިނަ މަޝްރޫއުތަކެއް ނިމުމާއި ގުޅިގެން އެ ޚަރަދު އަންނަ އަހަރު ކުރަން ނުޖެހޭނެ ކަމަށް ބަޖެޓުގައިވެއެވެ. މީގެ އިތުރުން އަންނަ އަހަރުގެ ބަޖެޓުގައި ވަނީ ކުޅިވަރުގެ ދާއިރާ ކުރިއެރުވުމުށް ގިނަ ރަށްތަކެއްގައި އިންފްރާސްޓްރަކްޗަރ ޤާއިމުކުރުމަށް ބެޖެޓުން ޖާގަ ދީފައެވެ.

އަންނަ އަހަރަށް ދައުލަތުން ލަފާ ކުރި ބަޖެޓަށް ބަލާއިރު މާލޭ ހެންވޭރު ދަނޑު ތަރައްޤީ ކުރުމަށް ހަތަރު ލައްކަ ތިރީސް ހާސް ރުފިޔާ އާއި ގަލޮޅު ރަސްމީ ދަނޑު ތަރައްޤީކުރުމަށް 55.6 މިލިއަން ރުފިޔާ ވަނީ ބެޖެޓުގައި ހިމަނާފައެވެ. މީގެ އިތުރުން ޤައުމީ ބާސްކެޓު ބޯޅަ ސެންޓަރު ތަރައްޤީ ކުރުމަށް 6.2 މިލިއަން ރުފިޔާ އާއި، ޤައުމީ ޓޭބަލް ޓެނިސް ސެންޓަރު ތަރައްޤީ ކުރުމަށް 3.4 މިލިއަން ރުފިޔާ އާއި، ނެޓު ބޯޅަ ސެންޓަރު ތަރައްޤީ ކުރުމަށް 1.6 މިލިއަން ރުފިޔާ ވަނީ ބެޖެޓުގައި ހިމަނާފައެވެ. ނޭޝަނަލް ވޮލީ ކޯޓު ތަރައްޤީ ކުރުމަށް 2.1 މިލިއަން ރުފިޔާ ވަނީ އަންނަ އަހަރުގެ ބެޖެޓުގައި ވަނީ ހިމަނާފަައިވާއިރު، މާލޭ އިންޑޯ ވޮލީ ކޯޓު ތަރައްޤީ ކުރުމަށް ދެ ލައްކަ އަށްޑިހަ ތިން ހާސް ފަސް ސަތޭކަ ރުފިޔާ ވަނީ ބެޖެޓުކޮށްފައެވެ. މީގެ އިތުރުން ހުޅުމާލޭގައި ފުޓުބޯޅަ ޓްރެއިނިން ސްލޫކުލެއް ޤާއިމު ކުރުމަށް 1.4 މިލިއަން ރުފިޔާ ވަނީ ބަޖެޓުގައި ހިމަނާފައެވެ.

މީގެ އިތުރުން އަތޮޅުތެރޭގެ އެކި ރަށްތަކުގައި ފުޓުބޯޅަ ދަނޑު ތަރައްޤީކުރުމާއި، ދަނޑުތަކުގެ ވަށާ ފާރާއި ފެންސް ޤާއިމުކުރުމުގެ އިތުރުން ސިޑިބަރި، ލައިޓިން ސިސްޓަމް އަދި ޗޭންޖިން ރޫމް ތަރައްޤީ ކުރުމަށް ބަޖެޓުގައި ވަނީ ހިމަނާފައެވެ. އަދި ރަށްރަށުގައި ސްވިމިން ޓްރެކް ތަރައްޤީ ކުރުމާއި، ވޮލީ ކޯޓު ތަރައްޤީ ކުރުމާއި، އިންޑޯ ވޮލީ ކޯޓު ތަރައްޤީ ކުރުމާއި، ޒުވާނުންގެ މަރުކަޒު ތަރައްޤީ ކުރުމާއި، ކުޑަކުދިންގެ ޕާކާއި އައުޓް ޑޯ ޖިމް ތަރައްޤީ ކުރުމާއި، ފުޓްސަލް ދަނޑު ތަރައްޤީ ކުރުމާއި، ސިންތެޓިކް ޓްރެކް ތަރައްޤީ ކުރުމާއި، އިންޑޯ ކޮމްޕްލެކްސްގެ އިތުރުން ސްކޭޓިން ޕާކު ތަރައްޤީ ކުރުން ފަދަ މުހިންމު މަޝްރޫތައް ވަނީ ހިމަނާފައެވެ.

އަންނަ އަހަރަށް ދައުލަތުން ލަފާކޮށްފައިވަނީ 42.68 ބިލިއަން ރުފިޔާގެ ބަޖެޓެކެވެ. މި ބަޖެޓު ރައްޔިތުންގެ މަޖިލީހަށް ހުށަހަޅައިދެއްވީ ފިނޭންސް މިނިސްޓަރު އިބްރާހީމް އަމީރުއެވެ.