2023 ވަނަ އަހަރުގެ ބަޖެޓަކީ އެކަށީގެންވާ ޙައްލު ހޯދޭނެ ދެލިކޮޕީއެއް - އަމީރު
31 އޮކްޓޯބަރު 2022 | ހޯމަ 04:26ކޮވިޑް-19ގެ ކުރިން އިޤްތިސާދު ހުރި މިންވަރަށް މިއަހަރު ނިމޭއިރު ރާއްޖޭގެ އިގްތިޞާދު އަނބުރާ އިއާދަވާނެ
ފިނޭންސް މިނިސްޓަރު އިބްރާހިމް އަމީރު
2023 ވަނަ އަހަރުގެ ބަޖެޓަކީ އެކަށީގެންވާ ޙައްލު ހޯދޭނެ ދެލިކޮޕީއެއް ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިނިސްޓަރު އަމީރު މިހެން ވިދާޅުވީ ހޯމަ ދުވަހު ބޭއްވި ޖަލްސާގައި 2023 ވަނަ އަހަރަށް ދައުލަތުން ލަފާކުރާ ބަޖެޓު ބަޔާން އިއްވަވަމުންނެވެ. ބަޖެޓު ބަޔާން އިއްވަވަމުން މިނިސްޓަރު ވިދާޅުވީ ކޮވިޑު-19ގެ ހާލަތުގައި ވަޒީފާ ގެއްލި އަތްމަތި ދަތިވެ ގޮތް ހުސްވި އެންމެނަށް ސަރުކާރުން އެހީތެރިވި ކަމަށެވެ. ވިޔަފާރިތައް ބަނގުރޫޓު ވިޔަނުދީ ހިފެހެއްޓުމަށް ސަރުކާރުން ގިނަ ފިޔަވަޅުތަކެއް އަޅާ، ސަރުކާރުގެ އެންމެ މުވައްޒަފެއްގެ ވަޒީފާއަށް، ނުވަތަ ލިބޭ މުސާރައަށް އުނިކަމެއް އަޔަނުދީ ހިފެހެއްޓުނު ކަމަށެވެ.
މާތް ﷲގެ ރަޙްމަތްފުޅާ އެކު، ކޮވިޑް-19ގެ ޢާލަމީ ވަބާގެ ބިރު މިއަދު ފިލާ ހިނގައްޖެ ކަމަށާއި، ދުނިޔެ ހުއްޓި ރާއްޖޭގެ ބޯޑަރު ބަންދުކުރި ދުވަސް މާޒީވެއްޖެ ކަމަށެވެ. ރަށްތައް ތަޅުލެވި، މާލެ ފުރަބަންދުވެ އަނދިރިކަމަށް އަލި ވިލިއްޖެ ކަމަށެވެ. ސަރުކާރުން ހިކުމަތްތެރިކަމާ އެކު އެޅި އަވަސް ފިޔަވަޅުތަކުގެ ސަބަބުން، އިރާދަ ކުރެއްވިއްޔާ، ކޮވިޑް-19ގެ ކުރިން އިޤްތިސާދު ހުރި މިންވަރަށް މިއަހަރު ނިމޭއިރު ރާއްޖޭގެ އިގްތިޞާދު އަނބުރާ އިއާދަވާނެ ކަމަށް ފިނޭންސް މިނިސްޓަރު ވިދާޅުވިއެވެ.
މިނިސްޓަރު އަމީރު ވިދާޅުވީ ދިވެހިރާއްޖެ މިއަދު މިވަނީ، ދުނިޔެ ކުރިމަތިލަމުންދާ އިޤްތިސާދީ އެކި ގޮންޖެހުންތަކުގެ މެދުގައި ކަމަށެވެ. 2023 ވަނަ އަހަރުގެ ބަޖެޓަކީ ފާއިތުވި ތަނުން ލިބުނު ރަނގަޅު ތަޖުރިބާގެ މައްޗަށް ބިނާކޮށްފައިވާ އިތުބާރު ހިފޭ މަގުޗާޓެއް ކަމަށް މިނިސްޓަރު ވިދާޅުވިއެވެ. އަދި އެކަށީގެންވާ ހައްލު ހޯދޭނެ ދެލިކޮޕީއެއް ކަމަށެވެ. ރައްޔިތުންގެ ފުދުންތެރިކަމާއި އިޖްތިމާޢީ ދުޅަހެޔޮކަމާއި ރައްކާތެރިކަމަށް މެދުނުކެނޑި އެހީތެރިވުމުގައި ސަރުކާރަށް ދެމިއޮވެވޭނެ ޕްލޭނެއް ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ދުނިޔޭގައި މިހާރު ހިނގަމުންދާ ކަންކަމާ އެކު، ރައްޔިތުންގެ މެދުގައި ކަންބޮޑުވުން ހުރިކަން ގަބޫލުކުރައްވާ ކަމަށެވެ. އެއީ އިޤްތިސާދާއި ރާއްޖޭގެ މާލީ ހާލަތާ މެދު ހުރި ކަންބޮޑުވުންތަކެއް ކަމަށާއި، ދައުލަތުގެ ދަރަނި ބޮޑުވެ، އިޤްތިސާދަށް ބޮޑު ގޮންޖެހުމެއް ކުރިމަތިވެދާނެ ކަމުގެ ވާހަކަތައް އަޑުއިވިވަޑައިގަންނަވާ ކަމަށެވެ. ތަކެތީގެ އަގު މަތިވެދާނެތީ އެކަމުގެ ކަންބޮޑުވުން ފާޅުކުރާ ކަމަށާއި، އަސާސީ ޚިދުމަތްތައް ނުލިބުމާއި ޚިދުމަތްތަކުގެ ފެންވަރު އެކަށީގެންވާ މިންވަރެއްގައި ނެތުމުގެ ޝަކުވާ އަބަދުވެސް އަޑު އިވޭ ކަމަށެވެ. މިނިސްޓަރު ވިދާޅުވީ އިވޭ އަޑުތަކާ، އޮތް ޙާލަތާ، ކުރާންޖެހޭ ކަންކަން ސަރުކާރަށް ވަރަށް ސާފު ކަމަށެވެ.
ސަރުކާރާ ހަވާލުވީ، ޒަމާނުއްސުރެ ދިވެހިރާއްޖޭގައި ހައްލުނުވެ ހުރި އެތައް ގިނަ ކަންތައްތަކެއް ހައްލުކުރުމަށް ވައުދުވެގެން ކަމަށް މިނިސްޓަރު ވިދާޅުވިއެވެ. އަދި އަސާސީ، އުމްރާނީ ވަސީލަތްތައް ގާއިމުކުރުމަށާއި، އިޖުތިމާއީ އަދި އިގުތިސާދީ ދާއިރާއަށް އިންގިލާބީ ބަދަލުތަކެއް ގެނެސްދޭނެ ވިސްނުންތަކާ އެކު ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ސަރުކާރުގެ މަސައްކަތް ހުރީ އެ މަގަށް ކަމަށެވެ. 2023 ވަނަ އަހަރުގެ ބަޖެޓުގެ އެންމެ ބޮޑު އަމާޒަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ރައްޔިތުންނަށް ވެވަޑައިގެންފައިވާ ވައުދުތައް ފުއްދުން ކަމަށާއި، ޒަމާނުއްސުރެ ހައްލުނުވެ ހުރި އަސާސީ އެތައް މައްސަލައެއް ހައްލުކުރުމަށް މަގުފަހިކުރެއްވުން ކަމަށް މިނިސްޓަރު ވިދާޅުވިއެވެ.
މީގެ އިތުރުން ރައްޔިތުންނަށް ބޭނުންވާ ޚިދުމަތްތަކުގެ ފެންވަރު ރަނގަޅުކުރެއްވުން ކަމަށާއި އިޖުތިމާޢީ އަދި އިޤްތިސާދީ އިންގިލާބީ ބަދަލުތަކެއް އަންނަކަމުގެ އިހުސާސް ރައްޔިތުންނާ ގާތްކޮށްދިނުން ކަމަށް މިނިސްޓަރު ވިދާޅުވިއެވެ.
