އަބްދުﷲ ރަޝީދުގެ ޕޯސްޓްމޯޓަމް ހުއްޓުވުމުގެ އަމުރެއް ނުދިން
30 އޮކްޓޯބަރު 2022 | އާދީއްތަ 15:42އަބްދުﷲ ރަޝީދު ހަށިގަނޑު ހޯދަން އާއިލާއިން ވަނީ ސިވިލް ކޯޓަށް މައްސަލަ ހުށަހަޅާފައި
ގަލޮޅު ސަހަރާ ކައިރިއަށް އަބްދުﷲ ރަޝީދުގެ އާއިލާގެ މީހުން އެއްވެފައި
ފުލުހުންގެ ބެލުމުގެ ދަށުގައި ހުއްޓާ މަރުވި އަބްދުﷲ ރަޝީދުގެ ޕޯސްޓްމޯޓަމް ހެދުން ހުއްޓުވުމަށް އާއިލާއިން ސިވިލް ކޯޓަށް ހުށަހެޅި މައްސަލައިގައި އެކަން ހުއްޓުވުމަށް އަމުރެއް ނެރެދެވެން ނެތް ކަމަށް އެ ކޯޓުން ނިންމައިފިއެވެ.
މިގޮތަށް ސިވިލް ކޯޓުން ނިންމާފައިވަނީ އާދީއްތަ ދުވަހުގެ ހަވީރުއެވެ. މި މައްސަލައިގެ ފުރަތަމަ އަޑުއެހުން ހޮނިހިރު ދުވަހު ބާއްވާފައިވާއިރު ޕޯސްްމޯޓަމް ހެދުމަށް ހޯމަ ދުވަހު އަބްދުﷲ ރަޝީދުގެ ހަށިގަނޑު ބޭރަށް ފޮނުވަން ނޭޝަނަލް އިންޓެގްރިޓީ ކޮމިޝަނުން ވަނީ ނިންމާފައެވެ.
އަބްދުﷲ ރަޝީދު މަރުވީ ގދ. ހޯނޑެއްދޫއިން އޭނާ ހައްޔަރުކޮށްގެން އެ އަތޮޅުގެ މަޑަވެލީ ޕޮލިސް ސްޓޭޝަނަށް ގެންދަނިކޮށެވެ. އޭނާ ހައްޔަރުކޮށްގެން ލޯންޗަށް އެރުވުމުން މޭގައި ރިއްސާކަމަށް ބުނުމުން ވެސް ފުލުހުން އަޅާނުލި ކަމަށް ބުނެ އާއިލާއިންނާއި އެކި ފަރާތްތަކުން ވަނީ އެކަމުގައި ފުލުހުންގެ އިހުމާލު އޮތްކަމަށް ބުނެފައެވެ.
މި މައްސަލަ ބަލަމުން ދަނީ ނޭޝަނަލް އިންޓެގްރިޓީ ކޮމިޝަނުންނެވެ. މި މައްސަލައިގައި ކަންހިނގައި ދިޔަ ގޮތް އިންސާފުވެރިކަމާއެކު، ރަނގަޅަށް ތަހުގީގުކުރުމަށް އިރުޝާދު ދެއްވައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އާއި ހޯމް މިނިސްޓަރ އިމްރާން އަބްދުﷲ ހުކުރު ދުވަހު ވަނީ ވާހަކަފުޅު ދައްކަވާފައެވެ. ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ މި މައްސަލައިގައި ކަން ހިނގަމުންދާ ގޮތް ރައީސުލްޖުމްހޫރިއްޔާ ގާތުން ބައްލަވަމުން ގެންދަވާ ކަމަށެވެ.
