ފަތުރުވެރިކަމާއި އިގްތިސާދާމެދު އާ ވިސްނުމަކުން ވިސްނަންޖެހޭ
މިފަހަރުގެ އެކައުންޓެންޓްސް ފޯރަމްގެ ޝިއާރަކީ "އިކޮނޮމިކް ޓްރާންސްފޮމޭޝަން - ރީތިންކިންގ ގްރޯތު އިން ދަ ނިއު އިކޮނޮމީ"
ޑރ. އަބްދުﷲ މައުސޫމް
ފަތުރުވެރިކަމާއި އިގްތިސާދާމެދު އާ ވިސްނުމަކުން ވިސްނަންޖެހޭކަމަށް، ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ގައުމީ ފެންވަރުގައި ބާއްވާ ފަސްވަނަ އެކައުންޓެންޓްސް ފޯރަމް ފައްޓަވައިދެއްވައި ވާހަކަފުޅުދައްކަވަމުން މިނިސްޓަރު ވިދާޅުވީ، ބައިނަލްއަގުވާމީގޮތުން ބެލިނަމަވެސް، އިގްތިސާދީގޮތުން ތަފާތު ވިސްނުމަކުން ވިސްނަންޖެހޭ ކަމަށެވެ. މި އަހަރުގެ އެކައުންޓެންސްޓްސް ފޯރަމްގެ ޝިއާރުކަމުގައިވާ "އިކޮނޮމިކް ޓްރާންސްފޮމޭޝަން - ރީތިންކިންގ ގްރޯތު އިން ދަ ނިއު އިކޮނޮމީ" މި ޝިއާރަކީ އިގްތިސާދު ބަދަލުކޮށްލުމަށާއި އިގްތިސާދީ ކުރިއެރުމާމެދު އާ ވިސްނުމަކުން ވިސްނުމަށް ލިބޭ ފުރުސަތެއްކަމަށް މިނިސްޓަރު ވިދާޅުވިއެވެ. ފަތުރުވެރިކަމަކީ ރާއްޖޭގެ އިގްތިސާދުގެ އެންމެ މައި އެއް ހިއްސާ އެކުލެވޭ ދާއިރާކަމަށް ވުމާއެކު، އެ ދާއިރާއިންވެސް އިގްތިސާދާމެދު އާ ވިސްނުމަކުން ވިސްނުން މުހިންމުކަން އެމަނިކުފާނު ވަނީ ފާހަގަކުރައްވާފައެވެ.
މިނިސްޓަރު ވިދާޅުވީ، ބައިނަލްއަގުވާމީ މައިދާނުގައި، ވާދަވެރި މާހައުލެއްގައި ވިޔަފާރިކުރުންމަތީ ދެމިއޮތުމަށްޓަކައި، އަބަދުވެސް އިގްތިސާދީގޮތުން އެންމެ ރަނގަޅު ގޮތްތައް ޚިޔާރުކުރަންޖެހޭކަމަށެވެ. ބައެއް ފަހަރު ގައުމިއްޔަތުގެ ރޫހުގައި، ރާއްޖެއަށް އެންމެ ރަނގަޅު ގޮތަކީ އެހެން ބަޔަކާ ނުގުޅި އަމިއްލައަށް އިގްތިސާދު ކުރިއެރުވުމަށް މަސައްކަތްކުރުން ކަމަށް ހީވެފައިވީނަމަވެސް، ދުނިޔޭގެ އިގްތިސާދަކީ އެކުވެ، ގުޅި ލާމެހިފައިވާ ކަމެއް ކަމަށް އެމަނިކުފާނު ވިދާޅުވިއެވެ. އެގޮތުން ރާއްޖޭގައި އުފެއްދުންތެރި ޚިޔާލުތަކާއި، ވިސްނުންތެރިކަން ހުރިނަމަވެސް، ރާއްޖެއަށް ބޭނުންވާ މާލީ އެހީތެރިކަން ހޯދުމަށް އެހެން މީހުންގެ އެހީތެރިކަން ބޭނުންވާނެކަމަށާއި، ބައެއް ފަހަރު ގައުމަށް އެންމެ ރަނގަޅު ގޮތަކީ އެންމެ މަގްބޫލު ނިންމުމަށް ނުވެދާނެކަމަށްވެސް ވިދާޅުވިއެވެ.
މިނިސްޓަރު ވިދާޅުވީ، ރާއްޖޭގެ ވިޔަފާރިތަކަކީ ރާއްޖޭގެ މީހުންގެ އަމިއްލަ ތަންތަނަށް ވުމަކީ ބޭނުންފުޅުވާ ގޮތް ކަމަށެވެ. އެހެންނަމަވެސް ރަނގަޅު އާމްދަނީއެއް ހޯދުމަށްޓައި ރަނގަޅު އިންވެސްޓްމެންޓްތައް ލިބުން މުހިންމުކަމަށް ވިދާޅުވިއެވެ. އަދި އެކަން ކުރެވޭނީ އިގްތިސާދަށް ފަހި ގާނޫނީ އޮނިގަނޑެއް އޮވެގެންކަން ޑރ. މައުސޫމް ވަނީ ފާހަގަކުރައްވާފައެވެ. ރާއްޖެއަކީ އިންވެސްޓަރުންނަށް އެންމެ ފަހި ފުރުސަތުތައް ހުރި އެއް ގައުމުކަމަށް މިނިސްޓަރު ވިދާޅުވިއެވެ.
މިނިސްޓަރު ވަނީ، ރާއްޖޭގެ ކުރިއެރުމުގައި އެކައުންޓެންޓުންގެ ދައުރު ވަރަށް ބޮޑުކަން ފާހަގަކުރައްވާފައެވެ. އަދި އެ ދާއިރާއަކީ ފަންނީ، ގާބިލް މީހުން ބޭނުންވާ ދާއިރާ އެއްކަމަށާއި، އެ ދާއިރާއަކީ ވަޒީފާގެގޮތުން ބަލާއިރުވެސް ޝައުގުވެރި ދާއިރާއެއްކަމަށް ވަނީ ވިދާޅުވެފައެވެ. އަދި، ރާއްޖޭގެ އެހެން ދާއިރާތަކަށްވެސް ގާބިލް މީހުން ބޭނުންވާކަމަށާއި، އިންސާނީ ވަސީލަތް މަދުވުމަކީ ރާއްޖެއަށް ދިމާވެފައިވާ ވަރަށް ބޮޑު ގޮންޖެހުމެއް ކަަމަށް އެމަނިކުފާނު ވަނީ ވިދާޅުވެފައެވެ.
