މުޅި ރާއްޖެއަށް ފަތުރުވެރިކަން ފުޅާކުރުމުގެ ސިޔާސަތުގެ ދަށުން އެކި ސަރަހައްދުތަކުގައި ރިސޯޓްތައް ތަރައްގީކުރުމަށް ހުޅުވާލަނީ އިންތިޚާބާ ދިމާކޮށް ނޫންކަމަށް ޓޫރިޒަމް މިނިސްޓަރ ޑރ އަބްދުﷲ މައުސޫމް ވިދާޅުވެއްޖެއެވެ.

މުޅި ރާއްޖެއަށް ފަތުރުވެރިކަން ފުޅާކުރުމުގެ ގޮތުން ސަރުކާރުން މިހާރުވަނީ 18 ރަށެއް މުޅިން އަލަށް ރިސޯޓް ތަރައްގީކުރުމަށް ބިޑަށް ހުޅުވާލާފައެވެ. އޭގެފަހުން ހޯމަ ދުވަހު ޓޫރިޒަމް މިނިސްޓްރިން ވަނީ ށ އަތޮޅުގެ 3 ރަށެއް ރިސޯޓް ތަރައްގީކުރުމަށް ހުޅުވާލާފައެވެ. ކުރިމަތިވަމުން އަންނަ ކޮމަންޑޫ ދާއިރާގެ ބައި އިލެކްޝަނާއި ދިމާކޮށް ސަރުކާރުން އެސަރަހައްދަށް ގިނަ މަޝްރޫޢުތަކެއް އަންނަނީ އިއުލާންކުރަމުންނެވެ.

އެކަމާއި ގުޅިގެން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން މިނިސްޓަރ ވިދަޅުވީ މީގެކުރިން އައްޑޫ ސިޓީގައި ފަތުރުވެރިކަން ކުރިއަރުވާ ވާހަކަދެއްކުމުންވެސް އެއީ އިންތިޚާބާ ދިމާކޮށް ކުރާކަމަކޭ ބުނަމުންދިޔަ ކަމަށެވެ. ށ އަތޮޅުގެ އިތުރު 3 ރަށެއް ރިސޯޓްގެ ގޮތުގައި ތަރައްގީކުރުމަށް ހުޅުވާލީ މިދިޔަ އަހަރު އެއަތޮޅުގައި ހުޅުވޭނެކަމަށް ބެލި ރަށްތައް ނުހުޅުވޭތީ ކަމަށެވެ. ރަށްތައް ހުޅުވޭނެކަމަށް އިންތިޒާރުކޮށްގެން ތިބެވެންނެތް ކަމަށް މިނިސްޓަރ ވިދާޅުވިއެވެ.

ށ އަތޮޅުގައި ތަރައްގީކުރުމަށް މިނިސްޓްރީން ހުޅުވާލާފައިވަނީ 300 އެނދުގެ މަޝްރޫޢެކެވެ. މިނިސްޓަރ ވިދާޅުވީ ރަށްތައް ތަރައްގީނުކޮށް ހަމައެކަނި އެއަރޕޯޓް އަޅައިގެންވެސް ތަރައްގީ ނުގެނެވޭނެކަމަށެވެ. އެއަރޕޯޓު އަޅާފައި މަތިންދާބޯޓުތަކުން ދަތުކުރާނެ މީހުން ބޭނުންވާ މިންވަރަށް ލިބެނީ ފަތުރުވެރިކަމުން ކަމަށް މިނިސްޓަރ ވިދާޅުވިއެވެ. އެހެންވީމާ ރަށްތައް ތަރައްގީކޮށް ގިނަ އަދަދެއްގެ ފަތުރުވެރިން ރާއްޖޭގެ އެކި ކަންކޮޅުތަކަށް ގެންނަންޖެހޭކަމަށް މިނިސްޓަރ ވިދާޅުވިއެވެ.

ކުރިޔަށް އޮތް ހަފްތާގެ ތެރޭގައި ގއ އަށް މިނިސްޓްރީގެ ޓީމެއް ދަތުރުކޮށް އެއަތޮޅުގައި ފަތުރުވެރިކަން ތަރައްގީކުރެވޭނެ ގޮތްތައް ބަލާނެކަމަށް މިނިސްޓަރ ވިދާޅުވިއެވެ. އެކަންކުރާނީ ރައްޔިތުންގެ މަޝްވަރާގެ މަތިން ރައްޔިތުން ބޭނުންވާގޮތަށްކަމަށް މިނިސްޓަރ ވިދާޅުވިއެވެ.

އަދި ރަށްތައް ނުހެދި ދިގުލައިގެންދާ ދިޔުންވެސް ނިމުމަކަށް ގެނައުމަށް ސިޔާސަތުތަކަށް ބަދަލުގެންނަންޖެހޭ ކަަމަށާއި އެބަދަލުތައްވެސް ގެންނަމުންދާކަމަށް މިނިސްޓަރ ވިދާޅުވިއެވެ.