މާސްޓަރ ޕްލޭން ހަދާއިރު ވަރަށް ފުޅާކޮށް ވިސްނަންޖެހޭ: މިނިސްޓަރު އަސްލަމް
7 ސެޕްޓެމްބަރު 2019 | ހޮނިހިރު 13:38ޕްލޭން ހަދާއިރު ހޯރަފުށީގެ ވަށައިގެންވާ އާބާދީތަކަށް ވިސްނަންޖެހޭ
މިނިސްޓަރު އަސްލަމް ވާހަކަފުޅު ދައްކަވަނީ
ރަށްރަށުގެ ތަރައްގީއަށް ހަދާ މާސްޓަރ ޕްލޭންއަކީ ގިނަ ބައެއްގެ މުސްތަގުބަލާ ގުޅިފައިވާ ކަމެއް ކަމަށާއި، ހއ.ހޯރަފުށީގެ މާސްޓަރ ޕްލޭން ހަދާއިރު ވަރަށް ފުޅާކޮށް ވިސްނަންޖެހޭ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ހޯރަފުށީގެ މާސްޓަރ ޕްލޭންއަށް ރައްޔިތުންގެ ލަފާ ހޯދުމާއި، ފަސް އަހަރު ދުވަހުގެ ތަރައްގީގެ ޕްލޭން އެކުލަވާލުމުގެ ވާރކްޝޮޕް ފެށުމުގެ ރަސްމިއްޔާތު ޝަރަފުވެރި ކޮށްދެއްވާ މިނިސްޓަރު އަސްލަމް ވިދާޅުވީ ތަރައްގީގެ މާސްޓަރ ޕްލޭންއަކީ ލޭންޑް ޔޫސް ޕްލޭންއަށް ވުރެ އަދި މާބޮޑު އެއްޗެއް ކަމަށެވެ. ލޭންޑް ޔޫސް ޕްލޭންއަކީ ހަމައެކަނި ރަށުގެ ބިން ބަހާލާނެ ގޮތުގެ ޕްލޭންއެއް ކަމަށާއި، މާސްޓަރ ޕްލޭންއަށް ވުރެ މާފުޅާ ވިސްނުމެއް ގެންގުޅެންޖެހޭ ކަމަށް މިނިސްޓަރު ވިދާޅުވިއެވެ.
މިނިސްޓަރު އަސްލަމް ވިދާޅުވީ މާސްޓަރ ޕްލޭން ހެދުމުގެ މަސައްކަތް ކުރާއިރު ހަމައެކަނި ވިސްނަންޖެހޭނީ ހޯރަފުށީގެ ފަސްގަނޑަށް ނޫން ކަމަށާއި، ހޯރަފުށީގެ ވަށައިގެންވާ އާބާދީތަކަށް ވެސް ވިސްނަންޖެހޭ ކަމަށެވެ. ހަމައެކަނި ރަށަށް ވިސްނުމަށް ފަހު މާސްޓަރ ޕްލޭން ހަދާނަމަ ތަރައްގީ އޮންނާނީ ހުއްޓިފައި ކަމަށެވެ.
މީގެ އިތުރުން މިނިސްޓަރު އަސްލަމް ވިދާޅުވީ ތަރައްގީގެ މާސްޓަރ ޕްލޭންގެ ތެރެއިން ގިނަ ބަޔަކު ބޭނުންވާ ކަންކަން އެމާހައުލަކުން ލިބެންޖެހޭ ކަމަށާއި، ހަމައެކަނި އުފައްދާ ވަޒީފާއިން ނުފުދޭ ކަމަށެވެ. ބިނާކުރަނިވި މާސްޓަރ ޕްލޭންއެއްގެ ތެރެއިން ރަށް ތަރައްގީ ކުރެވިއްޖެނަމަ މުސްތަގުބަލުގައި ގިނަ ބަޔައަކު އެރަށަކަށް ދިރުއުޅުން ބަދަލުކުރާނެ ކަމަށް ވެސް މިނިސްޓަރު ވިދާޅުވިއެވެ.
ރަށަށް ދަމާބާރު ޖަމާކުރަންޖެހޭ ކަމަށް މިސާލު ޖައްސަވަމުން މިނިސްޓަރު އަސްލަމް ވިދާޅުވީ ލަންކާ، އިންޑިއާ އަދި މެލޭޝިޔާގައި ދިވެހިން ދިރިއުޅެމުންދަނީ އާމްދަނީ ހޯދަން ނޫން ކަމަށާއި، ރާއްޖެއިން ލިބޭ ޚިދުމަތްތަކަށް ވުރެ ރަނގަޅު ޚިދުމަތްތަކެއް ލިބޭތީ ކަމަށެވެ.
މާސްޓަރ ޕްލޭން ހެދުމަށް ފަހު، ގިނަ ދުވަސްނުކޮށް ބިންގާ އަޅަންޖެހޭ ކަމަށާއި، އެނޫން ގޮތަކަށް ޕްލޭންކުރިއަށް ނުގެންދެވޭނެ ކަމަށް މިނިސްޓަރު ވިދާޅުވިއެވެ.
