ފަހަތުން އަރައި، މެޕްސްއިން ފިރިހެން ޑިވިޝަންގެ ޗެމްޕިއަންކަން ހޯދައިފި

ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ)އިން އިންތިޒާމުކޮށްގެން ބޭއްވި ލެކްނޯ އެމްއެންޔޫއެސްޔޫ ފުޓްސަލް ފިއެސްޓާގެ ފިރިހެން ޑިވިޝަންގެ ޗެމްޕިއަންކަން މެޕްސް ކޮލެޖުން ހޯދައިފިއެވެ.

ހުކުރު ދުވަހުގެ ރޭ މާފަންނު ޓާފުގައި ކުރިއަށްދިޔަ ފައިނަލް މެޗު މެޕްސްއިން ކާމިޔާބުކުރީ އެމްއެންޔޫ ބިޒްނަސް ސްކޫލް ބަލިކޮށްގެންނެވެ. މެޕްސްއިން މެޗު ކާމިޔާބުކުރީ އެމްއެންޔޫބީއެސްއިން ތިން ލަނޑު ޖަހައި ލީޑު ނަގާފައި ވަނިކޮށް، ދެ ވަނަ ހާފުގައި ފަހަތުން އަރައި ހަތަރު ލަނޑު ޖަހައިގެންނެވެ.

މެޗުގައި އެމްއެންޔޫބީއެސްގެ ފުރަތަމަ ދެ ލަނޑު ޖެހީ އިބްރާހީމް އާތިފްއެވެ. އެއީ މެޗު ފަށައިގެން ހަތަރުވަނަ މިނެޓުގައި އޭނާ ޖެހި ލަނޑާއި، 21 ވަނަ މިނެޓުގައި ޖެހި ލަނޑުންނެވެ. ދެވަނަ ހާފު ފަށައިގެން ތިންވަނަ މިނެޓުގައި އެމްއެންޔޫބީއެސްއަށް ލީޑު އިތުރަށް ފުޅާކޮށްދިނީ މުހައްމަދު އަނާންއެވެ. އޭގެ ފަހުން މެޕްސްއިން ވަނީ މޮޅު ކުޅުމެއް ދައްކައި ހަތަރު ލަނޑު ޖަހާފައެވެ. މެޕްސްގެ ފުރަތަމަ ލަނޑު ޖެހީ މެޗުގެ 25 ވަނަ މިނެޓުގައި ޖަމްޝާދު ޖައުފަރުއެވެ. އޭގެ ތިން މިނެޓު ފަހުން އަބްދުﷲ ހިޝާން ވަނީ ލަނޑެއް ޖަހައި މެޕްސްއަށް ފަރަގު ކުޑަކޮށްދީފައެވެ. މެޕްސްއަށް ނަތީޖާ ހަމަހަމަކޮށްދިނީ މުހައްމަދު ހަނާމް އިސްމާއީލްއެވެ. މެޗުން މެޕްސް މޮޅު ކޮށްދިން ލަނޑު ޖެހީ މެޗުގެ ފަހު ވަގުތުގެ ތެރޭގައި އަލީ ޝާޒްއެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ މެޕްސްގެ އާދަމް މަންސޫރެވެ.

މިއީ މެޕްސްއިން މުބާރާތް ކާމިޔާބުކުރި ދެ ވަނަ ފަހަރެވެ. މީގެ ކުރިން 2018 ވަނަ އަހަރުވެސް އެ ޓީމުން ވަނީ މުބާރާތް ކާމިޔާބުކޮށްފައެވެ.

ފިރިހެން ޑިވިޝަންގެ ފެއަރ ޕްލޭ ކުޅުންތެރިޔަކަށް ހޮވުނީ އެމްއައި ކޮލެޖުގެ އަހުސަމް ހަސަން ދީދީއެވެ. އެންމެ އުންމީދީ ކުޅުންތެރިޔަކަށް ހޮވުނީ ސެންޓަރ ފޯ ފައުންޑޭޝަން ސްޓަޑީޒް (ސީއެފްއެސް)ގެ އަހުމަދު އިހާން އިނާޒްއެވެ. އެންމެ މޮޅު ކޯޗަކަށް ހޮވުނީ އެމްއެންޔޫބީއެސްގެ އިސްމާއީލް އާސިފްއެވެ. މި ޑިވިޝަންގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ އެމްއެންޔޫބީއެސްގެ މުހައްމަދު އަނާންއެވެ. އެންމެ މޮޅު ފަސް ކުޅުންތެރިންނަކީ ޗެމްޕިއަން، މެޕްސް ކޮލެޖުގެ އަލީ ޝާޒް ހިލްމީ، އެ ޓީމުގެ ކީޕަރު އަހުމަދު އިބްތިސާމް މައުސޫމް، ސީއެފްއެސްގެ މުހައްމަދު ނާބިތު ހުސައިން، އެމްއެންޔޫބީއެސްގެ މުހައްމަދު އަނާން، އަދި އަހުމަދު ރިޔުޝާނެވެ. މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ޗެމްޕިއަން މެޕްސްގެ އާދަމް މަންސޫރެވެ.

މި މުބާރާތަކީ އެމްއެންޔޫއެސްޔޫއިން އިންތިޒާމުކޮށްގެން 2012 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. މިއަހަރުގެ މުބާރާތް ބާއްވާފައިވަނީ ދެ އަހަރު ދުވަހުގެ މެދު ކެނޑުމަކަށްފަހުއެވެ. ކޮވިޑް-19ގެ ބަލިމަޑުކަމުގެ ސަބަބުން 2020 އަދި 2021 ވަނަ އަހަރު މުބާރާތް ބާއްވާފައެއް ނުވެއެވެ. މި މުބާރާތަަކީ އެ ޖަމްއިއްޔާއިން އިސްނަގައިގެން، ދިވެހިރާއްޖޭގެ މަތީ ސާނަވީ ތައުލީމުގެ ދާއިރާއަށް ޚާއްސަކޮށްގެން ބާއްވަމުން އަންނަ މުބާރާތެކެވެ.