އިންޓަރ މިލާން މޮޅުވުމުން ބާސެލޯނާ ޗެމްޕިއަންސް ލީގުން ކަޓައިފި

އިންޓަރ މިލާން މޮޅުވުމުން, މިސީޒަނަށް ވަރުގަދަކުރި ބާސެލޯނާ ޗެމްޕިއަންސް ލީގުގެ ގްރޫޕް ސްޓޭޖުން ކަޓައިފިއެވެ.

ބަޔާން މިއުނިކާ ވާދަކުރާ މެޗަށް ތައްޔާރުވެގެން ތިބި ބާސެލޯނާ ކެޓީ އިންޓަރ މިލާނުން ޗެކް ރިޕަބްލިކްގެ ވިކްޓޯރިއާ ޕްލެޒެން އަތުން މޮޅުވެ, ދެވަނަ ބުރުގެ ޖާގަ ހޯދުމުންނެވެ. އިންޓަރ މިލާން ދެވަނަ ބުރު ޔަޤީންކުރީ 4-0 ން ވިކްޓޯރިއާ ޕްލެޒެން ބަލިކޮށް, ފަސް މެޗުން 10 ޕޮއިންޓް ހޯދައިގެންނެވެ. މިގްރޫޕްގެ އެއްވަނަ ޔަޤީންކުރީ ބަޔާން މިއުނިކެވެ. އިންޓަރ މިލާންގެ ހަތަރު ލަނޑުގެ ތެރެއިން ދެ ލަނޑު ޖެހީ ބޮސްނިޔާ ފޯވާޑް އެޑިން ޖެކޯއެވެ. ފުރަތަމަ ލަނޑު ޖަހައިދިނީ މިކިތާރްޔަންއެވެ. ފަހު ލަނޑު މެޗު ނިމެން ތިން މިނެޓަށް ވެފައިވަނިކޮށް ޖެހީ ލުކަކޫއެވެ. ލުކަކޫ ކުޅެން ނުކުތީ އަނިޔާއަށްފަހު އެނބުރި އައިސް ބަދަލު ކުޅުންތެރިއެއްގެ ގޮތުގައެވެ.

ގްރޫޕް ސްޓޭޖްގެ ފަހު މެޗުގައި އިންޓަރ މިލާން ވާދަކުރަން ޖެހޭނީ އެއްވަނާގައި އޮތް ބަޔާން މިއުނިކާއެވެ. އެމެޗުގެ ނަތީޖާއަކުން ދެޓީމްގެ ވަނައަކަށް ބަދަލެއް ނާންނާނެއެވެ. ވިދިވިދިގެން ދެވަނަ އަހަރު ޗެމްޕިއަންސް ލީގު ގްރޫޕް ސްޓޭޖުން ކަޓާ, ޔޫރޮޕާ ލީގުގައި ވާދަކުރަން ޖެހޭނެކަން ޔަޤީންވިފަހުން ކުޅުނު މެޗުގައިވެސް ބާސެލޯނާ ވަނީ ބަޔާން މިއުނިކް އަތުން ބަލިވެފައެވެ. ބާސާއަށް ފަސް މެޗުން ލިބެނީ ހަތަރު ޕޮއިންޓެވެ.