ވެރިޔަކު ބަލިވެގެން އުޅުއްވާގޮތަށް ރައީސް ޔާމީން އުޅުއްވަމުން ގެންދަވާކަމަށް އެމްޑީޕީގެ ތައުލީމާއި ބެހޭ ކޮމެޓީގެ މުގައްރިރު  ޑރ.މުސްތަފާ ލުތުފީ ވިދާޅުވެއްޖެއެވެ.

ކުރީގެ އެޑިއުކޭޝަން މިނިސްޓަރުކަންވެސް ކުރައްވާފައިވާ އަދި އެންމެ ފަހުން އޮތް ރިޔާސީ އިންތިޚާބުގައި ރައީސް ނަޝީދުގެ ރަނިންމޭޓަކަށް ހުންނެވި ޑރ. މުސްތަފާ ވިދާޅުވީ ރައީސް ޔާމީން ހުންވީ ހަރުފަތްތަކުގެ ތިރީގައި ކަމަށާއި އީދު ބަންދަށްފަހު އަންނަ އަހަރުގެ ރިޔާސީ އިންތިޚާބުގައި ކެންޕެއިން ކުރެއްވިޔަސް އެމަނިކުފާނު ބަލިވާނެކަމަށެވެ. އެކަން ނިމިދިޔަ ކައުންސިލް އިންތިޚާބުން އެނގިއްޖެކަމަށާއި ރައީސް ޔާމީން ސިޔާސީ ސްޓޭޖްމަތީގައި މިހާރު "ތެޅިފޮޅެނީ" ކަމަށް ޑރ. މުސްތަފާ ވިދާޅުވިއެވެ.

ޑރ. މުސްތަފާ ވިދާޅުވީ ރައީސް މައުމޫނަކީ އަދިވެސް ޕީޕީއެމްގެ ރައީސްކަމަށް އޭނާ ގަބޫލުކުރައްވާކަމަށެވެ. ސަބަބަކީ ޕީޕީއެމް އުފެއްދެވީ މައުމޫނު ކަމަށް ވުމުން ކަމަށާއި އަދި ޕީޕީއެއްމްގެ ރައީސަކަށް އެމަނިކުފާނު އައްޔަން ކުރެއްވީ އެ ޕާޓީގެ މެމްބަރުންނަށް ވުމުން ކަމަށެވެ.

ޖަލަށްލާފައިވާ ކުރީގެ ނައިބު ރައީސް އަހުމަދު އަދީބަށް ބޭސްފަރުވާގެ ކަންކަން ލިބިދޭންޖެހޭނެކަމަށް ޑރ. މުސްތަފާ ވިދާޅުވިއެވެ. ޑރ. މުސްތަފާ ވިދާޅުވީ  އަދީބުގެ ބަލިހާލަތާއި މެދު ކަންބޮޑުވެ ވަޑައިގަންނަވާ ކަމަށާއި އަދީބަކީ ކިތަންމެ ބޮޑު ކުށެއް ކުރެއްވި ބޭފުޅެއް ކަމަށް ވިޔަސް ބޭސް ފަރުވާ ކުރެވެން ޖެހޭނެކަމަށެވެ. އަދީބުގެ ބޭސްފަރުވާއަށް ރާއްޖެއިން ބޭރަށް ނުފޮނުވަނީ ފިއްލަވާފާނެއަތީ ކަމަށް ސަރުކާރުން ބުނާއިރު ފިލައިގެން ނުދެވޭނެ ގޮތަކަށް ބޭސްފަރުވާގެ ކަންކަން އަދީބަށް ސަރުކާރުން ހަމަޖައްސައި ދެވެން ޖެހޭނެ ކަމަށް ޑރ. މުސްތަފާ ވިދާޅުވިއެވެ.

"އަދީބަށް ވަނީ ބޭރުން ފަރުވާކުރެވެން ޖެހޭ ވަރަށް ބޭސްފަރުވާ ކުރަން ޖެހިފައި. އެހެން ނަމަވެސް އެބުނަނީ އަދީބު ފިއްލަވަފާނެކަމަށް. އެއީ ތާކުންތާކު ޖެހޭ ވާހަކައެއް ނޫން. އަދީބަށް އެކަނި އެފުރުސަތު ނުދެއްވުން އެއީ ސުވާލު އުފެދޭ ކަމެއް.

އޭނާއަށް އެތަނެއްގައި ސިއްހީ މާހައުލުގައި ހުރެވޭނެ މާހައުލެއް ދައްކަން ޖެހޭ. އެހެން ކަމުން ސިޔާސީ މީހެއްގެ ހައިސިއްޔަތުން އެކަމަށް ވަރަށްބޮޑަށް ކަންބޮޑުވަން. އަދީބަށް ފިލައިގެން ނުދެވޭނެ ގޮތަށް ބޭސްފަރުވާގެ ކަންކަން ހަމަޖެއްސެވޭނެ" ޑރ. މުސްތަފާ ވިދާޅުވިއެވެ.