އެމްބާޕޭގެ އެއްބަސްވުމާ ގުޅުވައިގެން ފަތުރަނީ ދޮގު ވާހަކަތަކެއް: ޕީއެސްޖީ

ފްރާންސްގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)ގެ ތަރި ކީލިއަން އެމްބާޕޭގެ އެއްބަސްވުމާ ގުޅިވައިގެން ފަތުރަނީ ދޮގު ވާހަކަތަކެއް ކަމަށް އެ ކުލަބުން ބުނެފިއެވެ.

ޕީއެސްޖީ ދޫކޮށް އެމްބާޕޭ ރެއާލް މެޑްރިޑަށް ބަދަލުވާން އުޅޭކަމަށް ވާހަކަ ދެކެވެނިކޮށް އޭނާ ވަނީ ފަހު ވަގުތު ޕީއެސްޖީގައި މަޑުކޮށްފައެވެ. ޕީއެސްޖީގެ އެއްބަސްވުން 2025 ވަނަ އަހަރާ ހަމަ އަށް އެމްބާޕޭ އައު ކުރީ އޭނާ އަށް ބޮޑެތި ބާރުތަކެއް ލިބޭ ގޮތަށް ކަމަށް މީޑިއާތަކުގައި ބުނެފައިވެއެވެ. އަދި އައު އެއްބަސްވުމާއެކު އޭނާ އަށް ކުރިން ލިބޭ ވަރަށްވުރެ ބޮޑު މުސާރައެއް ލިބޭނެ ކަމަށް ވެސް ރިޕޯޓުތަކުގައިވެއެވެ.

ފްރާންސްގެ ބައެއް މީޑިއާތަކުގައި ބުނެފައިވާ ގޮތުން ޕީއެސްޖީގައި އެމްބާޕޭ އަށް ތިން އަހަރުން 630 މިލިއަން ޔޫރޯ ލިބޭނެއެވެ. އެއީ އެއްބަސްވުމުގައި އޭނާގެ މުސާރަ ބޮޑުކޮށްފައިވާ ގޮތުންނެވެ. އެއީ އަހަރަކު 210 މިލިއަން ޔޫރޯގެ އަދަދެކެވެ.

އެވާހަކަތައް ފެތުރެމުން ދިޔަ ވަގުތެއްގައި ޕީއެސްޖީން ވަނީ އެކަން ދޮގުކޮށްފައެވެ. ޕީއެސްޖީގެ ސްޓޭޓެމަންޓެއްގައި ބުނީ ފަތުރަމުން ދާ ވާހަކަތަކީ އެއްވެސް އަސްލެއް ނެތް ދޮގު ވާހަކަތަކެއް ކަމަށް އެ ކުލަބުން ޔަގީންކޮށްދޭ ކަމަށެވެ. އަދި އެ ވާހަތަކުގައި އެއްބަސްވުމުގައިވާ އެއްވެސް ކަމެއް ނެތް ކަމަށެވެ.

އައު އެއްބަސްވުމުގެ ދަށުން އެމްބާޕޭ މިފަހުން ކުލަބާމެދު ހިތްހަމަ ނުޖެހި ޖެނުއަރީ މަހު ކުލަބު ދޫކޮށްލަން އުޅޭ ވާހަކަތަކެއް ވެސް ފެތުރުނެވެ. ނަމަވެސް ޕީއެސްޖީގެ ސްޕޯޓިން ޑިރެކްޓަރު ލުއިސް ކަމްޕޯސް އެ ވާހަކަތައް ދޮގުކުރިއެވެ. އޭގެ ފަހުން އެމްބާޕޭ ވެސް ވަނީ ކުލަބު ދޫކޮށްލަން އޭނާ ނުޅޭ ކަމަށާއި، ކުލަބާމެދު ހިތްހަމަނުޖެހުމެއް ވެސް ނެތް ކަމަށެވެ.