އެމްބާޕޭ ބުނީ އޭނާގެ ފުރިހަމަ ކުޅުން ފެންނާނެ ކަމަށް
އޭނާގެ ގައިގައި އެ ޤާބިލުކަން ހުރިކަން ފާހަގަ ކުރަމުން އެމްބާޕޭ ބުނީ، ކުރިއަށް އޮތް 2025 ވަނަ އަހަރުގައި އޭނާގެ އެންމެ ފުރިހަމަ އަދި މޮޅު ކުޅުން ދައްކާނެ ކަމަށެވެ.
ރެއާލަށް ކުޅެމުން އަންނަ އެމްބާޕޭ
ކުރިއަށް އޮތް ތަނުގައި އޭނާގެ އެންމެ ފުރިހަމަ ކުޅުން ފެންނާނެ ކަމަށް، ރެއާލް މެޑްރިޑަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭ ބުނެފި އެވެ.
ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު ރެއާލަށް ބަދަލުވީ ފަހުން، އެ ޓީމުގައި އެމްބާޕޭގެ ފުރިހަމަ ކުޅުން ނުފެންނާތީ އޭނާ އަށް ފާޑު ކިޔުންތައް އަމާޒުވެ އެވެ. ޚާއްސަކޮށް ރެއާލްގައި އެމްބާޕޭ އަށް ގިނަ ލަނޑުތަކެއް ނުޖެހޭތީ އޭނާ އަށް އަމާޒުވަމުން އަންނަ ފާޑުކިޔުންތައް ވެސް ގިނަ އެވެ.
ރެއާލްގައި އޭނާގެ ކުޅުމާއި މުސްތަޤުބަލާ ގުޅޭ ގޮތުން ވާހަކަ ދައްކަމުން އެމްބާޕޭ ބުނީ، މިހާރު ދައްކަމުން އަންނަ ކުޅުމަށް ވުރެ މާ ރަނގަޅު ކުޅުމެއް އޭނާ އަށް ދެއްކޭނެ ކަމަށް ޤަބޫލު ކުރާ ކަމަށެވެ. އޭނާގެ ގައިގައި އެ ޤާބިލުކަން ހުރިކަން ފާހަގަ ކުރަމުން އެމްބާޕޭ ބުނީ، ކުރިއަށް އޮތް 2025 ވަނަ އަހަރުގައި އޭނާގެ އެންމެ ފުރިހަމަ އަދި މޮޅު ކުޅުން ދައްކާނެ ކަމަށެވެ.
ލީގުގައި ރެއާލް އިން އެތުލެޓިކޯ ބިލްބާއޯއާ ދެކޮޅަށް ކުޅުނު މެޗުގައި އެ ޓީމަށް ލިބުނު ޕެނަލްޓީ އެމްބާޕޭ ފޮނުވާލި ނަމަވެސް، އެ ޕެނަލްޓީ ވަނީ ނާކާމިޔާބުވެފަ އެވެ. އެކަމަށް އިޝާރާތް ކުރަމުން އެމްބާޕޭ ބުނީ، އެ މެޗުގައި އޭނާގެ އަތުން ޕެނަލްޓީ ނާކާމިޔާބުވީއިރު، ގިނަ ކަންތައްތަކެއް ރަނގަޅު ކުރަން ޖެހޭކަން އޭނާ އަށް އިޙުސާސް ކުރެވުނު ކަމަށެވެ. އަދި އޭނާ ހުރީ ރެއާލްގައި މޮޅު ކުޅުމެއް ދައްކައި، އެ ކުލަބާ އެކު ކުރިއަށް ދިޔުމުގެ އުންމީދުގައި ކަމަށް ވެސް އެމްބާޕޭ ވަނީ ބުނެފަ އެވެ.
ރެއާލަށް ބަދަލުވީ ފަހުން އެމްބާޕޭ ވަނީ މިހާތަނަށް އެ ކުލަބަށް ކުޅެދިން 24 މެޗުގައި 14 ލަނޑު ޖަހައިފަ އެވެ. އޭގެ ތެރެއިން 10 ލަނޑަކީ ސްޕެނިޝް ލީގުގައި އޭނާ ޖަހާފައިވާ ލަނޑުތަކެވެ. ރެއާލްގައި އެމްބާޕޭގެ އެންމެ ފުރިހަމަ ކުޅުން ނުފެނުމާއި، ލަނޑު ޖެހޭ އަދަދު މަދުވުމުން އޭނާ އަށް އަމާޒުވަމުން އަންނަ ފާޑު ކިޔުންތަކަށް ރެއާލްގެ ކޯޗު ކާލޯ އަންޗެލޮޓީ ވެސް އަންނަނީ ރައްދު ދެމުންނެވެ.
