އައު ސީޒަންގެ ޔުއެފާ ޗެމްޕިއަންސް ލީގުގައި ރެއާލް މެޑްރިޑް އިން ކުޅުނު ފުރަތަމަ މެޗުގައި، މާސޭ އަތުން ފަހަތުން އަރައި މޮޅުވެއްޖެ އެވެ.

ރެއާލްގެ އަމިއްލަ ދަނޑުގައި އަންގާރަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި މާސޭ އިން ލަނޑު ޖަހައި ކުރި ހޯދާފައި ވަނިކޮށް، ރެއާލް އިން ވަނީ ފަހަތުން އަރައި ދެ ލަނޑު ޖަހައިގެން މޮޅުވެފަ އެވެ.

މެޗު ފަށައިގެން 22 ވަނަ މިނެޓުގައި މާސޭ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޓިމޯތީ ވިއާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ މޭސަން ގްރީންވުޑް އެވެ.

ނަމަވެސް އޭގެ ހަތް މިނެޓު ފަހުން ރެއާލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެއީ މާސޭގެ އޭރިޔާ ތެރެއިން ރެއާލްގެ ރޮޑްރީގޯ އަށް ކުރި ފައުލަކާ ގުޅިގެން ލިބުނު ޕެނަލްޓީ ކާމިޔާބު ކޮށްގެން، ފްރާންސްގެ ކެޕްޓަން ކީލިއަން އެމްބާޕޭ ޖެހި ލަނޑުންނެވެ.

މެޗުގެ ދެ ވަނަ ހާފުގައި ރެއާލް އަށް އެންމެ ބޮޑު ގެއްލުމެއް ދެއްކީ އެ ޓީމުގެ ޑިފެންޑަރު ޑެނީ ކާވަހާލް އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ. އޭގެ ސަބަބުން މެޗުގެ ބާކީ ބައި ރެއާލް އިން ކުޅުނީ 10 ކުޅުންތެރިންނާ އެކު އެވެ.

މެޗުގެ ފަހު ދިހަ މިނެޓުގެ ތެރޭގައި ރެއާލް އިން ދެ ވަނަ ލަނޑެއް ޖަހައި ލީޑު ނެގީ ވެސް އެ ޓީމަށް ލިބުނު ޕެނަލްޓީ އިންނެވެ. އެެއީ މާސޭގެ އޭރިޔާ ތެރެއިން ރެއާލްގެ ވިނީޝިއުސް ޖޫނިއާ އަށް ކުރި ފައުލަކަށް ދިން ޕެނަލްޓީ އެކެވެ. އެ ޕެނަލްޓީ ކާމިޔާބުކޮަށް، ރެއާލް އަށް ލީޑު ނަގައިދިނީ ވެސް އެމްބާޕޭ އެވެ.

މެޗަށް ފަހު ވާހަކަ ދައްކަމުން ރެއާލްގެ ކޯޗު ޒަބީ އަލޮންސޯ ބުނެފައި ވަނީ، މެޗުގައި ރެއާލް އަށް ވަރަށް ގިނަ ފުރުސަތު ލިބުނު ކަމަށާއި، މެޗުގެ ފުރަތަމަ ހާފާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށެވެ. ޚާއްސަކޮށް ރެއާލްގެ ކުޅުންތެރިންގެ ފަރާތުން ފެނުނު ކުޅުމާ މެދު ވަރަށް ބޮޑަށް ގަޔާވާ ކަމަށް އޭނާ ބުންޏެވެ.

އަލޮންސޯ ބުނީ މާސޭ އިން ލަނޑު ޖަހައި ލީޑު ނަގާފައި އޮތުމުން، ރެއާލް އަށް ވަރަށް ބޮޑު ޕްރެޝަރެއް އޮތް ކަމަށާއި، ނަމަވެސް ކުޅުންތެރިން ރަނގަޅު މަސައްކަތެއް ކުރި ކަމަށެވެ. ޚާއްސަކޮށް އެއް ލަނޑުނބް ފަހަތުގައި އޮތްއިރު ވެސް، ރެއާލްގެ ކުޅުންތެރިންގެ ކުޅުމަށް ބަދަލަށް އައިސްފައި ނުވާ ކަމަށް އޭނާ ބުންޏެވެ.

ނަމަވެސް ދެ ވަނަ ހާފުގައި ރެއާލް އަށް އުނދަގޫ ތަކެއް ކުރިމަތިވި ކަމަށާއި، ޚާއްސަކޮށް އެއް ކުޅުންތެރިޔަކު މަދުކޮށް ކުޅެން ޖެހުމުން އެކަމުގެ އުނިކަން ފެނުނު ކަމަށް އަލޮންސޯ ބުންޏެވެ. އެހެން ނަމަވެސް، ކުޅުންތެރިންގެ ހިތްވަރަށް ބަދަލަށް ނައުމުގެ ނަތީޖާ އަކީ، ރެއާލް މެޗުން މޮޅުވުން ކަމަށް ފާހަގަކޮށް އަލޮންސޯ ބުނީ، މިވަގުތު ރެއާލް އޮތީ ރަނގަޅު މިސްރާބުގައި ކަމަށެވެ.

އަލޮންސޯގެ އިރުޝާދުގެ ދަށުން މި ސީޒަންގައި ރެއާލް އިން އަންނަނީ ރަނގަޅު ނަތީޖާ ތަކެއް ނެރެމުންނެވެ. ސްޕެނިޝް ލީގުގައި ވެސް ރެއާލް ކުޅެފައިވާ ހަތަރު މެޗުން މޮޅުވެފައިވާއިރު، ޗެމްޕިއަންސް ލީގުގެ ފެށުން ވެސް މި ވަނީ ރަނގަޅު ކޮށްފަ އެވެ.