ފަރުވާއަށް ގެންނައިރުވެސް ބުނާނެ އޭނަ ދެން ނުގެންނައްޗޭ. އޭނަ ތިތާ ބަހައްޓާށޭ. އޭނަ ނުވާނެއޭ ރަނގަޅެއް. މިކަން އެބަ ޖެހޭ ބަދަލުކުރަން. މުޖުތަމައުން އެ މީހުންނަށް ދިމާވަނީ ވަރަށް ހިތްދަތި ކަންކަން. އެ މީހުން އަނބުރާ މުޖުތަމައަށް ނުނެރެވޭ އެންމެ ބޮޑު އެއް ސަބަބަކީ އެއީ. އެ މީހުން ވަރަށް ބޮޑު މަރުހަލާއެއް ކަޑަތުކޮށްފަ އައިމަ ބަލައެއްނުގަނޭ. އެއީ ވަަރަށް ހިތްވަރު އެލޭ ކަމެއް.ޝަމާއު ޝަރީފް
މިއީ އެތައް ދުވަހެއްގެ މެދުކެނޑުމަށްފަހު ނޭޝަނަލް ޑްރަގް އެޖެންސީ (އެންޑީއޭ)އަށް އާ ސީއީއޯއެއް އައްޔަންކޮށް، އެ އިދާރާގެ މަސައްކަތްތައް އަލުން ފެށުމުގެ އަޒުމްގައި ހުންނެވި އެންޑީއޭގެ ޗެއަމަން ޝަމާއު ޝަރީފް ދާދިފަހުން ޕްރެސްއެއްގައި ދެއްކެވި ވާހަކަފުޅެވެ. ޝަމާއުގެ އެ ވާހަކަފުޅަކީ މަސްތުވާތަކެތީގެ ވަބާގައި ޖެހިފައިވާ އެތައް ބައެއްގެ އާދޭހެވެ. އެފަދަ އެތައް ބައެއްގެ ޝަކުވާއެވެ. އެފަދަ އެތައް ބައެއްގެ އުދާސްތަކެވެ.
ބުނެފާނެއެވެ. ތިނޫން ދުވަހެއް އާދޭ ހެއްޔެވެ؟ ތި ނޫން ވަރެއް ވޭ ހެއްޔެވެ؟ އަބަދު ފަރުވާ ގައެވެ. ދެންވެސް ރަނގަޅެއް ނުވާނެއެވެ. މިއީ ހައްތަހާވެސް މަސްތުވާތަކެތީގެ ވަބާއިން ސަލާމަތްވުމަށް ފަރުވާ ހޯދަން މަސައްކަތްކުރާ މީހުންނާއި ފަރުވާ ފުރިހަމަކޮށްފައިވާ މީހުންނަށް އަމާޒުކޮށް ދެކެވޭ ވާހަކަތަކެވެ. މަސްތުވާތަކެތި ބޭނުންކުރުމަކީ ސިއްހީ ބައްޔެއްކަމަށް ދެކި، އެ ބައްޔަށް އެކަށީގެންވާ ފަރުވާ ހޯދައިދިނުމަށް އެންޑީއޭގެ މިސްރާބު ބަދަލުކުރަން މަސައްކަތްކުރާއިރު، ފަރުވާއިން މީހުން ރަނގަޅުނުވުމުގައި ހުރި ސަބަބުތައް ބަލާއިރު، މުޖުތަމައެއްގެ ހައިސިއްޔަތުން އަޅުގަނޑުމެން ވަނީ ފެއިލްވެފައޭ ބުނުމަކީ ދޮގަކަށްނުވާނެއެވެ.
އަދިވެސް މިފަދަ ކަންކަމުގައި އަޅުގަނޑުމެންގެ ތެރެއިން ގިނަ ބަޔަކު ވިސްނަނީ ވަރަށް ތިލަކޮށެެވެ. އެފަދަ މީހުންނަކީ ދުވަހަކުވެސް ރަނގަޅުވާނެ ބައެއްކަމަށް ގަބޫލެއްނުކުރެއެވެ. ނޫނީ މަދު ދުވަސްކޮޅެއްގެ ތެރޭގައި ރަނގަޅުވާން ބޭނުންވާ މީހަކު ވިއްޔާ ރަނގަޅުވާނެއޭ ހީވާ މޭރުމަކުން ވާހަކަދެކެވެއެވެ. ރަނގަޅުވިޔަސް އެ މީހުންނަށް ދުވަހަކުވެސް އިތުބާރެއް ނުލިބެއެވެ. އަބަދުވެސް ބަލަނީ ތަފާތު ނަޒަރަކުންނެވެ. ޝައްކުގެ ނަޒަރަކުންނެވެ. އާއްމު ދިރިއުޅުމެއް އެ މީހުންނަކަށް ނުލިބެއެވެ.
ގިނަ މީހުން އެފަދަ މީހުންގެ ރަހުމަތްތެރިއަކަށް ވާކަށް ނޭދެއެވެ. ފަރުވާ ފުރިހަމަކޮށް ނުކުންނަ މީހަކާމެދު ޕޮޒިޓިވްކޮށް ދެކެވެނީ މަދު ފަހަރެއްގައެވެ. އެފަދަ މީހަކާ ޒަވާޖީގޮތުން ގުޅޭކަށް އާއިލާއާއި ރަހުމަތްތެރިން ގަބޫލެއްނޫނެވެ. އެ މީހުން ފަރުވާ ފުރިހަަމަކޮށް މުޖުތަމައަށް ނުކުތްކަމުގައި ވީނަމަވެސް، އެ މީހުންނާމެދު އަބަދުވެސް ބަލަނީ ނުރުހުމުގެ ލޮލަކުންނެވެ. ނަތީޖާއަކީ ފަރުވާ ފުރިހަމަކޮށްގެން ނުކުންނަ މީހާއަށް އޯގާތެރިކަމުގެ އަތެއް ދިއްކޮށްލާނެ މީހަކު ނުހުރުމެވެ. މަސްތުވާތަކެތި ބޭނުންކުރާ މީހާއަކީ ނަފްސާނީ އަދި އެނޫނަސް ގެވެށި މާހައުލުން ދިމާވާ އެތައް ކަމެއް ތަހައްމަލުކުރާ މީހަކަށް ވާއިރު، އެ ކަންކަމުން އަރައިގަންނަން އޭނާއަށް އެހީތެރިވެދޭނެ އެކަކުވެސް ނުހުރެއެވެ.
އަދި އެފަދަ ހާލަތްތަކުގައި އޭނާއާމެދު ކެތްތެރިކަން އިސްކޮށް އޯގާތެރިކަން ދެއްކުމުގެ ބަދަލުގައި އަބަދުވެސް އިވެނީ މާޔޫސްވާ ވާހަކައެވެ. ހަގީގަތަކީ، ފަރުވާއަކީ ވަރަށް އުނދަގޫ މަރުހަލާއެކެވެ. އަދި ބައެއް ފަހަރު ތަކުރާރުކޮށް މަސައްކަތްކޮށްގެން ނޫނީ އެކަމުން އަރައިގަނެވޭކަށް ނެތެވެ. އެހެން ބަލިތަކެކޭ އެއްފަދައިން މިއީވެސް ކޮންމެ މީހަކަށް ތަފާތު މަރުހަލާއެކެވެ. އެކި މީހުން ރަނގަޅުވާން ނަގާ ވަގުތާއި ރަނގަޅުވާން ބޭނުންވާ އެއްބާރުލުމާއި އެހީވެސް ތަފާތެވެ. މިއީ މަސްތުވާތަކެތި ބޭނުންކުރާ މީހާއެކޭ އެއްފަދައިން އޭނާގެ ވަށައިގެންވާ މީހުންގެ ޒިންމާ ބޮޑު މަރުހަލާއެކެވެ. އެ މީހާ އަނބުރާ މުޖުތަމައަށް ގެނައުމުގައި މި މުޖުތަމައުގެ ދައުރު ވަރަށް ބޮޑެވެ.
