ސޯމާލިއާގައި ކޮންމެ މިނެޓަކުން ކުއްޖަކު އެޑްމިޓް ކުރަނީ!

އިންތިހާ ހަނަފަސްކަން ދިގުލާ ގޮސް، ފާއިތުވީ ބައި ޤަރުނުގެ ތެރޭގައި ނުފެންނަ މިންވަރަށް ކުޑަކުދިންގެ މަރުގެ ކޭސްތައް އިތުރުވުމުގެ ނުރައްކާ ބޮޑުވެފައި ވާ ސޯމިލިއާގައި، ހަށިގަނޑަށް ބޭނުންވާ މުހިންމު މާއްދާތައް ނުލިބުން ނުވަތަ މެލްނިއުޓްރިޝަންގެ ސަބަބުން ކޮންމެ މިނެޓަކު ކުއްޖަކު، ސިއްހީ އިތުރު ފަރުވާ ދިނުމަށް އެޑްމިޓް ކުރަމުން ދާ ކަމަށް ކުޑަކުދިންނާ ބެހޭ އދގެ ޖަމިއްޔާ، ޔުނިސެފްގެ ތަރުޖަމާނަކު ވިދާޅުވެއްޖެއެވެ.

ސުވިޓްޒަލަންޑްގެ ޖެނީވާގައި ކުރިއަށްދިޔަ ބްރީފިންގްއެއްގައި މައުލޫމާތު ދެއްވަމުން، ޔުނިސެފްގެ ތަރުޖަމާނު ޖޭމްސް އެލްޑަރ ވިދާޅުވީ، ކޮންމެ ދުވަހެއްގެ ކޮންމެ މިނެޓަކުވެސް، ހެލްތު ފެސިލިޓީއެއްގައި ކުޑަކުއްޖަކު އެޑްމިޓް ކުރަން ޖެހޭ ކަމަށެވެ.

މައިންގެ ވާހަކަތަކުން އިވުނީ ހަމަ އެ އަޑެވެ.

އެލްޑަރ ވިދާޅުވީ، ސޯމާލިއާގެ އަދުގެ ހާލަތު އޮތީ 2011 ވަނަ އަހަރަށްވުރެ ވުރެސް ގޯސްކޮށް ކަމަށެވެ. 2011 ވަނަ އަހަރު ކުރިމަތިވި ބަނޑުހައިހޫނު ކަމުގެ ކާރިޘާގައި 250000 އަށް ވުރެ ގިނަ މީހުންގެ ފުރާނަ ވަނީ ގެއްލިފައެވެ.

ފާއިތުވީ ދުވަސްތަކަށް ބަލާއިރު، ވިއްސާރަ ކުރަން އޮތް 4 މޫސުންވެސް ވަނީ ފެއިލްވެފައެވެ. މިއަދު ސޯމާލިއާއަށް ތަޖުރިބާ ކުރަން ޖެހިފައި ވަނީ، ފާއިތުވީ 40 އަހަރު ދުވަހުގެ ތެރޭގައިވެސް ކުރިމަތިވެފައިވާ އެންމެ ގެއްލުން ދެނިވި ހަނަފަސްކަމާއެވެ. އަލްޝަބާބް ހަނގުރާމަވެރި ޖަމާޢަތުގެ ސިލްސިލާ ހަމަލާތަކާއި، ދުނިޔޭގެ ބާޒާރުގައި ކާބޯތަކެތީގެ އަގުތައް އުފުލެމުން ދިއުމުގެ ސަބަބުން ހާލަތު އިތުރަށް ވަނީ ގޯހެވެ. ކުޑަކުދިންގެ ޑޮކްޓަރުންގެ މެދުގައިވެސް އުފެދިފައިވަނީ މާޔޫސްކަމެވެ.

މިދިޔަ ސެޕްޓެމްބަރު މަހު އދއިން ވަނީ، ސޯމާލިއާގެ 2 ޑިސްޓްރިކްޓްއެއް، އޮކްޓޯބަރު މަހާއި ޑިސެމްބަރު މަހާ ދެމެދު ބަނޑަށް ޖެހޭނެ ކަމަށް އިންޒާރު ކޮށްފައެވެ. އަދި ސޯމާލިއާގެ ކުޑަކުދިންގެ އާބާދީއަށް ބަލާއިރު، ބައި މިލިއަނެއްހާ ކުދިން، މެލްނިއުޓްރިޝަންގެ ތަކުލިފުތަކާއެކު މި ދުނިޔެއާ ވަކިވެދާނެ ކަމުގެ ނުރައްކާ އެބަ އޮތް ކަމަށްވެސް އދއިން ވަނީ އިންޒާރު ކޮށްފައެވެ.