އައްޑޫ ސިޓީ މަރަދޫ-ފޭދޫ ބަނދަރު ހެދުމުގެ މަޝްރޫޢު އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ)ން ދޫކޮށްފައިވާ ލިޔުމާއި ޚިލާފަށް އީޕީއޭގެ ހުއްދަނެތި މަސައްކަތްކޮށްފައިވާތީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ 120،000 ރުފިޔާއިން ޖޫރިމަނާކޮށްފިއެވެ.

އެކަމާއި ގުޅިގެން އީޕީއޭއިން ބުނީ މަރަދޫ ފޭދޫ ބަނދަރު ހެދުމުގެ މަޝްރޫޢުގެ މަސައްކަތަށް 2019 ވަނަ އަހަރުގެ ސެޕްޓެމްބަރު 10 ގައި ދޫކޮށްފައިވާ "ތިމާވެށީގެ ގޮތުން ނިންމި ލިޔުމާއި" ޚިލާފަށް އީޕީއޭގެ ހުއްދަނެތި ޕްލޭނިންގ މިނިސްޓްރީން މަސައްކަތްކޮށްފައިވާތީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދުގެ 2012 ގެ 20 ވަނަ މާއްދާގެ ހ ގެ 1 ވަނަ ނަންބަރަށް ރިޢާޔަތްކޮށް ޖަދުވަލު ޖ ގެ ދަށުން ކުށްތަކުރާރުކުރި ތިން ވަނަ ފަހަރަށް ކަނޑައަޅާފައިވާ 120،000 ރުފިޔާއިން ޕްލޭނިންގ މިނިސްޓްރީ ޖޫރިމަނާކުރާކަމަށެވެ.

އަދި މިފައިސާ އޮކްޓޯބަރު 17 ވަނަ ދުވަހުން ފެށިގެން ސަރުކާރު ބަންދު ދުވަސްތައް ހިމަނައިގެން 30 ދުވަސްތެރޭގައި އީޕީއޭއަށް ދެއްކުމަށް ޕްލޭނިންގ މިނިސްޓްރީއަށް އަންގާފައިވާކަމަށެވެ.

މީގެއިތުރުން އީޕީއޭގެ ހުއްދައަކާ ނުލާ ކުރެވިފައިވާ މަސައްކަތްތަކާއި މިހާރު ރަށުގެ ތިމާވެށީގެ ހާލަތު އީއައިއޭ ކޮންސަލްޓެންޓެއް މެދުވެރިކޮށް ވަޒަންކުރުމަށްފަހު 17 އޮކްޓޯބަރުން ފެށިގެން ސަރުކާރު ބަންދު ދުވަސްތައް ހިމަނައިގެން 60 ދުވަސް ތެރޭގައި އީޕީއޭއަށް އެންވަޔަރަމަންޓަލް އޮޑިޓް ރިޕޯޓް ހުށަހެޅުމަށް ވަނީ އަންގާފައެވެ.

އަދި މިހާރު ކުރެވިފައިވާ މަސައްކަތްތައް އީއައިއޭ މޮނިޓަރިންގ ޕްލޭންގައި ހިމަނާ އަދި އެ މޮނިޓަރިންގ ޕްލޭން އިސްލާހުކޮށް އައު މޮނިޓަރިންގ ޕްލޭނެއް ހުށަހަޅާނެކަމުގެ ލިޔުމެއް 17 އޮކްޓޯބަރުން ފެށިގެން ސަރުކާރު ބަންދު ދުވަސްތައް ހިމަނައިގެން އީޕީއޭއަށް ހުށަހެޅުމަށް ޕްލޭނިންގ މިނިސްޓްރީއަށް އަންގާފައިވާކަމަށް އީޕީއޭއިން ބުނެއެވެ.