ގަވާއިދާ ހިލާފަށް ވިޔަފާރިވެރިޔާ ގާސިމް މާމިގިލީން ގިނަ އަދަދެއްގެ ރުށް ބޭރު ކުރާ މައްސަލަ ބޮޑުވެއްޖެ

އދ. މާމިގިލީން ގިނަ އަދަދެއްގެ ރުށް ބޭރު ކުރާ މައްސަލަ ބޮޑުވެއްޖެ އެވެ.

ރާއްޖެއެމްވީއަށް މާމިގިލީ ކައުންސިލުން ބުނީ ވިލާ ފައުންޑޭޝަންގެ ޗެއާމަން އަދި މާމިގިލި ދާއިރާގެ މެންބަރު ގާސިމް އިބްރާހިމްގެ އެހީތެރިކަމާ އެކު ފުލުހުންގެ މަރުކަޒެއް ބިނާ ކުރުމަށް ބިމެއް ހަވާލުކޮށްފައިވާ ކަމަށާއި، އެސަރަހައްދުގައި ހުރި ގިނަ އަދަދެއްގެ ރުށްތައް ނަގައި ރަށުން ބޭރު ކުރަމުންދާ ކަމަށެވެ.

ނަމަވެސް ރުށް އެހެން ބޭރު ނުކުރެވޭނެ ކަމަށާއި، އެ ބިމުގައި ހުރި ރުށްތައް ގެންދަން ޖެހޭނީ ރަށުގެ އެހެން ދިމާލަކަށް ކަމަށް ކައުންސިލުން ބުނެއެވެ. އަދި ގާނޫނުން ވެސް އެގޮތަށް އަމަލު ކުރުމަށް ޖާގަ ނުދޭނެ ކަމަށާއި، 10 ރުށަކަށް ވުރެ ގިނަ ރުށްތައް ގެންދާނަމަ، އީއައިއޭ ހަދަންޖެހޭއިރު، އެމަސައްކަތް ކޮށްފައިނުވާ ކަމަށެވެ. އަދި މި ކަމުގައި ކައުންސިލްއާ ވެސް އެއްވެސް މަޝްވަރާއެއް ކޮށްފައިނުވާ ކަމަށް ކައުންސިލުން ބުނެއެވެ.

މިމައްސަލައާ ގުޅިގެން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހީމް ނައީމް ވިދާޅުވީ މާމިގިލީން ރުށް ގެންދާ މައްސަލަ ސަމާލު ކަމަށް އައިސްފައިވާ ކަމަށާއި، ބަލަންޖެހޭ ކަންކަން ބަލަމުންދާ ކަމަށެވެ.

މެންބަރު ގާސިމްގެ އެހީތެރިކަމާ އެކު މާމިގިލީގައި ފުލުހުންގެ މަރުކަޒެއް ބިނާ ކުރުމަށް ބިންގާ އަޅާފައިވަނީ 10 އޭޕްރީލް 2025 ގައެވެ.