ކުޅުންތެރިންގެ އެދުމަކީ ސަޕޯޓަރުން ވަދެ އެކުވެނި ފުރާލުން

މާދަމާ ފަށާ މޯލްޑިވްސް އިންޓަރނޭޝަނަލް ބެޑްމިންޓަން ޗެލެންޖުގައި ދިވެހި ކުޅުންތެރިންނަށް ސަޕޯޓުކުރުމަށް ވީހާވެސް ގިނަ ދިވެހި ރައްޔިތުން އެކުވެންޏަށް ދިއުމަށް ކުޅުންތެރިން އެދިއްޖެއެވެ.

މުބާރާތާއި ގުޅޭ ގޮތުން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ރާއްޖޭގެ ކާމިޔާބު ބެޑްމިންޓަން ކުޅުންތެރިޔާ އައިމިނަތު ނަބީހާ (ނަބީ) ވަނީ ރާއްޖެ ކުޅޭ މެޗުތަކަށް ވީހާވެސް ގިނަ ސަޕޯޓަރުން ވަދެ އެކުވެނި ފުރާލުމަށް އެދިފައެވެ.

ނަބީ ބުނީ މިފަހަރުގެ މުބާރާތުގައި ޓީމުގެ އަމާޒަކީ ގިނަ މެޑަލްތަކެއް ހޯދުން ކަމަށެވެ. އަދި މި އަމާޒަށް ވާސިލްވުމުގައި ދިވެހި ސަޕޯޓަރުންގެ އެހީތެރިކަން ވަރަށް ބޮޑަށް ބޭނުންވާކަން ނަބީ ފާހަގަކުރިއެވެ.

ސަޕޯޓަރުންގެ ފަރާތުން ލިބޭ ހިތްވަރަކީ ވަކިން ޚާއްސަކޮށް ޖޫނިއަރ ޓީމުގެ ކުދިންނަށް ވަރަށް މުހިންމު ހިތްވަރެއްގެ ގޮތުގައި ނަބީ ފާހަގަކުރިއެވެ.

ނަބީގެ އިތުރުން ޤައުމީ ޓީމުގެ ނިބާލް އަޙުމަދުވެސް ވަނީ ގިނަ ސަޕޯޓަރުންތަކެއް ހިތްވަރު ދިނުމަށް އެކުވެންޏަށް ދިއުމަށް އެދިފައެވެ. އަދި އެންމެ ފަހުން މި މުބާރާތް އޮތީ 2019 ވަނަ އަހަރުކަން ފާހަގަކޮށް ނިބާލް ބުނީ ކޮވިޑްގެ ދަތި ހާލަތަށްފަހު އަލުން މުބާރާތް ބޭއްވުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށެވެ.

ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު ވިދާޅުވީ މި މުބާރާތުގެ ސަބަބުން ރާއްޖޭގެ ކުޅުންތެރިންނަށް ގިނަ ފައިދާތަކެއް ކުރާނެ ކަމަށެވެ. އެގޮތުން ބޭރުގެ ކުޅުންތެރިނާއެކު މެޗުތަކެއް ކުޅެ ތަޖުރިބާ ހޯދުމުގެ އިތުރުން، ރާއްޖޭގައި ބެޑްމިންޓަންގެ ފޯރި އިތުވުމަކީވެސް މިމުބާރާތާއެކު ކާމިޔާބުކުރެވޭނެ ލަނޑުދަނޑިތަކެއްގެ ގޮތުގައި މޫސަ ފާހަގަކުރިއެވެ. އަދި ހަމައެކަނި މުބާރާތުގައި ބައިވެރިވެ ތަޖުރިބާތަކެއް ހޯދުމުގެ ބަދަލުގައި ރަނގަޅު ނަތީޖާތަކެއް ނެރުމަށް ޓީމު އަމާޒުހިފާފައިވާކަމަށް މޫސަ ވިދާޅުވިއެވެ.

މުބާރާތް ފަށާނީ މާދަމާ ހެނދުނު 10:00 ގައެވެ. މި މުބާރާތުގައި ރާއްޖޭގެ 30 ކުޅުންތެރިން ވާދަކުރާނެއެވެ. މުބާރާތް ކުރިއަށްދާނީ މި މަހުގެ 23 ވަނަ ދުވަހުގެ ނިޔަލަށެވެ.