ބެޑްމިންޓަން ވާރލްޑް ފެޑެރޭޝަން (ބީޑަބްލިއުއެފް) އިން ރާއްޖޭގެ ބެޑްމިންޓަން އެސޯސިއޭޝަން ސަސްޕެންޑު ކޮށްފި އެވެ.

ދުނިޔޭގެ ބެޑްމިންޓަން ޖަމިއްޔާ އިން، ރާއްޖޭގެ ބެޑްމިންޓަން އެސޯސިއޭޝަން ސަސްޕެންޑު ކުރުމަށް ނިންމައި، އެކަން ވަނީ މޯލްޑިވްސް އޮލިމްޕިކް ކޮމެޓީ (އެމްއޯސީ) އަށް އަންގައިފަ އެވެ. އަދި އެމްއޯސީ އިން މިހާރު ވަނީ އެކަން މީޑިއާތަކާ ވެސް ހިއްސާ ކޮށްފަ އެވެ.

ދާދި ފަހުން އެމްއޯސީ އަދި ކޮމިޝަނަރ އޮފް ސްޕޯޓްސް އިން ވަނީ ބެޑްމިންޓަން އެސޯސިއޭޝަންގެ ކަންކަން ކުރިއަށް ގެންދިޔުމަށް އެޑް ހޮކް ކޮމެޓީއެއް ނަގައިފަ އެވެ. ތިން މެމްބަރުންގެ މައްޗަށް އެކުލެވޭ އެ ކޮމެޓީ ނެގީ، ބެޑްމިންޓަން އެސޯސިއޭޝަން އަށް ދީފައިވާ ޤައުމީ ޙައިސިއްޔަތު ވެސް ނެގުމަށް ފަހު އެވެ.

ދުނިޔޭގެ ބެޑްމިންޓަން ޖަމިއްޔާ އިން، ބެޑްމިންޓަން އެސޯސިއޭޝަން އޮފް މޯލްޑިވްސް ސަސްޕެންޑު ކުރީ އެ އެސޯސިއޭޝަން އަށް ތިން ވަނަ ފަރާތެއްގެ ނުފޫޒު ފޯރާފައިވާ ކަމަށް ބުނެ އެވެ.

ބެޑްމިންޓަން އެސޯސިއޭޝަންގެ ހިންގާ ކޮމެޓީގެ މުއްދަތު ހަމަވެފައިވާއިރު، އޭގެ ފަހުން އެއް އަހަރުވީ އިރު ވެސް އައު ހިންގާ ކޮމެޓީއެއް އިންތިޚާބު ކުރެވިފައި ނުވެ އެވެ. އަދި އެ އެސޯސިއޭޝަންގެ ހިންގާ ގަވާއިދަށް ގެންނަން ޖެހޭ ބަދަލުތައް ވެސް އޮތީ ނުގެނެވި އެވެ. އެހެންކަމުން އެޑް ހޮކް ކޮމެޓީއެއް އެކުލަވާލީ އެ ކަންކަން ފުރިހަމަ ކުރުމަށެވެ.

ބެޑްމިންޓަން އެސޯސިއޭޝަންގެ ކަންކަން ހަމަ މަގަށް އެޅުވުމަށްޓަކައި، ބީޑަބްލިއުއެފް އިން މީގެ ކުރިން އިރުޝާދު ދީފައި ވަނީ ތިން މެމްބަރުންގެ ކޮމެޓީއެއް ނެގުމަށެވެ. އެމްއޯސީ އަދި ސްޕޯޓްސް ކޮމިޝަނަރު ވަނީ އެ ކޮމެޓީގައި ބެޑްމިންޓަން ކޮމިއުނިޓީގެ މެމްބަރެއްގެ އިތުރުން، ޤާނޫނީ ދާއިރާގެ ބޭފުޅަކު ހިމެނުމަށް ލަފާ ދީފަ އެވެ. ނަމަވެސް އެކަމަށް އޮތީ ވަކި ގޮތެއް ނުނިމި އެވެ.

އެކަމުގައި ކޮމިޝަނަރ އޮފް ސްޕޯޓްސް އިން ވަނީ ބީޑަބްލިއުއެފްގެ ބަހެއް ހޯދުމަށް މަސައްކަތް ކޮށްފަ އެވެ. ނަމަވެސް އެކަން ދިގުލައިގެން ދާން ފެށުމުން، ކުރެވުނު މަޝްވަރާތަކަށް ފަހު ވަނީ އެޑް ހޮކް ކޮމެޓީއެއް އެކުލަވާލަން ނިންމައި، އެ ކޮމެޓީ އެކުލަވާލައިފަ އެވެ.