މަނިކުފާނެވެ! "ޔޯގާ" ވެސް މައްސަލައަކަަށް ވަނީ މަނިކުފާނު ރުހިވަޑައިނުގަންނަވާ ހިސާބުންތޯއެވެ؟

މަނިކުފާނެވެ! ދައްކަން މިއުޅެނީ ލައްކަ ނުދައްކާނަމޭ ހިތުލައިގެން ހުރި ވާހަކައެކެވެ. އެހެނަސް ދީނީ ކަންކަމުގެ ވާހަކަ "ޖަޒުބާތުގައި" ދެއްކެވުމާއި, ސިޔާސީ މަންފާއަށް ދީނުގެ ވާހަކަ ދެއްކުމުގެ ވާހަކައަކީ މަނިކުފާނަށްވެސް ނިކަން ޝައުގުވެރި ވާހަކައަކަށް ވީމައި މި ވާހަކަ ނުދައްކާ ހަމަ ނުހުރެވުނީއެވެ. ދުވަސްކޮޅަކު ސިޔާސީ ޕޯޑިއަމާ ދުރުގައި ހުންނެވުމަށްފަހު މި އަހަރު މަނިކުފާނު ސިޔާސީ ޕޯޑިއަމްތަކަށް ކުރައްވާ ޒިޔާރަތްތައް އިތުރުކުރައްވައިފީމުއެވެ. ޕޯޑިއަމްތަކުގައި މަނިކުފާނު ދައްކަވާ ކުލަ ސިޔާސަ ސިޔާސީ ވާހަކަފުޅުތަކުގެ ރާގުވެސް އެހާމެ ފޯރިގަދައެވެ. ފަހަރުގައި އެއީ އަންނަން އޮތް އިންތިޚާބުގެ ވައިރޯޅި ކަމަށްވެސް ވެދާނެއެވެ. އެކަމަކު އެވާހަކަ އެހެން ދުވަހަކަށް ބާއްވާނަމެވެ.

މީސްމީޑިއާގެ ޕްލެޓްފޯމްތައް ހާވަނިކޮށް އިހަކަށް ދުވަހު އަޅުގަނޑަށް ފެންނަނީ މަނިކުފާނުގެ ޝަކުވާތަކުގެ ވާހަކައެވެ. އުނހު! ތެދަށް ދަންނަވަނީނަމަ އުދާސްތަކުގެ ވާހަކައެވެ. މަނިކުފާނުގެ ޝަކުވާއަކަށްވީ ޝޭޚުންނާއި ދީނީ މީހުން، ސަރުކާރުން ކުރާ ނޭދެވޭ ކަންކަމަށް ބަސް ނުބުނާކަމުގެ ވާހަކައެވެ. ލާދީނީކަމުގެ ވާހަކައެވެ. އެވެނި މިވެނި ކަމެއް ދީނާ ޚިލާފަށް ކުރާއިރު، ކަހާ ތަން ހިރުވާވެސް ނުލާ ވާހަކައެވެ. މި ވާހަކައިގެ މިސާލުތައް ޖައްސަވަމުންގޮސް މަނިކުފާނު ޔޯގާގެ ވާހަކަދެއްކެވި ހިސާބުން ހަމަ އަޖައިބު ހައިރާންވެއްޖެއެވެ.

މަނިކުފާނު ފަހަރެއްގައި ހަނދުމަފުޅު ނުހުރެދާނެތީ ހަނދުމަފުޅުކޮށްއަރުވަމެވެ. "މާތް ކަލާކޯ، މިއީ ޓެރަރިޒަމްގެ އަމަލެއްތޯ؟ ރާއްޖޭގައި ފާހިޝް ކަންތައް ހިނގާނަމަ، ދީނަށް ފުރައްސާރަ ކުރާނަމަ ކޮންމެވެސް ބަޔަކު ތެދުވާނެ" ކަމަށް މަނިކުފާނު ވިދާޅުވީމެވެ. މަނިކުފާނެވެ. މަނިކުފާނުގެ ވެރިކަމުގައި ޔޯގާ ދުވަސް ފާހަގަކުރިއިރު އެކަން ކުރީ މަނިކުފާނަށް ރޭކާލުމަކާނުލައި ތޯއެވެ؟ ކޮންމެ ފަހަރަކު ސަރުކާރުގެ އިސް ވެރިންގެ ހާޒިރުގައި އެ ދުވަސް ފާހަގަކުރިއިރު ތިޔަ ވިދާޅުވާ "ފާހިޝް" ކަންކަމުގެ ތެރޭގައި އޭރު ޔޯގާ ނުހިމެނެނީތޯއެވެ.

ޔޯގާއާއި އޭގެ ދީނީ ހުކުމާމެދު ލައްކަ ބޭފުޅުން ބަހުސްކުރައްވައިފިއެވެ. އެ ބަހުސް އެކަމުގެ މާހިރުންނަށް ދޫކޮށްލާނަމެވެ. އެހެންނަމަވެސް އަޅުގަނޑަށް ސުވާލު އުފެދެނީ މަނިކުފާނު މި ވާހަކަ ދެއްކެވި މަގުސަދާމެދުގައެވެ. ސަބަބެއްވެސް ނެތިއެއް ނޫނެވެ. ކޮންމެ އަހަރެއްގެ ޖޫން އެކާވީސްވަނަ ދުވަހު، ބައިނަލްއަގުވާމީ ގޮތުން ފާހަގަކުރާ ޔޯގާ ދުވަސް ރާއްޖޭގައި ފާހަގަކުރުމަށް، އިންޑިއާ ހައި ކޮމިޝަނާއި އިންޑިއަން ކަލްޗަރަލް ސެންޓަރ (އައިސީސީ)ން ގުޅިގެން ޚާއްސަ ހަރަކާތްތަކެއް ކުރިއަށް ގެންދަން ނިންމީވެސް މަނިކުފާނުގެ ސަރުކާރުގައި ނޫންތޯއެވެ؟ ހަނދުމަފުޅު ނެތިއްޔާ އަހަރު ހަނދުމަފުޅުކޮށްއަރުވަމެވެ؟ އެއީ 2016 ވަނަ އަހަރެވެ. އެކަމަކު އެއީ ފުރަތަމަ ފަހަރެއް ނޫނެވެ. އެއީ 2014ން ފެށިގެން ރާއްޖޭގައި ފާހަގަކުރަމުން އަންނަ ދުވަހެއް ކަމަށާއި، ރައީސް ޔާމީންގެ ސަރުކާރުގައިވެސް ޔޯގާ ދުވަސް ހާމަކަން ބޮޑު ގޮތެއްގައި ފާހަގަކޮށްފައިވާއިރު، ފަހަރެއްގައިވެސް މަނިކުފާނަށް އެކަން ސިއްރުވެ ވަންހަނާވެފައި ނޯންނާނެކަން ގައިމެވެ.

އަހަރުތައް ބުނެދޭން މިޖެހުނީ މިފަދަ ކަންކަމުގައި މަނިކުފާނުގެ ހަނދުމަފުޅުން ބައެއް ކަންކަން ކައްސާލާކަމަށް ފާހަގަވާތީއެވެ. މުޒާހަރާކުރަން ތަންތަނަށް އެއްވަންޏާ ހައްޖަށް ދާށޭ" ވިދާޅުވި ހަނދުމަފުޅެއްވެސް ނެތެއް ނޫންތޯއެވެ.

ކޮންމެއަކަސް ސަރުކާރުގައި ޔޯގާ ދުވަސް ކުލަގަދަކޮށް، އަދި ހާމަކަން ބޮޑު ގޮތެއްގައި ފާހަގަކުރިއިރު، އެކަން ހުއްޓުވަން ނޫޅެ، މިހާރު އެކަމާ ދެކޮޅަށް ނުކުމެ ހަމަނުޖެހުން ހިންގުމުގައި މަނިކުފާނުގެ ޕާޓީ ކުދިންކޮޅު އުޅެނީ މަނިކުފާނު ވިދާޅުވާ ފަދަ "ހޭޓް ސްޕީޗް"ތަކުގެ ސަބަބުން ކަމަށް ވެދާނެތޯއެވެ. ނޫނީ ޔޯގާވެސް ކަމުނުދަނީ މަނިކުފާނުގެ ވިރާސަތުން ބޭރުގައި އެކަން ހިނގީމައިތޯއެވެ؟ ނޫނީ އެ ވާހަކަ ދައްކަނީ މަނިކުފާނު ވިދާޅުވާފަދަ ސިޔާސީ މަންފާ ހޯދާ ބަޔަކު ލޭކައްކައި އިތުރު ބަޔަކު ޖަޒުބާތުގައި ޖެއްސުމަށްތޯއެވެ؟ މަނިކުފާނެވެ! "ޔޯގާ"ވެސް މައްސަލައަކަަށް ވަނީ މަނިކުފާނު ރުހިވަޑައިނުގަންނަވާ ހިސާބުންތޯއެވެ؟