ބާސެލޯނާއިން ތަށި ކާމިޔާބުކުރަން ބޭނުންވާނަމަ މެންޓާލިޓީ ބަދަލުކުރަން ޖެހޭ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފިއެވެ.
ޒަވީ މިހެން ބުނީ ސްޕެނިޝް ލީގުގައި ޗެމްޕިއަން ރެއާލް މެޑްރިޑް އަތުން ބަލިވި މެޗަށްފަހު ވާހަކަ ދައްކަމުންނެވެ. އެ މެޗުން މޮޅުވެ ބާސެލޯނާ އަށް އެއް ވަނަ މަގާމު ހޯދެން އޮތް ނަމަވެސް، މެޗުން ބަލިވެ މިހާރު އޮތީ ދެ ވަނައިގައެވެ. ބާސެލޯނާ ބަލިކޮށް ރެއާލުން ވަނީ އެއް ވަނައިގައި ތިން ޕޮއިންޓުގެ ލީޑެއް ހޯދާފައެވެ.
މެޗަށްފަހު ޒަވީ ބުނީ ރެއާލާ ދެކޮޅަށް ކުޅުނު މެޗުން ބަލިވުމަކީ ބާސެލޯނާ އަށް ހައްގު މިންވަރު ނޫން ކަމަށެވެ. އޭނާ ބުނީ މެޗުގެ ފުރަތަމަ ހާފުގައި ބާސެލޯނާ އިން ކުޅުނީ ރަނގަޅަށް ކަމަށާއި، ނަމަވެސް ދެ ވަނަ ހާފުން ފެށިގެން މެޗުން ކޮންޓްރޯލްކޮށްގެން ކުޅުނީ ރެއާލުން ކަމަށެވެ. ނަމަވެސް ދެ ވަނަ ހާފުގައި ގެނެވުނު ބަދަލުތަކާއެކު ބާސެލޯނާ އަށް ރަނގަޅަށް ކުޅެވުނު ކަމަށް ޒަވީ ބުންޏެވެ. އެކަން ފާހަގަކޮށް ޒަވީ ބުނީ މެންޓާލިޓި ވެސް ބަދަލު އަންނަން ޖެހޭނެ ކަމަށެވެ. ސަބަބަކީ ބޮޑެތި މެޗުތަކުގައި ވަރުގަދަޔަށް ކުޅެން ޖެހުން ކަމަށް ވެސް ޒަވީ ބުންޏެވެ.
މީގެ އިތުރުން ޒަވީ ބުނީ ބާސެލޯނާ އިން ރަނގަޅު ވާދައެއް ކުރަން ޖެހޭ ކަމަށެވެ. އޭނާ ފާހަގަ ކުރި ގޮތުގައި މިހާރު ބާސެލޯނާ އޮތީ ގޯސް ހިސާބެއްގައި ކަމަށާއި، އެކަން ރަނގަޅު ކުރަން ޖެހޭނެ ކަމަށެވެ. ނަމަވެސް ޒަވީ ބުނީ އޭނާ ކުޅުންތެރިންނަށް ޓާގެޓު ނުކުރާނެ ކަމަށާއި، އެންމެ ބޮޑު ޒިންމާއެއް ނަގަން ޖެހޭނީ އޭނާ ކަމަށެވެ. ޒަވީ ބުނީ ބާސެލޯނާ އިން އަންނަނީ ޕްރޮޖެކްޓެއްގައި މަސައްކަތްކޮށް، ޓީމެއް ބިނާ ކުރަމުން ކަމަށެވެ.
ތަށިތައް ކާމިޔާބުކުރަން ބޭނުންނަމަ އަހަރަމެންގެ މެންޓާލިޓީ ބަދަލު ކުރަން ޖެހޭ. އަހަރެން ކުޅުންތެރިންނަށް ޓާގެޓެއް ނުކުރަން. އެންމެ ބޮޑު ޒިންމާއެއް ނަގަންޖެހޭނީ އަހަރެން. އަހަރަމެން މި އުޅެނީ ޕްރޮޖެކްޓެއް ފަށައިގެން، ޓީމެއް ބިނާ ކުރަމުން.ޒަވީ ހެނާންޑޭޒް / ބާސެލޯނާގެ ކޯޗު
ގާތް ގާތުގައި ބާސެލޯނާ އަށް ބޮޑު ދެ ބައްޔާއި ކުރިމަތިލާން ޖެހުމުން ޒަވީ އަށް ޕްރެޝަރު ބޮޑުވާނެ ކަމަށް ރިޕޯޓުތައް ބުނެއެވެ. މިދިޔަ ހަފްތާގައި ޔުއެފާ ޗެމްޕިއަންސް ލީގު ގްރޫޕް ސްޓޭޖުގައި އަމިއްލަ ދަނޑުގައި އިންޓަ މިލާނާ އެއްވަރުވެ ބާސެލޯނާ އަށް ވަނީ އަމިއްލަ ބާރު ގެއްލިފައެވެ. އެ ޓީމަށް މިހާރު އޮތީ ޔޫރޮޕާ ލީގުގެ ބިރު ކުރިމަތިވެފައެވެ.
