ކްލަބް މޯލްޑިވްސް ކަޕް ފުޓްސަލް މުބާރާތުގައި ސްޓެލްކޯ ކްލަބާއި, ފިއުލް ސަޕްލައި މޯލްޑިވްސް (އެފްއެސްއެމް)އާއި ކަސްޓަމްސް ފުރަތަމަ މޮޅު ހޯދައިފިއެވެ.

ގްރޫޕް އީގައި ސްޓެލްކޯ ކްލަބް ފުރަތަމަ މޮޅު ހޯދީ ހޯމް މިނިސްޓްރީގެ ހާކް 15-0 ން ބަލިކޮށްގެންނެވެ. މެޗުގައި އިބްރާހީމް ރިމާހު ހަތަރު ލަނޑު ޖެހިއެވެ. ޝުއައިދު ސައީދުއާއި ގައިސާން އަބޫބަކުރު މާހިރުއާއި, ޖުމައިލް ޖަމީލް, ކޮންމެ ކުޅުންތެރިއަކު ދެ ލަނޑު ޖެހިއެވެ. އެހެން ލަނޑުތައް ޖެހީ އަލީ މާއިސްއާއި, މުއާޒް އަލީއެވެ. މިބައްޔާއެކު ދެ މެޗުން ވެސް ބަލިވެ, ހާކް ވަނީ ކަޓާފައެވެ. މިގްރޫޕްގައި ޓީމް އެފްއެސްއެމް ވަނީ 5-2 ން ރާއްޖެ އޮންލައިން ބަލިކޮށްފައެވެ. މެޗުގައި މުޙައްމަދު ތޯހިރު ދެ ލަނޑު ޖެހިއެވެ. އަނެއް ތިން ލަނޑު ޖެހީ މުހައްމަދު ޖުމާން, އަބްދުالله ޒިޔާން އަދި އަހުމަދު ވިޖުދާންއެވެ. ރާއްޖެ އޮންލައިންގެ ދެ ލަނޑު ޖެހީ އަބުދުالله މުއާޒްއާއި ނާސިފް ހުސެއިންއެވެ.

ފުރަތަމަ މެޗުން ބަލިވި ޔުނައިޓެޑް ބީއެމްއެލް ދެވަނަ މެޗުގައި ކްލަބް އެއަޕޯރޓްސްއާ ވާދަކޮށްވީ އެއްވަރެވެ. މެޗު އެއްވަރުވީ 2-2 ނެވެ. ކަސްޓަމްސް ފުރަތަމަ މޮޅު ހޯދީ އާސަންދަ 3-2 ން ބަލިކޮށްގެންނެވެ. މެޗުގައި ކަސްޓަމްސްގެ ތިން ގޯލް ވެސް ޖެހީ އަހުމަދު ޝަމާލްއެވެ. ކްލަބް އާސަންދައިގެ ދެ ގޯލް ޖެހީ އަލީ ހަމްދާންއެވެ.