"އަހަރަމެން ފެއިލް ވަނީ ޔޫރަޕުގައި، ލަލީގާއަކު ނޫން!"

ބާސެލޯނާ ފެއިލްވަމުން ދަނީ ޔޫރަޕުގައި ކަމަށާއި، ނަމަވެސް ސްޕެނިޝް ލީގުގައި ނޫން ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފިއެވެ.

ޒަވީ މިހެން ބުނީ ސްޕެނިޝް ލީގުގައި ރެއާލް މެޑްރިޑާ ދެކޮޅަށް ބާސެލޯނާ އިން ނުކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައެވެ. ޒަވީ ބުނީ ރެއާލާ ދެކޮޅަށް ނުކުންނަން އޭނާ ބޭނުންވާ ކަމަށާއި، ސަބަބަކީ އޭނާ އަކީ ވާދަވެރިކަމަށް ބޭނުންވާ މީހަކަށްވުމުން ކަމަށެވެ.

މި ނޫސްވެރިންގެ ބައްދަލުވުމުގައި ޒަވީ ބުނީ ޗެލެންޖިން މެޗުތައް ކުޅެން ބޭނުންވާ ކަމަށެވެ. އެގޮތުން ރެއާލްގެ މެޗަށް އޮތް މޯޓިވޭޝަން ބޮޑު ކަމަށާއި، މެޗުން މޮޅުވެވިއްޖެ ނަމަ ލީގު ތާވަލްގެ އެއް ވަނަ ލިބޭނެ ކަމަށެވެ. އަދި އެއަށްފަހު އެއް ވަނައިގައި ފަރަގު ބޮޑު ކުރުމަށް މަސައްކަތް ކުރެވޭނެ ކަމަށް ވެސް ޒަވީ ބުންޏެވެ. އޭނާ ބުނީ މެޗުގެ ސީރިއަސް ކަމާއި، ރަނގަޅު ކުޅުން ދައްކާނީ ކުޅުންތެރިން ކަމަށާއި އޭނާގެ ޒިންމާ އަކީ ކުޅުންތެރިން ތިބީ ރަނގަޅަށްތޯ ބެލުން ކަމަށެވެ.

ފާއިތުވި ހަފްތާގައި ޔުއެފާ ޗެމްޕިއަންސް ލީގުގައި އިންޓަ މިލާން އަތުން އެއްްވަރުވުމުން ބާސެލޯނާ އަށް ވަނީ ޔޫރޮޕާ ލީގުގެ ބިރު ބޮޑުވެފައެވެ. މިއީ އެ ޓީމުގެ ކޯޗުކަމާ ޒަވީ ހަވާލުވިފަހުން ޔޫރޮޕާ ލީގާ ދިމާލަށްދާ ފުރަތަމަ ފަހަރެވެ. އެކަމަށް އިޝާރަތްކޮށް ޒަވީ ބުނީ، ފެއިލްވި މެޗަކީ ފެއިލްވުން ހައްގު މެޗެއް ނޫން ކަމަށެވެ. އަދި އެކަމާ އޭނާ ދެރަވާ ކަމަށާއި، ނަމަވެސް އަބަދުވެސް ޕޮސިޓިވްކޮށް ތިބެން ޖެހޭ ކަމަށެވެ. އެކަން ފާހަގަކޮށް އޭނާ ބުނީ ބާސެލޯނާ ފެއިލް ވަނީ ޔޫރަޕުގައި ކަމަށާއި، ސްޕެނިޝް ލީގުގައި ނޫން ކަމަށެވެ.

މީގެ އިތުރުން ޒަވީ ބުނީ އޭނާ އަށް ޤަބޫލު ކުރެވޭ ގޮތުގައި ބުރަ މަސައްކަތް ކުރާ ނަމަ، އެކަމުގެ ނަތީޖާ ވެސް ފެންނާނެއެވެ. ޒަވީ ބުނީ އޭނާ ހަވާލުވެގެން އުޅޭ ޓާސްކަށް މަސައްކަތް ކުރަން ބޭނުންވާ ކަމަށާއި، އެކަން ޙާސިލްވަންދެން އޭނާ މަސައްކަތުގައި ހުންނާނެ ކަމަށެވެ. އަދި މުސްތަގުބަލުގައި އޭނާ އަށް ޖަވާބު ދާރީ ނުވެވިއްޖެ ނަމަ އެއް ފަރާތްވާނެ ކަމަށެވެ. އެއީ އޭނާ އަކީ ބާސެލޯނާ އަށް މައްސަލައަކަށް ވާން ބޭނުންނުވާތީ ކަމަށާއި ނަމަވެސް މިވަގުތު އޭނާ ހުރީ ރަނގަޅަށް ކަމަށް ވެސް ޒަވީ ބުންޏެވެ.

އޭނާ ބުނީ އިިންޓަ މެޗުގެ ނަތީޖާ އައި ގޮތުން މެންޓަލީ ބާސެލޯނާ ދަށްވާނެ ކަަމަކަށް ޤަބޫލު ނުކުރެވޭ ކަމަށެވެ.