އެމްޕީއެލްއާއި ފެނަކަ ދެވަނަ މެޗުންވެސް މޮޅު

ކްލަބް މޯލްޑިވްސްކަޕް ފުޓްސަލް މުބާރާތުގައި ޓީމް ފެނަކައާއި އެމްޕީއެލް ކުޅުނު ދެވަނަ މެޗުވެސް ކާމިޔާބުކޮށްފިއެވެ.

ގްރޫޕް ޑީގެ ޓީމް ފެނަކަ ޓީމް ސިވިލް ކޯޓް އަތުން ބޮޑު މޮޅެއް ހޯދި މެޗުގައި ވިދާލީ ހުސައިން ޝަރީފް (އޮންލީ)އެވެ. މެޗުގައި އޭނާ ހަ ލަނޑު ޖަހައި ދެ ހެޓްރިކް ހެދިއެވެ. އަނެއް ދެ ލަނޑު ޖެހީ ހާޒިމް ފައުޒީއާއި އަޔާޒު އަހުމަދެވެ. 8-2ން ފެނަކަ މޮޅުވި މެޗުގައި ސިވިލް ކޯޓްގެ ދެ ލަނޑު ޖެހީ އަންސަރު އިބްރާހީމް (އަންކޮ)އެވެ.

އެމްޕީއެލް މެޗު ކާމިޔާބުކުރީ ޔޫތު މިނިސްޓްރީއާ ވާދަކޮށް 4-0ންނެވެ. އެމްޕީއެލްގެ ލަނޑުތައް ޖެހީ އަހުމަދު ހުސައިން, ސާޖިދު ރަޝީދު, އަލީ ހައިސަމް, އަދި މުހައްމަދު ޔަފާއުއެވެ. މުބާރާތުގެ ގްރޫޕް ސީގައި ޓީމް ޑީޖޭއޭ ވަނީ ފުރަތަމަ މޮޅު ހޯދާފައެވެ. އެޓީމް މޮޅު ހޯދީ 5-1ން ޓްރޭޑް ކްލަބް ބަލިކޮށްގެންނެވެ. މެޗުގައި މުހައްމަދު އަޖުވަދު ސޮލާހު ދެ ލަނޑު ޖެހިއެވެ. އަނެއް ތިން ލަނޑު ޖެހީ އަބްދުﷲ ފާރިޝްއާއި, ހަސަން އިހުސާންއާއި އަދި ސައުދުﷲ އަހުމަދެވެ. އެމްއޭސީއެލްއާއި އޭވިއޭޝަން ސެކިއުރިޓީ ވާދަކުރި މެޗު ނިމުނީ 1-1ން އެއްވަރުވެގެންނެވެ.