ތިމަރަފުށީ ސިއްހީ މަރުކަޒަށް އިތުރުކުރާ އިމާރާތް އެޅުމަށް ބަޔަކާ ހަވާލުކޮށްފި
މިމަސައްކަތް ކުރުމަށް ހަވާލުކޮށްފައިވަނީ، ކިލޯމީޓަރ އިންޖިނިއަރިންގ ޕްރައިވެޓް ލިމިޓެޑާ
ތިމަރަފުށީ ސިއްހީ މަރުކަޒުގެ އެކްސްޓެންޝަން އިމާރާތްކުރުމުގެ އެއްބަސްވުމުގައި ސޮއިކުރުން
ތ. ތިމަރަފުށޫ ސިއްހީ މަރުކަޒުގެ އެކްސްޓެންޝަން އިމާރާތާއި، ވަށާފާރު ރޭނުމުގެ މަސައްކަތް ކުރުމަށް ބަޔަކާއެކު އެއްބަސްވުމެއްގައި ސޮއިކޮށްފިއެވެ.
މިމަސައްކަތް ކުރުމަށް ހަވާލުކޮށްފައިވަނީ ކިލޯމީޓަރ އިންޖިނިއަރިންގ ޕްރައިވެޓް ލިމިޓެޑާއެވެ. އެއީ 145 ދުވަސްތެރޭގައި މަސައްކަތް ނިންމާގޮތަށެވެ.
މިމަސައްކަތުގެ އަގަކީ 4,767,507.83 (ހަތަރު މިލިޔަން ހަތްލައްކަ ފަސްދޮޅަސް ހަތްހާސް ފަސްސަތޭކަ ހަތް ރުފިޔާ، އައްޑިހަ ތިން ލާރި)އެވެ.
ސަރުކާރުން އަންނަނީ އަތޮޅުތަކުގައިހުރި ސިއްހީ މަރުކަޒުތަކުގެ ފެންވަރު ރަނގަޅުކޮށް ޚިދުމަތްތައް ފުޅާކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ގިނަ ރަށްރަށުގެ ސިއްހީ މަރުކަޒުގެ ޖާގަ އިތުރުކުރުމަށް އެކްސްޓެންޝަން އިމާރާތް ހެދުމާއި، އާބާދީ ބޮޑެތި ރަށްރަށުގެ ސިއްހީ މަރުކަޒުތައް، ހޮސްޕިޓަލު ފެންވަރަށް ތަރައްގީކުރުމުގެ މަސައްކަތްތައް މިހާރުވެސް ދަނީ ކުރަމުންނެވެ.
