އޭޑީއެޗްޑީ ހުންނަ ކުދިންނަށް ދޭ ބޭހެއް ރާއްޖެ އެތެރެނުކުރެވޭތީ އެމްއެފްޑީއޭގެ ކަންބޮޑުވުން!
18 އޯގަސްޓު 2025 | ހޯމަ 13:46އޭޑީއެޗްޑީ ކުދިންނަށް ދޭ ބޭހެއް މަސްތުވާތަކެތީގެ ބާވަތެއްގެ ގޮތުގައި ކަނޑައެޅިފައިވާތީ ރާއްޖެއަށް އެތެރެ ނުކުރެވޭ ކަމަށް ބުނެ އެމްއެފްޑީއޭ އިން ވަނީ ކަންބޮޑުވުން ފާޅުކޮށަފަ
ރައްޔިތުންގެ މަޖިލީހުގެ ޕެޓިޝަން ކޮމިޓީގައި އެމްއެފްޑީއޭގެ ޑިރެކްޓަރ އޮފް ފާމަސޫޓިކަލްސް، އައިޝަތު ޖަލީލާ ވާހަކަދައްކަވަނީ: ވިދާޅުވީ އޭޑީއެޗްޑީއަށް ފަރުވާ ދިނުމަށް ދޭ މެތައިލްފެނިޑޭޓް ބޭސް ނުލިބުމުގެ ޝަކުވާ އެ އޮތޯރިޓީއަށް ބަލިމީހުންގެ ފަރާތުންނާއި ޑޮކްޓަ | ރާއްޖެއެމްވީ
އެޓެންޝަން ޑެފިސިޓް ހައިޕާއެކްޓިވިޓީ ޑިސްއޯޑާ (އޭޑީއެޗްޑީ) ހުންނަ ކުދިންނަށް ދޭ ބޭހެއް، މަސްތުވާތަކެތީގެ ބާވަތެއް ކަމަށް ގާނޫނުގައި ކަނޑައަޅާފައިވާތީ ރާއްޖެ އެތެރެ ނުކުރެވޭ ކަމަށް ބުނެ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ކަންބޮޑުވުން ފާޅުކޮށްފި އެވެ.
މި ބޭސް ނުލިބުމުގެ ކަންބޮޑުވުމަށް ހައްލު ހޯދަން މަޖިލީހުގެ ޕެޓިޝަން ކޮމިޓީއަށް ހެލްތު މިނިސްޓްރީ އާއި އެމްއެފްޑީއޭގެ ބޭފުޅުން ހޯމަ ދުވަހު ވަނީ ހާޒިރުކޮށްފަ އެވެ.
ރައްޔިތުންގެ މަޖިލީހުގެ ޕެޓިޝަން ކޮމިޓީގައި އެމްއެފްޑީއޭގެ ޑިރެކްޓަ އޮފް ފާމަސޫޓިކަލްސް، އައިޝަތު ޖަލީލާ ވިދާޅުވީ އޭޑީއެޗްޑީއަށް ފަރުވާ ދިނުމަށް ދޭ މެތައިލްފެނިޑޭޓް ބޭސް ނުލިބުމުގެ ޝަކުވާ އެ އޮތޯރިޓީއަށް ބަލިމީހުންގެ ފަރާތުންނާއި ޑޮކްޓަރުންގެ ފަރާތުން ވެސް ލިބެމުންދާ ކަމަށެވެ.
ސިޓީގައި ފާހަގަކުރައްވާފައިވާ އެއް ބޭހެއް އެއީ މެތައިލްފެނިޑޭޓް. އެ ބޭސް ނުލިބޭކަމުގެ ޝަކުވާ ވަރަށް ބޮޑު. ޕޭޝަންޓުންގެ ސައިޑުން ވެސް އަދި ޑޮކްޓަރުންގެ ފަރާތުން ވެސް އަޅުގަނޑުމެންނަށް ލިބެމުންދާ ޝަކުވާއެއް އެ ބޭސް ނުލިބުން.އެމްއެފްޑީއޭގެ ޑިރެކްޓަރ އޮފް ފާމަސޫޓިކަލްސް، އައިޝަތު ޖަލީލާ
މެތައިލްފެނިޑޭޓްއަކީ އޭޑީއެޗްޑީގެ ފަސްޓްލައިން ޓްރީޓްމަންޓެއް ގޮތުގައި ބޭނުންކުރަން ހަމަ ސައިންޓިފިކަލީ ޕްރޫވަން ހަމަ ރަނގަޅު މެޑިސިންއެއް. އެކަމަކު ރާއްޖޭގައި މިވަގުތު މި ބޭސް ޕޭޝަންޓުންނަށް ލިބުމުގައި އޮތް ދަތިކަމަކީ މަސްތުވާތަކެތީގެ ގާނޫނުގެ ޖަދުވަލު 1 ގައި ވެސް މި ބޭސް އެބަ ހިމެނޭ އަދި ޖަދުވަލު 2 ގައި ވެސް މި ބޭސް އެބަ ހިމެނޭ.އެމްއެފްޑީއޭގެ ޑިރެކްޓާ އޮފް ފާމަސޫޓިކަލްސް، އައިޝަތު ޖަލީލާ
ޖަލީލާ ވިދާޅުވީ އެ ބޭހަކީ ރާއްޖެއަށް ބޭނުންވާ ޒަރޫރީ ބޭހުގެ ތެރޭގައި ހިމެނޭ ބޭހެއް ކަމަށާއި އެއީ އޭޑީއެޗްޑީގެ ފަސްޓްލައިން ޓްރީޓްމަންޓެއްގެ ގޮތުގައި ސައިންޓިފިކަލީ ވެސް ރަނގަޅު ބޭހެއް ކަމަށެވެ. އެހެން ނަމަވެސް ރާއްޖެއަށް އެ ބޭސް އެތެރެނުކުރެވެނީ މަސްތުވާތަކެތީގެ ގާނޫނު މިހާރު އޮތް ގޮތުން ކަމަށް އޭނާ ވިދާޅުވި އެވެ.
މަސްތުވާތަކެތީގެ ގާނޫނުގެ ޖަދުވަލު އެކެއްގައި އެ ބޭސް ހިމަނާފައި ވަނީ ރާއްޖެއަށް އެތެރެކުރުން މަނާ ތަކެތީގެ ލިސްޓުގަ އެވެ. ޖަދުވަލު ދޭއްގައި ހިމަނާފައި ވަނީ ބޭހުގެ ގޮތުގައި ބޭނުން ކުރެވޭ މަސްތުވާތަކެތީގެ ތެރޭގަ އެވެ.
އެމްއެފްޑީއޭގެ ސީނިއަރ ފާމަސިސްޓް އައިޝަތު ޖަލީލާ ވިދާޅުވީ އޭޑީއެޗްޑީ ހުންނަ ކުދިން ބޭނުންކުރާ މިތައިލްފެނިޑޭޓް ރާއްޖެ އިން ނުލިބޭ މައްސަލައެއް ފާހަގަވުމުން، އެ ބޭސް ލިބޭނެ ގޮތެއް ހޯދަން މިހާރު ވެސް މަސައްކަތް ކުރަމުން އަންނަ ކަމަށެވެ.
އޭޑީއެޗްޑީ ކުދިން ބޭނުންކުރާ މިތައިލްފެނިޑޭޓް ނުލިބުމުގެ ޝަކުވާ ވަރަށް ބޮޑަށް އޮތް ކަމަށާއި ޑޮކްޓަރުން ވެސް އެ ޝަކުވާ ކުރައްވާ ކަމަށް ޖަލީލާ ވެސް ވިދާޅުވި އެވެ. ޑޮކްޓަރުން އެ ބޭސް ލިޔެދިނަސް މައްސަލަ ދިމާވަނީ، ރާއްޖެއަށް ބޭސް އެތެރެކުރުމާ ހިސާބުން ކަމަށް އޭނާ ވިދާޅުވި އެވެ.
ޖަލީލާ ވިދާޅުވި ގޮތުގައި މި ބޭސް އެތެރެ ނުކުރެވޭ މައްސަލަ ދިމާވުމުން، މަސްތުވާތަކެތީގެ ގާނޫނު އިސްލާހްކުރަން އެމްއެފްޑީއޭ އިން ވާނީ ވަރަށް ގިނަ މަސައްކަތްތަކެއް ކޮށްފަ އެވެ.
އެގޮތުން ތަކުރާރުކޮށް ޝަކުވާތައް އެމްއެފްޑީއޭއަށް ލިބޭތީ ޖުލައި 13، ގައި ވެސް ގާނޫނު އިސްލާހު ކުރުމަށް މަޖިލީހަށް ސިޓީއެއް ފޮނުވި ކަމަށް ވެސް އޭނާ ވިދާޅުވި އެވެ.
އެ ބޭހަކީ ކްރިޓިކަލީ ވަރަށް މުހިންމު ބޭހެއްކަން ފާހަގަ ކުރައްވައި ޖަލީލާ ވިދާޅުވީ ރާއްޖޭގެ މުހިންމު މެޑިކަލް ލިސްޓުގައި ވެސް އެ ބޭސް ހިމަނާފައިވާނެ ކަމަށެވެ.
ޖަލީލާ ވިދާޅުވީ ހާއްސަ އެހީއަށް ބޭނުންވާ މީހުންނަށް ބޭނުންވާ ސައިކޭޓްރިކް އެހެން ބައެއް ބޭސްތަކެއް ވެސް ނުލިބޭ މައްސަލަ ފާހަގަވެފައިވާ ކަމަށެވެ. އެ ބޭސްތައް ވެސް ރާއްޖެ އެތެރެކޮށް ބަލި މީހުންނަށް ފަސޭހަ އިން ލިބޭނެ ގޮތް ހަމަޖައްސަން ޖެހޭ ކަމަށް ވިދާޅުވި އެވެ.
ނިއުރޮލޮޖިކަލް ޑިސްއޯޑަރސްގެ ތެރެއިން އޭޑީއެޗްޑީއަކީ ރާއްޖޭގައި އެންމެ ގިނަ އެއް ބައްޔެވެ. ޑިޕާޓްމަންޓް އޮފް އިންކްލޫސިވް އެޑިއުކޭޝަނުން އާންމު ކުރި ތަފާސްހިސާބުތަކުން ދައްކާ ގޮތުގައި ކިޔެވުމުގެ ދަތިތައް ދިމާވާ ޒާތުގެ ކަންކަން ހުރި 3640 ކުދިންގެ ތެރެއިން ގާތްގަނޑަކަށް 1400 ކުދިންނަކީ އޭޑީއެޗްޑީއަށް ޑަޔަގްނޯޒްކޮށްފައިވާ ކުދިންނެވެ.
