މޯލްޑިިވިއަން ދެވަނަ ބުރަށް، އެމްޓީސީސީއަށް ފުރަތަމަ މޮޅު

ކްލަބް މޯލްޑިވްސް ކަޕްގައި މޯލްޑިވިއަން ކުޅުނު ދެވަނަ މެޗުވެސް ކާމިޔާބުކޮށް ދެވަނަ ބުރު ޔަޤީންކޮށްފިއެވެ.

މޯލްޑިވިއަން ދެވަނަ މެޗު ކާމިޔާބުކުރީ ޓީމް މާލޭ ސިޓީ ކައުންސިލާ ވާދަކޮށް 2-1 ނެވެ. މެޗުގައި މޯލްޑިވިއަންގެ ދެ ލަނޑު ޖެހީ ހުސެއިން އަފްސަލްއާއި, ހަމްޒާ މުޙައްމަދު (ހަމްޕު) އެވެ. މޮޅު ކުޅުންތެރިއަކީ ހަމްޕުއެވެ. ސިޓީ ކައުންސިލްގެ ލަނޑު ޖެހީ މުޙައްމަދު ނާއިމްއެވެ. މޯލްޑިވިއަންގެ މިމޮޅާއެކު މިގްރޫޕުން ރޯޑް ރެކްރިއޭޝަން ކްލަބަށްވެސް ވަނީ ދެވަނަ ބުރު ޔަޤީންވެފައެވެ. އެޓީމްވެސް ވަނީ ކުޅުނު ދެ މެޗުން ކާމިޔާބުކޮށްފައެވެ.

ފުރަތަމަ މެޗުން ބަލިވެފައިވާ އެމްޓީސީސީ ދެވަނަ މެޗު ކާމިޔާބުކުރީ މިފްކޯ ރެކްރިއޭޝަން ކްލަބާ ވާދަކޮށް 3-2 ނެވެ. މެޗުގައި އެމްޓީސީސީގެ ލަނޑުތައް ޖެހީ މުޙައްމަދު ފައިސަލްއާއި, އަލީ ލިރުއާމްއާއި, އަލީ ނާފިއުއެވެ. މިފްކޯގެ ދެ ލަނޑު ޖެހީ އަހުމަދު ރިފްޝާންއާއި, ސަފްވާން އަދުނާންއެވެ. މިގްރޫޕްގެ އެއްވަނާގައި އޮތީ ދެ މެޗުންވެސް މޮޅުވެ ވެމްކޯއެވެ.