ރާއްޖެ ދުށް އެންމެ ސްޓައިލިޝް ފޯވަޑަކީ އަލީ އުމަރު ކަމަށް ބުނެވިދާނެއެވެ. ޔޫތު ސްޕޯޓްސް ކުލަބުން ފާހަގަވެ، އޭނާ ފިޔަޖަހާލީ ވެލެންސިއާގެ ރީނދޫ ޖާޒީގައެވެ. ވެލެންސިއާއަށް 8 އަހަރު ކުޅެދިން ފޯވަޑަކީ އެކުލަބުގެ ވަރަށް ގިނަ ކާމިޔާބީތަކެއް މުހިންމު ހިއްސާދާރެކެވެ. ސީޒަނުގެ އެންމެ ގިނަ ގޯލު ޖެހި ކުޅުންތެރިޔާގެ ރަންބޫޓު 2000 ވަނަ އަހަރު އޭނާ ހާސިލްކުރީ އެ ސީޒަނުގައި ވެލެންސިއާއަށް 27 ގޯލު ޖަހައިދީގެންނެވެ.

އައިއެފްސީ އާއި ވީބީއަށް ކުޅުމަށްފަހު އަލީ އުމަރު އޭނާގެ އަސްލު ފެންވަރުގައި ދެން ފެނިގެންދިޔައީ ނިއުރޭޑިއަންޓްގެ ކެޕްޓަންގެ ގޮތުގައެވެ. 2006 ވަނަ އަހަރު ދެއްކި މޮޅު ކުޅުމާއެކު ރާއްޖޭގެ އެންމެ މޮޅު ކުޅުންތެރިޔާގެ އަގުހުރި ޓްރޮފީ އޭނާ ލިބިގަތީ އިޓަލީގެ އެއްވަނަ ރެފްރީ ޕިއަރްލުއިޖީކޮލީނާގެ އަތުންނެވެ.

އަލީ އުމަރަކީ ގައުމީ ޓީމުގައި ގިނަ ދުވަސްތަކެއްވަންދެން އެއް ފެންވަރެއްގައި މޮޅަށް ކުޅުނު ފޯވަޑެކެވެ. ޚާއްސަކޮށް 2003 ވަނަ އަހަރުގެ ސާފް ޗެމްޕިއަންޝިޕުގައި އޭނާ ދެއްކި މޮޅު ކުޅުމާއި ޖެހި ގޯލުތަކަށް ދިވެހި ސަޕޯޓަރުންގެ ހިފެހެއްޓުމެއްނެތް ތައުރީފް އޮހިގެންދިޔައެވެ. އޭގެ ފަހުން ސާފް ޗެމްޕިއަންޝިޕް 2008 ކާމިޔާބުކުރި ޓީމުގައިވެސް ބޮޑު ހިއްސާއެއްވި ކުޅުންތެރިޔާ މިހާރު ފެނިގެންދަނީ ކުޅިވަރު ރާވައި ހިންގުމުގެ ތެރެއިންނެވެ.

ކަމިޝަނަރ އޮފް ސްޕޯޓްސްގެ މަގާމު އަދާކުރުމަށްފަހު މިވަގުތު އޭނާއަކީ ގައުމީ ފުޓްބޯޅަ އިދާރާގެ ނާއިބް ރައީސްއެވެ.