ޝޭޚް ރަސޭލް ގްރޭންޑް މާސްޓަރ ޗެސް ޓޯނަމެންޓްގައި ބައިވެރިވުމަށް ރާއްޖޭގެ ޓީމު ޑާކާއަށް

ބަންގްލަދޭޝްގެ ޑާކާގައި ކުރިއަށް ގެންދާ ޝޭޚް ރަސޭލް ގްރޭންޑް މާސްޓަރ ޗެސް ޓޯނަމެންޓްގައި ބައިވެރިވުމަށް ރާއްޖޭގެ ޓީމު ޑާކާއަށް ފުރައިފިއެވެ.

ރާއްޖޭގެ ޓީމު ޑާކާއަށް ފުރީ ބުދަ ދުވަހުއެވެ. މުބާރާތުގައި ރާއްޖޭގެ ޓީމު ފުރަތަމަ ވާދަކުރާނީ ބުރާސްފަތި ދުވަހުއެވެ. މި މުބާރާތަށް ރާއްޖެއިން ނެގި ޓީމުގައި ހިމެނެނީ ފަސް ކުޅުންތެރިންނެވެ. އެއީ މޯލްޑިވްސް ޗެސް އެސޯސިއޭޝަނުން ކުރިއަށްގެންދިޔަ ނެޝަނަލް ކްލަބް ޗެސް ޗެމްޕިއަންޝިޕްގެ އެއްވަނަ ކްލަބް، ސްޓޯން ވޯލްގެ އަބްދުﷲ މުފީދް, މުހައްމަދު އަމާން އިބްރާހީމް, އަބްދުއްރަހްމާން އަލީ، އަދި ގައުމީ ޓީމުގެ މުހައްމަދު ޝުއާއުއާއި މުހައްމަދު ހަސަންއެވެ. މުހައްމަދު ހަސަން ވަނީ ނިމިގެންދިޔަ ނެޝަނަލް ކްލަބް ޗެސް ޗެމްޕިއަންޝިޕްގައި ކުޅުނު ހުރިހާ މެޗެއް ކާމިޔާބުކޮށް މުބާރާތުގެ މޮޅު ކުޅުންތެރިޔާގެ މަގާމު ހޯދާފައެވެ.

3 ގްރޭންޑް މާސްޓަރުން ވާދަކުރާ މި މުބާރާތުގައި ރާއްޖޭގެ އިތުރުން ބައިވެރިވަނީ ޕާކިސްތާން, ސްރީލަންކާ, ބޫޓާން, ނޭޕާލް އަދި ބަންގްލަދޭޝްއެވެ.

މި މުބާރާތުގައި ބައިވެރިވުމުގެ އިތުރުން، ރާއްޖޭގެ ޓީމަށް އެއް ހަފުތާގެ ގްރޭންޑް-މާސްޓަރސް ޓްރޭނިންގގެ ފުރުސަތުވެސް، މޯލްޑިވްސް ޗެސް އެސޯސިއޭޝަނުން ވަނީ ހޯދައިދީފައެވެ. ގްރޭންޑް-މާސްޓަރ ޓްރޭނިންގއަކީ ޗެސްގެ އެންމެ މަތީ ފަންތީގެ ޓްރޭނަރުން ކައިރިން ހޯދާ ތަމްރީނުތަކަށް ދެވިފައިވާނަމެވެ.