ގައިން ގަޔަށް އަރާ ބައްޔެއް ހުރި ބިދޭސީއަކު ފިލައިން އުޅޭތީ ހޯދަނީ
ރޫހުލް އަމީން ނަމަކަށް ކިޔާ ބަންގަލަދެޝް މީހާ ގެއްލިފައިވަނީ މިދިޔަ އަންގާރަ ދުވަހު
ގެއްލިގެން ހޯދަމުން ދަނީ ވަޑާންކުރުމުގެ މަސައްކަތުގައި އުޅޭ ރޫހުލް އަމީން ނަމަކަށް ކިޔާ ބަންގަލަދެޝް މީހެއް
ގައިން ގަޔަށް އަރާ ނުރައްކާތެރި ބައްޔެއްކަމަށްވާ އެއިޑްސް ޖައްސުވާ ހިޔުމަން އިމިޔުނޯޑެފިޝެންސީ ވައިރަސް (އެޗްއައިވީ) ޖެހިފައިވާ ބިދޭސީއަކު ފިލައިގެން އުޅޭތީ އޭނާ ހޯދަން ފަށައިފިއެވެ.
ވަޑާންކުރުމުގެ މަސައްކަތުގައި އުޅޭ ރޫހުލް އަމީން ނަމަކަށް ކިޔާ ބަންގަލަދެޝް މީހާ ގެއްލިފައިވަނީ މިދިޔަ އަންގާރަ ދުވަހު އެވެ. އެ ބިދޭސީ މީހާ މަސައްކަތްކުރާ ފެކްޓްރީގައި އުޅޭ ދިވެއްސަކު ސޯޝަލް މީޑިއާގައި ޖަހާފައިވާ ޕޯސްޓެއްގައި ބުނީ، އެމީހަކީ 2014 ވަނަ އަހަރުން ފެށިގެން ރާއްޖޭގައި އުޅެމުން އަންނަ 31 އަހަރުގެ ބަންގްލަދޭޝް މީހެއް ކަމަށެވެ.
ރާއްޖެ އެމްވީއަށް އެނގިފައިވާ ގޮތުގައި އެ ބިދޭސީ މީހާ އަށް އެޗްއައިވީ ޖެހިފައިވާކަން އެނގުނީ ވިސާ އާކުރުމަށް މެޑިކަލް ޓެސްޓުތަށް ހެދުމުންނެވެ. އަދި އޭނާ ފިލާފައިވަނީ ބޭސްފަރުވާއަށް ރާއްޖެ އިން ބޭރަށް ފޮނުވާލުމަށް އޭނާ މަސައްކަތް ކުރާ ކުންފުނިން ނިންމައި މިދިޔަ މަހުގެ 26 ވަނަ ދުވަހުއެވެ. އެދުވަހު އޭނާ ވެލާނާ އިންޓަނޭޝަނަލް އެއާޕޯޓަށް ދާން ވިލިމާލޭގެ ފެރީއަށް އަރާ މާލެ ދަތުރުކޮށްފައިވެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ އެ މީހާ ރާއްޖެއިން ބޭރު ނުވާ ކަމަށް ބުނެފަ އެވެ. އެހެންވެ އޭނާއާ ގުޅޭ އެއްވެސް މައުލޫމާތެއް އެނގޭ ނަމަ 7478833 އަށް ގުޅުމަށްވެސް ވަނީ އެދިފަ އެވެ.
