ބަންގްލަދޭޝް ގައި ހަމަ ނުޖެހުންތައް ފެށި 4 މީހުން މަރުވެ, އެތައް ބަޔަކު ޒަޚަމް ވެއްޖެ
ސަލާމަތީ ބާރުތަކާއި ވެރިކަމުން ވަކިކުރެވުނު ބޮޑުވަޒީރު ޝެއިޚް ހަސީނާ އަށް ތާއީދު ކުރާ ފަރާތްތަކާ ދެމެދު ހިނގި ހަމަނުޖެހުން ތަކާ ގުޅިގެން ވަރުގަދަ ސަލާމަތީ ފިޔަވަޅުތައް ވަނީ އަޅާފައި
ބަންގްލަދޭޝްގެ ގޯޕާލްގަންޖްގައި ހިނގަމުންދާ ހަމަނުޖެހުންތައް މައިތިރި ކުރުމަށް ފޮނުވި ސަލާމަތީ ބާރުތަކުގެ ބައެއް އޮފިސަރުން އާމަރޑް ޕަރސަނަލް ކެރިއަރެއްގެ މަތީގައި - ޖުލައި، 16، 2025
ބަންގްލަދޭޝް އިތުރު ހަމަނުޖެހުންތައް ހިނގާ 4 މީހުން މަރުވެ، އެތައް ބަޔަކު ޒަޚަމް ވެއްޖެ އެވެ.
ހަމަނުޖެހުންތަކާ ގުޅިގެން ބަންގްލަދޭޝްގެ ސަރުކާރުން ވަނީ އިތުރު ސިޔާސީ ހަމަނުޖެހުންތައް ތަކުރާރުވިޔަ ނުދިނުމަށް ހަރުކަށި ސަލާމަތީ ފިޔަވަޅުތަކެއް އަޅާފައެވެ.
މި ފިޔަވަޅުތައް އެޅީ ސަލާމަތީ ބާރުތަކާއި ވެރިކަމުން ވަކިކުރެވުނު ބޮޑުވަޒީރު ޝެއިޚް ހަސީނާ އަށް ތާއީދު ކުރާ ފަރާތްތަކާ ދެމެދު ހިނގި ހަމަނުޖެހުން ތަކެއްގައި 4 މީހުން މަރުވެ، 50 އަށްވުރެ ގިނަ މީހުން ޒަޚަމްވުމާ އެކުގައެވެ.
ލޯކަލް މީޑިއާތަކުން ރިޕޯޓު ކުރި ގޮތުގައި، ބުރާސްފަތި ދުވަހު ފަރިދްޕޫރުގައި ނޭޝަނަލް ސިޓިޒަން ޕާޓީ (އެންސީޕީ) އިން ބާއްވަން ރާވާފައިވާ ރެލީއެއް އޮންނަ ސަރަހައްދަށް އެތައް ސަތޭކަ ފުލުހުން ވަނީ ފޮނުވާފައެވެ.
އެންސީޕީ އަކީ ފާއިތުވި އަހަރު ދިގު މުއްދަތެއްގައި ވެރިކަން ކުރެއްވި ހަސީނާ ވައްޓާލުމަށް މަގުފަހިކުރި ހަމަނުޖެހުންތަކުގައި އިސްކޮށް ހަރަކާތްތެރިވި ދަރިވަރުން އުފެއްދި އައު ސިޔާސީ ޕާޓީއެކެވެ.
މަސްރަހް ދިރާސާ ކުރާ ފަރާތްތަކުން ބުނަނީ ފުލުހުން ގިނަ އަދަދަކަށް ފޮނުވުމުން ދައްކުވައި ދެނީ ހަސީނާ ވެރިކަމުން ވައްޓާލި ބޮޑެތި މުޒާހަރާތަކުގެ ފަހުން ގާތްގަނޑަކަށް އެއް އަހަރު ފާއިތު ވެގެން ދިޔައިރު ވެސް އެ ގައުމުގައި ސިޔާސީ ހަލަބޮލިކަން ދެމި އޮތް ކަމެވެ.
ބުދަ ދުވަހު، ހަސީނާގެ އުފަން އަދި އޭނާގެ ތާއީދު ބޮޑު ސަރަހައްދެއް ކަމަށްވާ ގޯޕާލްގަންޖް ޑިސްޓްރިކްޓްގައި ބޭއްވުނު އެންސީޕީގެ ރެލީ އެއް ހުއްޓުވަން އަވާމީ ލީގު ޕާޓީ އަށް ތާއީދު ކުރާ ފަރާތްތަކުން މަސައްކަތް ކުރުމުން ހަމަނުޖެހުން ހިނގައިގެން ދިޔައެވެ.
ލޯކަލް މީޑިއާތަކުން ފުލުހުންނާ ހަވާލާދީ ރިޕޯޓުކުރި ގޮތުގައި މި ހަމަނުޖެހުމުގައި 4 މީހުން މަރުވެ، 50 އަށް ވުރެ ގިނަ މީހުން ޒަޚަމް ވިއެވެ.
ގޯޕާލްގަންޖުން ފެނުނު މަންޒަރުތަކުގައި، ހަސީނާ އަށް ތާއީދު ކުރާ ފަރާތްތަކުން ލަޓިބުރިތައް ހިފައިގެން ފުލުހުންނަށް ހަމަލާދީ، އެންސީޕީގެ ލީޑަރުން "މާރޗް ޓު ރީބިލްޑް ދަ ނޭޝަން" އިވެންޓަށް ވެހިކަލްތަކުގައި އައުމުން އުޅަނދުތަކުގައި އަލިފާން ރޯކުރަމުންދާ މަންޒަރު ފެނުނެވެ. މި އިވެންޓަކީ ހަސީނާ އާ ދެކޮޅަށް ހިންގުނު މުޒާހަރާ ތަކުގެ ހަނދާނުގައި ބޭއްވުނު އިވެންޓެކެވެ.
ޑާކާ ޓްރިބިއުން އިން ފުލުހުންނާ ހަވާލާދީ ބުނެފައިވާ ގޮތުގައި ހަމަނުޖެހުންތަކަށް ކުރިމަތިލުމަށް 1,500 އަށްވުރެ ގިނަ ފުލުހުންނާއި، ސިފައިންނާއި ބޯޑަރ ގާޑުން ފޮނުވާފައިވެއެވެ. ސަލާމަތީ ބާރުތަކުން ހަމަނުޖެހުމަށް އިޖާބަ ދެމުން ދިޔަ އިރު، ހަތިޔާރު އެޅި އުޅަނދުތައް މަގުމަތީގައި ދުއްވަމުންދާ މަންޒަރު ފެނުނެވެ.
އިނގިރޭސި ބަހުން ނެރޭ ޑެއިލީ ސްޓާރ އިން ބުނެފައިވަނީ ވަޒަން އެރި 8 މީހަކަށް ހޮސްޕިޓަލުގައި ފަރުވާދޭން ޖެހުނު ކަމަށެވެ.
ލޯކަލް މީޑިއާތަކުން ރިޕޯޓުކުރި ގޮތުގައި، ހޯމް އެފެއާޒްގެ އެޑްވައިޒަރ ޖަހާންގީރ އާލަމް ޗައުދުރީ ވިދާޅުވެފައި ވަނީ، މި ހަމަނުޖެހުމުގައި 10 ފުލުހުން ޒަޚަމްވެފައިވާ ކަމަށެވެ. އޭނާ އިތުރަށް ވިދާޅުވީ ހަމަނުޖެހުމާ ގުޅިގެން 25 މީހުން ހައްޔަރުކޮށްފައިވާ ކަމަށެވެ.
ޑާކާ ޓްރިބިއުން އިން ރިޕޯޓުކުރި ގޮތުގައި، ބުރާސްފަތި ދުވަހު ގޯޕާލްގަންޖުގެ މަގުތައް ވަނީ ހިމޭންވެފައެވެ. ފިހާރަތައް ބަންދުކޮށް، މަދު އަދަދެއްގެ އުޅަނދުތައް މެނުވީ މަގުމަތިން ނުފެނުއެވެ. މިއީ ހަމަނުޖެހުންތައް މައިތިރި ކުރުމުގެ ގޮތުން އެ ޑިސްޓްރިކްޓްގައި ކަރފިއު އަމުރެއް ނެރުމާ ގުޅިގެންނެވެ.
ބުދަ ދުވަހު ހިނގި ހަމަނުޖެހުމާ ގުޅިގެން ފާއިތުވި އަހަރުގެ އޯގަސްޓް މަހު ހަސީނާ ވައްޓާލުމަށްފަހު ޤައުމު ހިންގަމުންދާ މުޙައްމަދު ޔޫނުސްގެ ވަގުތީ ސަރުކާރުން ހަރުކަށި ފިޔަވަޅުތަކެއް އަޅާނެ ކަމަށް ބުނެފައިވެއެވެ.
ބުދަ ދުވަހު ނެރުނު ބަޔާނެއްގައި ޔޫނުސް ވިދާޅުވީ، ހަސީނާ އަށް ތާއީދުކުރާ ފަރާތްތަކުން އެންސީޕީގެ ރެލީ ހުއްޓުވަން މަސައްކަތް ކުރުމަކީ "އެ ފަރާތްތަކުގެ އަސާސީ ޙައްޤުތަކަށް ލަދެއްނެތި އަރައިގަތުން" ކަމަށެވެ. އަދި މި ހަމަނުޖެހުން "އަދަބު ނުދީ ދޫކޮށް ނުލާނެ" ކަމަށް ވިދާޅުވެ އިންޒާރު ދެއްވާފައިވެއެވެ.
ސަރުކާރުން ބުރާސްފަތި ދުވަހު ބުނެފައި ވަނީ ހަމަނުޖެހުންތައް ތަޙުޤީޤު ކުރުމަށް ކޮމިޓީއެއް އެކުލަވާލާފައިވާ ކަމަށެވެ. މި ކޮމިޓީން، ދެ ހަފްތާގެ ތެރޭގައި ހޯދުންތައް ރިޕޯޓުކުރާނެ ކަމަށް ބުނެފައިވެއެވެ.
ބައިބައިވެފައިވާ ބަންގްލާދޭޝް ގައި ސަލާމަތްތެރިކަން ޤާއިމުކުރުމަށް ނުކުޅެދުމުގެ ސަބަބުން ޔޫނުސްގެ ސަރުކާރަށް ފާޑުކިޔުންތައް އަމާޒު ވަމުންދެއެވެ.
މޭ މަހު ސަރުކާރުން މަނާ ކުރި ހަސީނާގެ އަވާމީ ލީގު ޕާޓީން ސޯޝަލް މީޑިއާ ޕްލެޓްފޯމް އެކްސް ގައި ގައުމުގައި ހިނގަމުންދާ ހަމަނުޖެހުންތަކާ ގުޅޭ ގޮތުން އެތައް ބަޔާނެއް ނެރެފައިވެއެވެ. އޭގެ ތެރޭގައި ވަޒަން އެރި މީހުންނާއި މަރުވި ހުރިހާ މީހުންނަކީ އެ ޕާޓީ އަށް ތާއީދުކުރާ ފަރާތްތައް ކަމަށް ބުނެފައިވާ ބަޔާނެއްވެސް ހިމެނެއެވެ. އެ ޕާޓީން މަރުތަކާއި ޒަޚަމްތަކުގެ ޒިންމާ އުފުލަން ޖެހޭނީ ވަގުތީ ސަރުކާރުން ކަމަށް ބުނެފައިވެއެވެ.
ބަންގްލަދޭޝްގެ ސިޔާސީ މަސްރަޙުގައި އާންމު ކޮށް އިސްކޮށް އޮންނަ ދެ ޕާޓީގެ ތެރެއިން އެއް ޕާޓީ ކަމަށްވާ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އިން ވެސް ބުރާސްފަތި ދުވަހުގެ ހަމަނުޖެހުމާ ގުޅިގެން ސަރުކާރަށް ފާޑުކިޔާފައިވެއެވެ. އެ ޕާޓީން ބުނެފައި ވަނީ ސަރުކާރުން ޤާނޫނާއި ނިޒާމު ދެމެހެއްޓުމަށް ނުކުޅެދިފައިވާ ކަމަށެވެ.
މި މަހުގެ ކުރީކޮޅު، ބަންގްލަދޭޝްގެ އިންޓަރނޭޝަނަލް ކްރައިމްސް ޓްރައިބިއުނަލް އިން ހަސީނާ އާއި އިސް ދެ އޮފިޝަލަކާ ދެކޮޅަށް އިންސާނިއްޔަތާ ދެކޮޅު ކުށްތަކުގެ ދަޢުވާ އުފުލާފައިވެއެވެ.
މި ދަޢުވާތައް ގުޅިފައި ވަނީ އޭނާގެ ވެރިކަމާ ދެކޮޅަށް މުޒާހަރާ ކުރި ފަރާތްތަކަށް ފުރާނަ އަށް ނުރައްކާވާ ފަދަ ހަމަލާދިނުމާ ގުޅޭ ގޮތުންނެވެ.
މީގެ ކުރިން އެހެން ޙުކުމެއްގައި، އިންޑިއާ ގައި އަމިއްލަ އަށް އަރުވާލެވިގެން އުޅުއްވަމުންދާ ހަސީނާ އަށް ކޯޓަށް ނުކިޔަމަންތެރިވުމުގެ ކުށުގައި އޭނާގެ ޣައިރު ހާޒިރުގައި 6 މަސްދުވަހުގެ ޖަލު ޙުކުމެއް ކޮށްފައިވެއެވެ.
