ކަސްޓަމަރު ގެންދާ ތާޒާ އުފެއްދުން، ހަފުތާއެއް ނޫނީ 10 ވަރަކަށް ދުވަހު، ކަސްޓަމަރަށް ގޭގައިވެސް ބެހެއްޓޭ
މިއީ ހައިޑްރޯޕޯނިކްސް ދަނޑުވެރިކަން، އެހެން ގޮތަކަށް ބުނާނަމަ ވެއްޔާ ނުލާ ކުރާ ދަނޑުވެރިކަން
ބަލާބެލުމަށް، އެއީ ކަންމަތީ ފިހާރައެއްގައި ހުރި އާދައިގެ ފުރިޖެކެވެ. ލޮލަށް ފެންނަ ކޮންމެ އެއްޗަކީ ޙަޤީޤަތަކަށް ނުވެދާނޭ ބުނާ އުސޫލުން، މި ފަހަރުވެސް ކަން އޮތީ އެ ގޮތަށެވެ. ފެންނަ ފެނުމަށް ފުރިޖެއް ކަމުގައި ހީވިއަސް، މިޞްރުގެ ވެރިރަށް ޤާޚިރާގައި ހުރި މި ފުރިޖަކީ މިއީ އާދައިގެ ފުރިޖެއް ނޫނެވެ. "ފަރމްޑް ހިއަރ"ގެ ނަން ދީފައި ވާ މި ފުރިޖަކީ ހައިޑްރޯޕޯނިކްސް ފުރިޖެކެވެ. ތާޒާ ތަރުކާރީ، އަމިއްލަ އަތުން، މުލުން ލުހެލައިގެން ގެއަށް ގެންދިއުމުގެ ފުރުޞަތު، ކަސްޓަމަރުންނަށް ހޯދާދޭ ފުރިޖެކެވެ.
"ފަރމްޑް ހިއަރ"ގެ ނަން ދީފައި ވާ މި ފުރިޖަކީ ޒަމާނީ ސްމަރޓް ޓެކްނޮލޮޖީގެ ތެރެއިން ދަނޑުވެރިކަމުގެ ސިނާއަތަށް ހައްލުތަކެއް ހޯދާ ދިނުމުގެ މަސައްކަތުގައި ހަރަކާތްތެރިވާ މިޞްރުގެ ކުންފުންޏެއް ކަމަށް ވާ ޝަދޫފްއިން ބަހައްޓާފައި ވާ ފުރިޖެކެވެ.
މި ފުރިޖުގެ ތެރޭގައި ގަސް ހެއްދުމަށް، ވެލީގެ ބަދަލު ބޭނުން ކުރަނީ ފެނެވެ. ތަރުކާރީ ހައްދަން ބޭނުންވާ ގަސްކާނާއާއި އިތުރު މާއްދާތައް ފޯރުކޮށްދެނީ ފުރިޖުގެ އެންމެ ތިރީގައި ފަރުމާ ކޮށްފައިވާ ޓޭންކުތަކުން ޕަންޕު ކޮށްގެންނެވެ.
ތަރުކާރީގެ ބާވަތްތަކަކީ އެހާމެ އަވަހަށް ހަލާކުވާ ބާވަތްތަކަކަށް ވާ އިރު، މި ފަދަ ފުރިޖެއްގެ ސަބަބުން، އެ މައްސަލައަށްވެސް ވަނީ ބޮޑު ޙައްލެއް ލިބިފައި ކަން، ޝަދޫފް ކުންފުނީގެ ހެޑް އޮފް ބިޒްނަސް ޑިވަލޮޕްމަންޓް، މާލިކު މުޙައްމަދު ތަގު އަލް ދީން ވަނީ ފާހަގަ ކޮށްފައެވެ.
ޝަދޫފް ކުންފުނިން ބުނާ ގޮތުގައި މި ނިޒާމުގައި ފެން ބޭނުން ކުރާ ނިސްބަތްވެސް މަދެވެ. ޒަމާނުއްސުރެ ދަނޑުވެރިކަން ކުރަމުން އަންނަ ގޮތާ އަޅާ ބަލާއިރު، "ފަރމްޑް ހިއަރ" ފުރިޖުގައި ފެން ބޭނުން ކުރާ މިންވަރު، 90 ޕަސެންޓް މަދެވެ. މިއީ އެއްވެސް ވަރަކަށް ޕްލާސްޓިކް ބޭނުން ކުރާ ނިޒާމެއް ނޫންކަން ފާހަގަ ކުރަން ޖެހެއެވެ. އަދި އެއްތަނުން އަނެއް ތަނަށް ތަރުކާރީ އުފުލުމުގެ ތެރޭގައި އުފެދޭ ކާބަން ފުޓްޕްރިންޓްވެސް މި ނިޒާމުގެ ސަބަބުން ނުއުފެދޭކަމީ، ތިމާވެއްޓަށް ދެވޭ ހެޔޮ މެސެޖެކެވެ.
ޝަދޫފް ކުންފުނިން މަސައްކަތް ކުރަމުން ދަނީ މޫސުމީ ނޭދެވޭ ބަދަލުތަކަށް، ދަނޑުވެރިކަމުގެ ސިނާޢަތް އަހުލުވެރި ކުރުވުމަށް ކަމަށް ވާ އިރު، އެ ކުންފުނިން ދަނީ، މިޞްރުގެ އެހެން ގްރޯސަރީ ފިހާރަތަކަށްވެސް މި މަޝްރޫއު ފުޅާ ކުރުމަށް މަސައްކަތް ކުރަމުންނެވެ.
ފެނުގެ ދަތިކަމަކީ މޫސުމީ ނޭދެވޭ ބަދަލުތަކުގެ ތެރެއިން މިޞްރަށް ކުރިމަތިލާން ޖެހިފައިވާ ބޮޑު ގޮންޖެހުމެކެވެ. މިއީ ރާއްޖެ ފަދަ ޤައުމެއްގައިވެސް ކާމިޔާބު ކަމާއެކު ހިންގިދާނެ، މަޝްރޫއެކެވެ.
