ނަޖުލާ: ޤަދީމީ ގަނޑުވަރު، ސްކޫލަކަށް ބަދަލު ކުރި ލާމަސީލު ޤައުމީ ދަރި

ހުޅަނގުން ފަތުރާލި ޑިމޮކްރަސީގެ އަވާމެންދުރެއް ފަދަ ސާލުގެ ތެރޭގައި ޤައިދުވެ، ވަރުގަދަ ހަނގުރާމައެއްގެ ހިތިކަން އަދިވެސް ތަޖުރިބާ ކުރަމުންދާ އެއް ބަޔަކީ ސޫރިޔާގެ ރައްޔިތުންނެވެ. ޑިމޮކްރަސީއަށް ގޮވާލާ އެ ޤައުމުގައި ފެށި ސުލްހަވެރި އިހުތިޖާޖުތައް، ވަރުގަދަ ހަނގުރާމައަކަށް ބަދަލުވެ، ދުނިޔެ މިހާތަނަށް ނުދެކޭ ފަދަ ނުރައްކާތެރި ޓެރަރިސްޓުންތަކެއް އެފަސްގަނޑުގައި ހަނގުރާމަ ކުރި ސޫރިޔާގެ ރައްޔިތުން މިއަދު ދަނީ އިނދަޖެހިފައި ވާ ޤައުމު އަލުން އަނބުރާ ކޮޅަށް ޖެހުމަށް، އެމީހަކަށް ވީ ގޮތަކުން މަސައްކަތް ކުރަމުންނެވެ.

އެފަދަ އެކަކީ ތާރީޚު އިލްމުގެ ރޮނގުން މަތީ ތަޢުލީމު ފުރިހަމަ ކޮށްފައިވާ ނަޖުލާ މީމާރްއެވެ. ނަޖުލާ ވަނީ ސޫރިޔާގައި ހުރި ޤަދީމީ ގަނޑުވަރެއް، މުސްތަޤުބަލަށްޓަކާ ބަދަލުކޮށްލާފައެވެ. އިދިކޮޅު ހަނގުރާމަވެރިންގެ ކޮންޓްރޯލްގެ ދަށުގައި އޮތް އިދްލީބުގެ މޯރިކް ކޭމްޕް ސަރަހައްދުގައި ހުރި އެ ގަނޑުވަރަކީ ބީޒަންތިޔާއިންގެ ދުވަސްވަރުގެ ޤަދީމީ ގަނޑުވަރެކެވެ. ނަމަވެސް، މިއަދު އެ ގަނޑުވަރަކީ، ތަޢުލީމުން މަހްރޫމުވެފައިވާ 65 ދަރިވަރެއްގެ އެދުރުގެއެވެ.

ނަޖުލާ، ގަނޑުވަރުގެ ކޮންޓްރޯލް ނެގީ މީގެ 3 އަހަރެއްހާ ދުވަސް ކުރިންނެވެ. އެކަމުގައި، ހިލޭ ސާބަހަށް މަސައްކަތް ކުރި އަންހެނުންތަކެއްގެ އެހީތެރިކަން އޭނާއަށް ލިބުނެވެ. ހިތްވަރުގަދަ ޓީމެއްގެ ބުރަ މަސައްކަތުން ގަނޑުވަރުގެ އާބާތުރަ ފިލުވާލުމަށްފަހު، އެތަނުގެ ނަން، "ޝާމް އެޑިއުކޭޝަނަލް ސެންޓަރ" ނުވަތަ "ސޫރިޔާ ތަޢުލީމީ މަރުކަޒް" އަށް ބަދަލު ކުރިއެވެ.

ޢުމުރުން 40 އަހަރުގެ ނަޖުލާއަކީ އެ މަރުކަޒުގެ މުދައްރިސާއެކެވެ. އޭނާ ކިޔަވާ ދެނީ އަރަބި، އިނގިރޭސި އަދި ހިސާބު ޢިލްމެވެ. ތުއްތު ދަރިވަރުންގެ އިތުރުން، އެކި ސަބަބުތަކާ ހެދި ކިޔެވުން ހުއްޓާލާފައިވާ ދަރިވަރުންނަށް ގެއްލިފައިވާ ފިލާވަޅުތައްވެސް ނަޖުލާ ނަގާދެއެވެ.

މިހާ ހިސާބުން އަދި ނިމުނީއެއް ނޫނެވެ. ނަޖުލާ ދަނީ ކޭމްޕުގައި ދިރިއުޅޭ އަންހެނުންނަށްވެސް ތަފާތު އެކި ހުނަރުތައް ދަސްކޮށްދެމުންނެވެ. ދިރިއުޅުން ކޮޅަށް ޖަހާ، އަމިއްލަ ފައި މައްޗަށް ތެދުވެވޭނެ ވަރު ކޮށްދިނުމަށްޓަކާ އަމިއްލަ މަސައްކަތަކަށް ފުރުޞަތު ތަނަވަސްކޮށްދިނުމުގެ ގޮތުން ނަޖުލާ ދަނީ، ހެއަރޑްރެސިންގ އާއި ފަހަން ދަސްކޮށްދޭ ކޯސްތައްވެސް ހިންގަމުންނެވެ.

ނަޖުލާގެ މި އަގުހުރި ޚިދުމަތަށް މާލީ އެހީތެރިކަމެއް ނުލިބެއެވެ. އޭނާ ޚިދުމަތް ދެމުން ދަނީ ލިބެން ހުރި މަދު ވަސީލަތްތަކެއްގެ ބޭނުން ކޮށްގެންނެވެ.

ޚުދު ނަޖުލާއަކީ ސޫރިޔާގައި ގެދޮރު ގެއްލިފައި ވާ ރެފިއުޖީއެކެވެ. ނަމަވެސް ޤައުމު ތިބާއަށް ކޮށްދޭ ކަމަކަށް ބެލުމެއް ނެތި، ޤައުމަށް ޚިދުމަތް ކުރުމުގައި ލާމަސީލު ދަރިއެކެވެ.