ޝާހު، ކުޅުމާއި ހިންގުންތެރިކަމުގައި ވެސް ފިޔަޖަހާލި ފޯވަޑެއް

އީޕީއެސް ސްކޫލުން ފުޓްބޯޅައިގެ ތެރެއަށް ނުކުތް ޝާހު އިސްމާއިލް ގައުމީ ފެންވަރުގައި ފުރަތަމަ ވިދާލީ ކްލަބް ވެލެންސިއާއިންނެވެ. 1991ން 1995 ށް ވެލެންސިއާގެ މުހިންމު ކާމިޔާބީތަކުގައި އޭނާ ޖެހި ގޯލުތައް މުހިންމު ދައުރެއް އަދާކުރިއެވެ.

ޖެހިގެން އައި އަހަރު އޯކިޑުން ފެނުމަށްފަހު ޝާހު ވިދާބަބުޅަން ފެށީ 1997 ވަނަ އަހަރު ނިއުރޭޑިއަންޓުންނެވެ. ރާއްޖެ ދުށް އެންމެ މޮޅު އެއް ފޯވަޑް ޝާހުގެ މުހިންމު ކާމިޔާބީތައް ގުޅިފައިވަނީ ވެސް އޭނާ އެކުލަބެއްގެ ކެޕްޓަންކަންކުރި ނިއުރޭޑިއަންޓާއެވެ. ސީޒަނުގެ އެންމެ ގިނަ ގޯލު ޖަހާ ކުޅުންތެރިޔާއަށް ހަވީރު ނޫހުން ދޭ ރަންބޫޓު ޖެހިގެން ދެ އަހަރު އަދި ހަވީރުގެ މޮޅު ކުޅުންތެރިޔާގެ މަގާމު ޝާހު ހޯދީ ނިއުރޭޑިއަންޓްގެ ގަދަ ނޫޖާޒީގައެވެ.

ގައުމީ ފެންވަރުގައި 12 އަހަރު ކުޅުމަށްފަހު ބޫޓު ބޭލުމުގެ ކުރިން ވިކްޓަރީއަށް ވެސް ކުޅުނެވެ. ދެ ވަނަ ފަހަރަށް ގައުމީ ތަށި މިލްކުކުރަން 2002 ވަނަ އަހަރު ވިކްޓަރީގެ ކޯޗު މައުރޫފް އަހުމަދު (މާއްޓޭ) ބޭނުންވި އެންމެ މުހިންމު ކުޅުންތެރިއަކީ ވެސް ޝާހުއެވެ.

ސާފް ޗެމްޕިއަންޝިޕުން 2003 ވަނަ އަހަރު ރިހިމެޑަލް ހޯދި ދިވެހި ގައުމީ ޓީމުގެ ކެޕްޓަކަންކުރި ޝާހުގެ އަގުވަޒަންކޮށް ދިވެހި ސަރުކާރުން ވަނީ އޭނާއަށް ކުޅިވަރުގެ ރޮނގުން އާއްމު ހިދުމަތުގެ ހިތްވަރުދިނުމުގެ އިނާމް ވެސް ދީފައެވެ. ތައުލީމީ ހިންގުންތެރިއަކަށްވެސް ވުމާއެކު ކުޅުންތެރިއްގެ ބޫޓު ބާލައި ފުޓްބޯޅަ ރާވައި ހިންގުމަށް އޭނާ މިސްރާބުޖެހީ އެހެން ކުޅުންތެރިންނަށްވުރެ އަވަހަށެވެ. އެތައް ކޯޗުންނެއް އޭނާގެ ހިދުމަތަށް އެދިގޮވަމުންދަނިކޮށެވެ.

2004 ވަނަ އަހަރު އެފްއޭއެމާ ގުޅި އޭނާގެ ފުރަތަމަ ވަޒީފާއަކަށްވީ އެގްޒެކެޓިވް ސެކްރެޓަރީގެ ދަށުން އެފްއޭއެމުގެ ހިންގުން ތަރުތީބު ކުރުމެވެ. މި މަސައްކަތުގައި ފަހަރަކު ހަރުފަތެއް ގިރާކުރަމުންގޮސް ގައުމީ ފުޓްބޯޅަ ޓީމު ތަށި ހޯދިއިރު އޭނާއަކީ ގައުމީ ފުޓްބޯޅަ އިދާރާގެ ޖެނެރަލް ސެކްރެޓަރީއެވެ. ޝާހުއަކީ ރާއްޖެ ދުށް އޭއެފްސީގެ މޮޅު މެޗު ކޮމިޝަނަރެއްވެސްމެއެވެ.