ލެވެންޑޯސްކީ އަކީ ވިއްކާ ކުޅުންތެރިޔެއް ނޫން: ބަޔާން
ލެވެންޑޯސްކީ ވަނީ ބަޔާންއާ އެކު 2021 ވަނަ އަހަރުގެ ނިޔަލަށް އެއްބަސްވުން އިތުރުކޮށްފައި
ބަޔާން އަށް ކުޅެމުން އަންނަ ރޮބާޓް ލެވެންޑޯސްކީ
ކުރިޔަށް އޮތް ސީޒަނުގައި ބަޔާން އަށް ކުޅެމުން އަންނަ ޕޮލެންޑްގެ ފޯވާޑް ރޮބާޓް ލެވެންޑޯސްކީ ފެންނާނީ ބަޔާން މިއުނިކުން ކަމަށާއި، އޭނާ އަކީ ވިއްކާ ކުޅުންތެރިޔެއް ނޫންކަމަށް އެ ކްލަބުން ބުނެފި އެވެ.
ލެވެންޑޯސްކީ ހޯދުމަށް ކްލަބްތަކުން މަސައްކަތްކުރަމުން އަންނަ ކަމަށާއި، އޭނާ ބަޔާން ދޫކޮށްލާނެ ކަމަށް ރިޕޯޓްތައް ބުނާއިރު، ބަޔާން އިން ވަނީ އެކަންތައް ދޮގުކޮށް ސްޓޭޓްމަންޓެއް ނެރެފައެވެ.
ބަޔާން އިން ނެރުނު ސްޓޭޓްމަންޓްގައި ބުނީ ދާދި ފަހުން ލެވެންޑޯސްކީ ވަނީ ކްލަބުގައި މަޑުކުރަން ނިންމާ އެއްބަސްވުން 2021 ވަނަ އަހަރުގެ ނިޔަލަށް އިތުރުކޮށްފައި ކަމަށާއި، އެގޮތުން އޭނާ އަކީ ވިއްކާ ކުޅުންތެރިޔެއް ނޫން ކަމަށެވެ.
ލެވެންޑޯސްކީ ހޯދުމަށް އެއްވެސް ކްލަބަކުން ބަޔާންއާ އެކު މަޝްވަރާ ކޮށްފައިނުވާ ކަމަށް ބަޔާން އިން ބުނާއިރު، ދިގު މުއްދަތަކަށް ކްލަބަކާއެކު އެއްބަސްވުން ހަދާފައިވާ ކުޅުންތެރިޔަކާ އެހެން ކްލަބްތަކުން މަޝްވަރާ ކުރުމަކީ ފީފާގެ ގަވައިދުތަކާ ހިލާފުކަމެކެވެ.
ބްރޯޝިއާ ޑޯޓްމަންޑުން ވިދާލި އުމުރުން 28 އަހަރުގެ ލެވެންޑޯސްކީ ބަޔާން އަށް ބަދަލުވީ 2014 ވަނަ އަހަރެވެ. އެގޮތުން އޭނާ ވަނީ އެ ކްލަބުގައި ހޭދަކުރި ތިން ސީޒަނުގައި ކުޅުނު 147 މެޗުގައި 110 ލަނޑު ކާމިޔާބުކޮށްފައެވެ.
އޭނާ ވަނީ ބަޔާންއާ އެކު ތިން ލީގު ތަށި، އެއް ޖަރުމަން ކަޕް އަދި އެއް ޖަރުމަން ސުޕާ ކަޕް ކާމިޔާބުކޮށްފައެވެ. މީގެއިތުރުން އޭނާ ވަނީ ޑޯޓްމަންޑްއާ އެކުވެސް ޖަރުމަން ލީގު ދެފަހަރު ކާމިޔާބުކޮށްފައެވެ.
