މިފަހަރުގެ ވޯލްޑްކަޕް ފުޓްބޯޅަ މުބާރާތުގައި ރާއްޖެ ޓީވީގެ އެނަލިސްޓެއްގެ ގޮތުގައި ފެނިގެންދާނެ އެންމެ މަޝްހޫރު އެއް މޫނަކީ މައުރޫފް އަހުމަދު (މާއްޓޭ) އެވެ.
އޭނާ އަކީ ރާއްޖޭގެ އުފެދުނު އެންމެ މޮޅު އެއް ގޯލްކީޕަރު އަދި އެންމެ ކާމިޔާބު ކޯޗެވެ. ކުޅުންތެރިއެއްގެ ގޮތުގައި އާއި ކޯޗެއްގެ ގޮތުގައި ގައުމީ ފުޓްބޯޅަ ތަށި މިލްކް ކުރި ހަމައެކަނި ކުޅުންތެރިޔަކީ ވެސް މާއްޓޭއެވެ. އޭނާ ވަނީ ވިކްޓަރީ އާއި ވެލެންސިއާ އަދި ލެގޫންސާއި ދިވެހި ގައުމީ ޓީމުގެ ގޯލު އިތުބާރާއެކު ބަލަހައްޓައިދީފައެވެ.
އަދި ކޯޗެއްގެ ގޮތުގައި ވެލެންސިއާ އާއި ވިކްޓަރީ އަދި އައިއެފްސީއަށް ތަށިތަކެއް ހޯދައިދިނެވެ. ހާއްސަކޮށް ވިކްޓަރީއަށް ހޯދައިދިން އެތައްގިނަގުނަ ތައްޓާއެކު ރާއްޖޭގެ ފުޓްބޯޅައިގެ އެންމެ ކާމިޔާބު ކޯޗަކީ އޭނާ އެވެ. މާއްޓޭގެ މި ރެކޯޑް ކައިރި މުސްތަގްބަލެއްގައި މުގުރާލެވޭނެ ދިވެހިން އެހެން ކޯޗަކު ނެތެވެ.
ފުޓްބޯޅަ ހިންގުމުގެ ރޮނގުން ކުޅިވަރުގެ ދާއިރާ އިން މަތީ ތައުލީމް ހާސިލްކުރުމަށްފަހު މާއްޓޭ އަކީ މިއަދު މޯލްޑިވްސް ސްޕޯޓްސް ކޯޕަރޭޝަނުގެ މެނޭޖިންގ ޑިރެކްޓަރެވެ. ކުޅިވަރަށް ހިދުމަތްކުރުމުގެ ރޮނގުން މާއްޓޭގެ އަގުވަޒަންކޮށް އޭނާއަށް ދިވެހި ސަރުކާރުން ވަނީ އާއްމުހިދުމަތުގެ ހިތްވަރު ދިނުމުގެ އިނާމް ވެސް ދެއްވައިފައެވެ.
