އީރާނުގެ މުޒާހަރާތަކުގައި 19 ކުޑަކުދިން މަރުވެއްޖެ
އީރާނުގައި ހުއްޓުމެއްނެތި މުޒާހަރާތައް ކުރިއަށްދާތާ ތިން ހަފުތާއަށްވުރެ ގިނަވެއްޖެ
އީރާނުގައި ކުރިއަށްދާ މުޒާހަރާތައް ފަށާފައި ވަނީ ސެޕްޓެމްބަރު މަހުގެ 17 ވަނަ ދުވަހު
އީރާނުގެ ސަރުކާރާ ދެކޮޅަށް ކުރާ މުޒާހަރާތަކުގައި 19 ކުޑަކުދިން މަރުވެފައިވާކަމަށް މީޑިއާ ރިޕޯޓުތައް ބުނެފިއެވެ.
ރޮއިޓަރސްއިން ރިޕޯޓުކޮށްފައިވާގޮތުން، ސެޕްޓެމްބަރު މަހުގެ 17 ވަނަ ދުވަހުން ފެށިގެން، އީރާންގެ ސަރުކާރާ ދެކޮޅަށް އެގައުމުގެ އެކި ސަރަހައްދުތަކުގައި ކުރަމުންދާ މުޒާހަރާތަކުގައި 185 މީހުން ވަނީ މަރުވެފައެވެ. އަދި އޭގެ ތެރޭގައި 19 ކުޑަކުދިންވެސް ހިމެނޭކަމަށް އީރާންގެ ހިއުމަން ރައިޓްސް އެޖެންސީއަކާ ހަވާލަދީ ރޮއިޓަރސްއިން ރިޕޯޓުކޮށްފައިވެއެވެ.
އީރާންގެ ސަރުކާރުން މިމުޒާހަރާތައް ސިފަކުރަނީ އެގައުމާ ދެކޮޅަށް (އެމެރިކާ ހިމެނޭހެން) އެގައުމުގެ ދުޝްމަނުން ކުރަމުންދާ ކަމެއްގެ ގޮތުގައެވެ.
އެގައުމުގެ ސަރުކާރާ ދެކޮޅަށް މުޒާހަރާތައް ފެށިގެންގޮސްފައި ވަނީ އުމުރުން 22 އަހަރުގެ މަހްސާ އަމީނީގެ މަރާއެކުއެވެ. ބުރުގާ އަޅާފައި ހުރިގޮތް ރަނގަޅު ނޫންކަމަށް ބުނެ، އީރާންގެ "މޯރަލިޓީ" ފުލުހުން އޭނާ "ރީ-އެޑިއުކޭޝަން" ސެންޓަރަށް ގެންދިޔައެވެ. އެއީ އޭނާއަށް ބުރުގާ އަޅައި އައުރަ ނިވާކުރާނެ ގޮތް ކިޔައިދިނުމަށް ކަމަށް ބުނެއެވެ.
ސެޕްޓެމްބަރު މަހުހެ 16 ވަނަ ދުވަހު ކުއްލިގޮތަކަށް މަހްސާ މަރުވުމާއެކު، އޭނާ މަރުވީ ފުލުހުން އޭނާއަށް ކުރި އަނިޔާތަކުގެ ސަބަބުންކަމަށް މަހްސާގެ އާއިލާއިން ވަނީ ތުހުމަތުކޮށްފައެވެ. މަހްސާ މަރުވީ ހާރޓްއެޓޭކެއް ޖެހިގެން ކަމަށް ފުލުހުން ބުނި ނަމަވެސް، ހޮސްޕިޓަލާ ހަވާލީ އޭނާގެ އާއިލާއިން ބުނެފައިވަނީ އޭނާގެ ސިކުނޑިއަށް ގެއްލުންތަކެއް ލިބިފައިވާކަމަށެވެ. އަދި މަހްސާ މަރުވެފައި ވަނީ އޭނާއަށް ފުލުހުން ކުރި އަނިޔާތަކުގެ ސަބަބުން ކަމަށް ގިނަ ބަޔަކު ގަބޫލުކުރެއެވެ.
ހުއްޓުމެއްނެތި މުޒާހަރާތައް ކުރިއަށްދާތާ ތިން ހަފުތާއަށްވުރެ ގިނަ ދުވަސްވެފައިވާއިރު، މިމުޒާހަރާތަކުގައި އެގައުމުގެ އެކި އުމުރުގެ މީހުން ދަނީ ބައިވެރިވަމުންނެވެ. އެގައުމުގެ ސްކޫލް ދަރިވަރުންވެސް ދަނީ ސަރުކާރާ ދެކޮޅަށް އަޑުއުފުލައި މުޒާހަރާކުރަމުންނެވެ.
އީރާނުގެ އިތުރުން ދުނިޔޭގެ އެހެން ގައުމުުތަކުގައިވެސް ދަނީ އީރާން ސަރުކާރާ ދެކޮޅަށް މުޒާހަރާތައް ކުރަމުންނެވެ. އެމެރިކާ ހިމެނޭހެން ޔޫރަޕުގެ ބޮޑެތި ގިނަ ގައުމުތަކެއްގައި ދަނީ ނުރުހުން ފާޅުކޮށް އަޑުއުފުލަމުންނެވެ.
މިކަމުގެ ސަބަބުން އެމެރިކާއާއި ކެނެޑާއިން އީރާނަށް ދަތިކުރުމުގެ ފިޔަވަޅުތަކެއް އަޅާފައިވާއިރު، ޔޫރަޕިއަން ޔޫނިއަނުން ދަނީ އީރާން ސަރުކާރުގެ އޮފިޝަލުންގެ އެސެޓްތައް ފްރީޒް ކުރުމާއި ގައުމުތަކަށް އޮފިޝަލުންނަށް ދަތުރުނުކުރެވޭނެ ގޮތަށް ފިޔަވަޅު އެޅުމާމެދު މަޝްވަރާކުރަމުންނެވެ.
