ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ދަތުރުކުރެއްވި ހެލިކޮޕްޓަރަށް ޓެކްނިކަލް މައްސަލަތަކެއް ދިމާވުމުގެ ސަބަބުން އިމަރޖެންސީގައި ޖައްސަން ޖެހިއްޖެއެވެ. އިމްރާން ދަތުރުކުރެއްވީ ޕަންޖާބް ޕްރޮވިންސްގައި ދާދި ފަހުން ފެންބޮޑުވެ، ހާލުގައިޖެހުނު މީހުންނަށް އެހީގެ ތަކެތި ބެއްސެވުމަށްފަހު އެނބުރި އިސްލާމް އާބާދަށް ކަމަށްވެއެވެ. މި ދަތުރުގައި އިމްރާން ޚާންގެ އަރިހުގައި އޭނާގެ ޕާޓީ "ތަހްރީކޭ އިންސާފް"ގެ އެހެން ބައެއް ލީޑަރުންވެސް ވަޑައިގެންނެވިއެވެ. ނުރައްކާތެރި އެކްސިޑެންޓެއް ހިނގައި، ހެލިކޮޕްޓަރު ވެއްޓުމުގެކުރިން ޕައިލެޓަށް މައްސަލަ ފާހަގަކުރެވުމާއެކު، ސަލާމަތުން ހެލިކޮޕްޓަރު ޖައްސައި އެންމެން ސަލާމަތްވެފައިވާކަމަށް ޚަބަރުތައް ބުނެއެވެ.
އިމަރޖެންސީގައި ހެލިކޮޕްޓަރު ޖެއްސުމަށްފަހު އެތަނަށް އެއްވި ސަޕޯޓަރުންނާ ބައްދަލުކުރައްވައި، ވީޑިއޯއަކާއެކު އިމްރާން ވަނީ ދިމާވި ހާދިސާގެ ޚަބަރު ޓްވީޓް ކުރައްވާފައެވެ.
މިހާދިސާއަށްފަހު އިމްރާން ޚާން ވަނީ ބަނީގާލާގައި ހުންނައޭނާގެ ގެއަށް ކާރުގައި ވަޑައިގެންފައެވެ.
ޕާކިސްތާންގެ މީޑިއާ ރިޕޯޓްތަކާ ހަވާލާދީ ލިބޭ ޚަބަރުތައް ބުނާގޮތުން، މިދިޔަ މަހުވެސް އިމްރާން ޚާންއަށް މިފަދަ ކަމެއް ކުރިމަތިވެވަޑައިގަތެވެ. އެއީ، ގުޖްރަންވާލާގައި އޮތް ރެލީ އަކަށް ވަޑައިގެންނެވި ޚާއްސަ މަތިންދާ ބޯޓަށް މައްސަލަ ކުރިމަތިވެ އިމަރޖެންސީގައި ޖައްސަން ޖެހުމެވެ.
