އިމްރާން ޚާންގެ ހުވާ ކުރެއްވުމުގެ ރަސްމިއްޔާތަށް ބޭރު ގައުމުތަކުގެ ވެރިންނަށް ދައުވަތު ނުދެއްވަން ނިންމަވައިފި
2 އޯގަސްޓު 2018 | ބުރާސްފަތި 13:15އިންޑިއާގެ ބޮޑުވަޒީރު ހިމެނޭ ގޮތުން ސާކް ގައުމުތަކުގެ ވެރިންނަށް ހުވާ ކުރެއްވުމުގެ ރަސްމިއްޔާތަށް ދައުވަތު އެރުވުމަށް އިމްރާން ވިސްނެއްވި ކަމަށް އަޑުތައް ފެތުރުނު
އިންތިޚާބުގައި އެންމެ ގިނަ ގޮނޑި ހޯއްދެވި އިމްރާން ޚާން
ކުރީގެ ޝްހޫރު ކްރިކެޓް ކުޅުންތެރިޔާ އިމްރާން ޚާން އަންނަ އޯގަސްޓް 11 ގައި ޕާކިސްތާނުގެ ބޮޑުވަޒީރުކަމުގެ ހުވާ ކުރައްވަން ހަމަޖެހިފައިވާއިރު، ރަސްމިއްޔާތަށް ބޭރު ގައުމުތަކުގެ އިއްޒަތްތެރިންނާއި އަދި މަޝްހޫރު ތަރިންނަށް ދައުވަތު ނުދެއްވަން އިމްރާން ޚާން ނިންމަވައިފިއެެވެ.
ޕާކިސްތާނުގެ މަޝްހޫރު ނޫހެއް ކަމަށްވާ "ޑޯން" ނޫހުން ރިޕޯޓުކުރާ ގޮތުން ބޭރު ގައުމުތަކުގެ އިއްޒަތްތެރިންނާއި އަދި މަޝްހޫރު ތަރިންނަށް ދައުވަތު ނުދެއްވަން ނިންމެވީ ހުވާކުރެއްވުމުގެ ރަސްމިއްޔާތު އެހާ ކުލަގަދަކޮށް ކުރައްވަން ބޭނުން ނުވާތީ ކަމަށެވެ. އިމްރާން ޚާން ނިސްބަތްވެ ވަޑައިގަންނަވާ ޕާޓީ ކަމަށްވާ ޕާކިސްތާން ތަހްރީކީ އިންސާފް (ޕީޓީއައި)ގެ ތަރުޖަމާނަކު "ޑޯން" ނޫހަށް ވިދާޅުވީ އިމްރާން ޚާންގެ ހުވާ ކުރެއްވުމުގެ ރަސްމިއްޔާތަށް ވަޑައިގަންނަވާނީ އެމަނިކުފާނުގެ ގާތް ރަހްމަތްތެރިން އެކަނި ކަމަށެވެ.
މަޝްހޫރު ކްރިކެޓް ކުޅުންތެރިޔާ އިމްރާންޚާންގެ ޕާކިސްތާން ތަހްރީކީ އިންސާފް (ޕީޓީއައި) އަށް އާއްމު އިންތިޚާބުގައި 116 ގޮނޑި ލިބިފައި ވެއެވެ. އެެހެން ނަމަވެސް މިއީ ސަރުކާރެއް އެކުލަވާލެވޭނެ ވަރެއް ނޫނެވެ. ޕާކިސްތާނުގެ ގާނޫނު ހަދާ މަޖިލީހުގެ އަގުލަބިއްޔަތެއް ހޯދައި އެއް ޕާޓީއަކުން ސަރުކާރެއް އެކުލަވާލުމަށްޓަކައި 137 ގޮނޑި ބޭނުންވެއެވެ. އެންމެ ފަހުގެ ރިޕޯޓުތައް ބުނާ ގޮތުން އިމްރާން ޚާންގެ ޕީޓީއައި އަށް މިހާރު ވަނީ ކޯލިޝަން ސަރުކާރެއް އެކުލަވާލެވޭ ވަރަށް ގޮނޑިތައް ހަމަވެފައެވެ.
އިމްރާން ޚާންގެ ޕީޓީއައިއާ އެންމެ ގާތުން ވާދަކުރެއްވި، މަގާމުން ދުރުކުރެވިފައިވާ ކުރީގެ ބޮޑު ވަޒީރު ނަވާޒް ޝަރީފްގެ ޕީއެމްއެލް-އެން ޕާޓީ ލިބިފައި ވަނީ 66 ގޮނޑިއެވެ. ޕާކިސްތާން ޕީޕަލްސް ޕާޓީ އަށް ލިބިފައި ވަނީ 43 ގޮނޑިއެވެ.
