ފްރާންސްގެ ފޯވާޑް އެންޓޮއިން ގްރީޒްމަން އެތުލެޓިކޯ މެޑްރިޑަށް ވިއްކާލަން ބާސެލޯނާއިން އެއްބަސްވެއްޖެއެވެ.
ގްރީޒްމަން އެތުލެޓިކޯ އަށް ކުޅެމުން އަންނަނީ ލޯނު އެއްބަސްވުމެއްގެ ދަށުންނެވެ. ދެ އަހަރު ދުވަހުގެ ލޯނު އެއްބަސްވުމެއްގެ ދަށުން އޭނާ އެތުލެޓިކޯ އަށް ބަދަލުވީ ނިމުނު އަހަރުއެވެ. ގްރީޒްމަންގެ މައްސަލާގައި ބާސެލޯނާ އާއި އެތުލެޓިކޯއާ ދެމެދު އޮތީ ޚިޔާލު ތަފާތުވުންތަކެއް އުފެދިފައެވެ.
ނަމަވެސް އެކަމުގައި އުފެދުނު މައްސަލަތައް މިހާރު ހައްލުވެފައިވާ ކަމަށާއި، އެތުލެޓިކޯ އަށް ގްރީޒްމަން ވިއްކާލަން ބާސެލޯނާއިން އެއްބަސްވެފައިވާ ކަމަށް މީޑިއާ ރިޕޯޓުތައް ބުނެއެވެ. މިކަމާ ގުޅިގެން ބާސެލޯނާގެ ކޯޗު ބުނީ އެކަން އަދި ރަސްމީ ނުވި ނަމަވެސް، މިހާރު އެއްބަސްވުމަކަށް އާދެވިފައިވާ ކަމަށެވެ. ޒަވީ ބުނީ އެކަމާ އެންމެން ވެސް އުފާވާ ކަމަށެވެ. މީގެ އިތުރުން ޒަވީ ބުނީ އޭނާ އަށް މިހާރު ހަމައެކަނި ކުރެވޭނެ ކަމަކީ ކުޅުންތެރިޔާއަށް ކާމިޔާބަށް އެދުން ކަމަށެވެ.
ރިޕޯޓުތަކުގައިވާ ގޮތުން ދެ އަަހަރުގެ ލޯނު އެއްބަސްވުން ހަމަވުމާއެކު، 20 މިލިއަން ޑޮލަރުގެ އަގެއްގައި ގްރީޒްމަން އެތުލެޓިކޯ އަށް ބަދަލުވާނެއެވެ. މީގެ ކުރިން ގްރީޒްމަން ބާސެލޯނާ އަށް ބަދަލުވީ ވެސް އެތުލެޓިކޯ ދޫކޮށްލުމަށްފަހުއެވެ.
