ޕީއެސްޖީ އެއްވަރުވީއިރު ރާމޯސް އަށް ރަތެއް

ފްރާންސް ލީގުގައި ރެއިމްސްއާ ދެކޮޅަށް ކުޅުނު މެޗުން ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އެއްވަރުވެއްޖެއެވެ.

ހޮނިހިރު ދުވަހުގެ ރޭ ރެއިމްސްގެ ދަނޑުގައި ކުޅުނު ފުޓުބޯޅަ މެޗު އެއްވަރުވީ އެއްވެސް ޓީމަކަށް ލަނޑެއް ނުޖެހިއެވެ. ރެއިމްސްއާ ދެކޮޅަށް ޕީއެސްޖީން އެ ޓީމުގެ އާޖެންޓީނާގެ ތަރި ލިއޮނެލް މެސީ ހިމަނާފައެއް ނުވެއެވެ. މީގެ އިތުރުން ބްރެޒިލްގެ ތަރި ނޭމާ ޖޫނިއާ އަށް ފުރަތަމަ 11 އިން ޖާގައެއް ނުދެއެވެ. ނޭމާ ކުޅެން ނުކުމެފައިވަނީ ބަދަލު ކުޅުންތެރިޔެއްގެ ގޮތުގައި 57 ވަނަ މިނެޓުގައެވެ. މިއީ މި ސީޒަންގެ މެޗެއްގައި ޕީއެސްޖީން ލަނޑެއް ނުޖެހި ނިންމާލަން ޖެހުނު ފުރަތަމަ މެޗެވެ.

މެޗުގައި ޕީއެސްޖީ އަށް ވަނީ ލަނޑު ޖަހާނެ ރަނގަޅު ފުރުސަތުތަކެއް ވެސް ލިބިފައެވެ. އެ ޓީމުގެ ކީލިއަން އެމްބާޕޭ އާއި ޕަބްލޯ ސަރަބިއާ އަށް ލިބުނު ފުރުސަތުތަކުގެ ހުރަހަކަށްވީ ރެއިމްސްްގެ ގޯލް ކީޕަރެވެ. މެޗުގައި ޕީއެސްޖީގެ ޑިފެންޑަރު ސާޖިއޯ ރާމޯސް އަށް ވަނީ ސީދާ ރަތް ކާޑެއް ދައްކައި ދަނޑުން ފޮނުވާލާފައެވެ. އެއީ މެޗުގެ 41 ވަނަ މިނެޓުގައި ރެއިމްސްގެ ޑިއޮން ލޮޕީ އަށް ރާމޯސް ކުރި ފައުލަކާ ގުޅިގެންނެވެ. މިއީ ރެއާލް މެޑްރިޑު ދޫކޮށް ޕީއެސްޖީ އަށް ބަދަލުވި ފަހުން ރާމޯސް އަށް ދެއްކި ފުރަތަމަ ރަތް ކާޑެވެ.

މެޗުން އެއްވަރުވީ ނަމަވެސް ޕީއެސްޖީ އޮތީ ލީގު ތާވަލްގެ އެއް ވަނަ މަގާމުގައެވެ. އެއީ 10 މެޗުން 26 ޕޮއިންޓު ހޯދައިގެންނެވެ. ދެ ވަނައިގައި އޮތް މާސޭ އަށް ލިބެނީ 10 މެޗުން 23 ޕޮއިންޓެވެ.