19 އަހަރުން ދަށުގެ ޓްރަޔަލްގައި 100ށްވުރެ ގިނަ ކުދިން
ގައުމީ ޓީމުން ޖާގަ ހޯދުމުގެ ފުރުސަތު އޮންނާނެ
ޕޫލަށް ކުދިން ނެގުމަށް ބޭއްވި ސެޝަންގެ ތެރެއިން
19 އަހަރުން ދަށުގެ އެލީޓް ޕޫލަށް ކުދިން ނެގުމަށް ބޭއްވި ޚާއްސަ ޓްރެއިނިންގ ސެޝަންގެ ފުރަތަމަ ދުވަހުވެސް 100ށްވުރެ ގިނަ ކުދިން ބައިވެރިވެއްޖެއެވެ.
ހުކުރު ދުވަހު ބޭއްވި ފުރަތަމަ ސެޝަންގައި 108 ކުދިން ބައިވެރިވިކަމަށް އެފްއޭއެމްއިން މައުލޫމާތުދެއެވެ. އަދި ހޮނިހިރު ދުވަހު ކުރިއަށްގެންދިޔަ ދެވަނަ ސެޝަންގައިވެސް 100ށްވުރެ ގިނަ ކުދން ބައިވެރިވިކަމަށް އެފްއޭއެމްގެ ހެޑް އޮފް އެލީޓް އެންޑް ޔޫތު، އަހުމަދު ޝާކިރު (ޝާކިއްޓެ) ބުންޏެވެ. ހޮނިހިރު ދުވަހުގެ ސެޝަންގައި ހުކުރު ދުވަހު ބައިވެރިނުވާ ކުދިންވެސް ވަނީ ބައިވެރިވެފައެވެ. އޭނާ ބުނީ ސީދާ ތަމްރީނުތަކުގައި ބައިވެރިވާންވެސް އަތޮޅުތަކުން ކުދިން އައިކަން ފާހަގަކުރެވުނު ކަމަށެވެ. އޭގެ ތެރޭގައި މާލެއާއި އަތޮޅުތަކުގެ ކުދިން ހިމެނެއެވެ.
ސެޝަނުން ފާހަގަކުރެވުނު ކުދިންނަށް ފުރުސަތު ދެނީ 19 އަހަރުން ދަށުގެ ޕޫލުންނެވެ. އެ ޕޫލްގެ ޕްރެކްޓިސްވެސް ދެމެހެއްޓެނިވި ގޮތެއްގައި ކުރިއަށްގެންދަން އެފްއޭއެމްއިން ވަނީ ނިންމާފައެވެ. އަދި 19 އަހަރުން ދަށުގެ ގައުމީ ޓީމަށް ޕޫލުން ކުދިން ނަގާނެއެވެ. ޕޫލްގައި ހިމެނޭ ކުދިންގެ ތެރެއިން މާލޭގައި ނޫޅޭ ކުދިންނަށްވެސް ގާއުމީ ޓީމުން ފުރުސަތު ލިބޭނެކަމަށާއި, މުބާރާތްތަކަށް ޓީމާއެކު ދިއުމުގެ ފުރުސަތު އޮންނާނެކަމަށް ޝާކިއްޓެ ބުންޏެވެ. އެކުދިން މޮނިޓަރކުރެވޭނެ ގޮތްތަކެއް އެފްއޭއެމްއިން ރާވާނެއެވެ.
