ފްރާންސް ލީގުގައި ޗެމްޕިއަންސް ޕެރިސް ސެއިންޓް ޖާމަން (ޕީއެސްޖީ) އިން ރެއިމްސްއާ ދެކޮޅަށް ކުޅޭ މެޗުގައި ލިއޮނެލް މެސީ ނުކުޅޭނެ ކަމަށް ކްރިސްޓޮފާ ގަލްޓިއޭ ބުނެފިއެވެ.

މި ސީޒަންގައި ރަނގަޅު ފޯމެއްގައި ކުޅެމުން އަންނަ މެސީ، ޕީއެސްޖީން ހޮނިހިރު ދުވަހުގެ ރޭ ރެއިމްސްއާ ދެކޮޅަށް ކުޅޭ މެޗުގެ ސްކޮޑުގައި ހިމަނާފައެއް ނުވެއެވެ. އެކަމާ ގުޅިގެން މެޗުގެ ކުރިން އޮތް ނޫސްވެރިންގެ ބައްދަލުވުމުގައި އެ ޓީމުގެ ކޯޗު ގަލްޓިއޭ ބުނީ، ރެއިމްސްއާ ދެކޮޅަށް މެސީ ނުކުޅޭނެކަމަށެވެ. ނަމަވެސް މެޗަށްފަހު އާދިއްތަ ދުވަހުގެ ހެނދުނު އޮންނަ ފަރިތަކުރުންތަކަށް މެސީ ހާޒިރުވާނެ ކަމަށް އޭނާ ބުންޏެވެ. ގަލްޓިއޭ ބުނީ މެސީ މެޗުގައި ނުކުޅެނީ އޭނާ އަށް ރެސްޓެއް ދިނުމުގެ ގޮތުން ކަމަށެވެ.

ބާސެލޯނާ ދޫކޮށް ޕީއެސްޖީ އަށް ބަދަލުވި ފުރަތަމަ ސީޒަންގައި މެސީ އަށް އެންމެ އެދެވޭ ކުޅުމެއް ނުދެއްކުނު ނަމަވެސް، މި ސީޒަންގައި އޭނާ އަންނަނީ މޮޅު ކުޅުމެއް ދައްކަމުންނެވެ. މި ސީޒަންގައި ޕީއެސްޖީ މޮޅުވުމުގައި މެސީގެ ދައުރު ވަރަށް ބޮޑެވެ. މެސީ ވަނީ ސީޒަންގެ މިހާތަނަށް ޕީއެސްޖީ އަށް ކުޅެދިން 13 މެޗުން އަށް ލަނޑު ޖަހާފައެވެ. އޭގެ ތެރެއިން ފަސް ލަނޑަކީ ފްރާންސް ލީގުގައި އޭނާ ޖަހާފައިވާ ލަނޑެވެ.