39 މީހުން މަރާލުމަށްފަހު ތައިލޭންޑުގައި މީހަކު އަމިއްލައަށް މަރުވެއްޖެ

ބުރާސްފަތި ދުވަހު މުޅި ތައިލޭންޑު ސިއްސުވާލީ ހިތާމަވެރި ހާދިސާއެއްގެ ހަބަރާއެކުއެވެ. އެގައުމުގައި 39 މީހުން މަރާލުމަށްފަހު މީހަކު އަމިއްލައަށް މަރުވި ހަބަރާއެކުއެވެ. އަދި އޭނާ މަރާލި މީހުންގެ ތެރޭގައި ގިނަ އަދަދެއްގެ ކުޑަކުދިން ހިމެނޭކަން އެނގުނު ހިސާބުން އެތައް ބައެއްގެ ލޮލުން ކަރުނަ އޮހިގެންދިޔައެވެ.

ތައިލޭންޑުގެ ފުލުހުންނާ ހަވާލާދީ ރޮއިޓަރސްގައި ރިޕޯޓުކޮށްފައިވާގޮތުން ތައިލޭންޑުގެ ކުރީގެ ފުލުސް އޮފިސަރަކު ވަނީ ބުރާސްފަތި ދުވަހު އެގައުމުގެ ޑޭ ކެއާ ސެންޓަރަކަށް ގޮސް 37 މީހުން މަރާލާފައެވެ. އޭގެ ތެރޭގައި 22 ކުޑަކުދިން ހިމެނެއެވެ. އަދި އޭގެފަހުން އޭނާގެ އަންހެނުންނާއި ދަރިފުޅު މަރާލުމަށްފަހު އޭނާ އަމިއްލަ އަށް މަރުވެފައިވާ ކަމަށް ވެސް ތައިލޭންޑުގެ ފުލުހުން ބުނެއެވެ.

މިއީ މިފަހުގެ ތާރީހެއްގައި މީހަކު އެންމެ ގިނަ އަދަދަކަށް ކުޑަކުދިން މަރާލި ހާދިސާއެވެ. މި ހާދިސާގައި އޭނާ މަރާލާފައިވާ ކުދިންގެ ތެރެއިން ގިނަ ކުދިން މަރާލާފައިވަނީ ވަޅިން ދިން ހަމަލާތަކެއްގައި ކަމަށް ފުލުހުން ވަނީ މައުލޫމާތުދީފައެވެ.

ތައިލޭންޑުގެ ފުލުހުންނާ ހަވާލާދީ ރޮއިޓަރސްގައި ރިޕޯޓުކޮށްފައިވާގޮތުން އެވަގުތު ޑޭ ކެއާގައި ތިބި ކުދިންނަކީ ދެ އަހަރާ ފަސް އަހަރާ ދެމެދުގެ ކުޑަކުދިންނެވެ.

ފުލުހުން މައުލޫމާތުދޭ ގޮތުގައި މިހާދިސާ ހިންގާފައިވާ ކުރީގެ ފުލުސް އޮފިސަރަކީ މަސްތުވާތަކެތީގެ މައްސަލައެއްގައި މިދިޔަ އަހަރު ވަޒީފާއިން ވަކިކޮށްފައިވާ މީހެކެވެ. އަދި އޭނާގެ މައްސަލައިގެ އަޑުއެހުންތައް ކުރިއަށްދާކަމަށް ވެސް ފުލުހުން ވަނީ ބުނެފައެވެ.

އެމީހާ އެ ހަމަލާތައް ދިނުމުގެ ކުރިން ކޯޓުގައި އޭނާގެ މައްޗަށް ކުރާ ދައުވާގެ އަޑުއެހުމެއް އެދުވަހު ކުރިއަށް ގެންގޮސްފައިވާކަމަށް ފުލުހުން ބުނެއެވެ. އޭނާ ޑޭ ކެއާއަށް ގޮސްފައިވަނީ އޭނާގެ ދަރިފުޅު ބަލާކަމަށް ވެސް ވަނީ މައުލޫމާތު ދީފައެވެ.

ފުލުހުންގެ ތަރުޖަމާނާ ހަވާލާދީ ރޮއިޓަރސް އިން ރިޕޯޓުކޮށްފައިވާގޮތުން އޭނާ ޑޭ ކެއާގައި ތިބި މީހުންނާއި ކުދިން މަރަން ފެށީ އެ ސެންޓަރުން އޭނާގެ ދަރިފުޅު ނުފެނުމުންނެވެ. އެގޮތުން ދަރިފުޅު ނުފެެނުމުން ބަޑިޖަހައި ވަޅިން ހަމާލާދޭން ފެށީކަމަށް ތަރުޖަމާން ކިޔާދީފައިވެއެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި މަރުވެފައިތިބި ކުޑަކުދިންގެ ހަށިގަނޑުތައް ފޮތިގަނޑު އަޅައި ފޮރުވާފައި އޮތް ނަމަވެސް އެހަށިގަނޑުތައް ވަނީ ލެއިން ތަތްތެޅިފައިކަން ފެނެއެވެ.

ޑޭ ކެއާ ސެންޓަރު ކައިރީގައި ހުރި އޮފީހެއްގައި މަސައްކަތްކުރަމުންދިޔަ މީހަކާ ހަވާލާދީ ރޮއިޓަރސްގައި ރިޕޯޓުކޮށްފައިވާގޮތުން އެމީހާ އެ ޑޭ ކެއާ ސެންޓަރަށް ދިޔަ އިރު، އެތާނގައި 30ކަށް ކުޑަކުދިން ތިއްބެވެ. މިއީ އާންމުކޮށް އެ ޑޭ ކެއާ އަށް ދާ ކުޑަކުދިންގެ އަދަދަދަށްވުރެ މަދު އަދަދެއްކަމަށް އޭނާ ކިޔައިދިނެވެ.

މިހަމަލާދިން މީހާ ޑޭ ކެއާ ސެންޓަރަށް ގޮސްފައިވަނީ މެންދުރުގެ ވަގުތުގައި ކަމަށާއި އޭނާ އެންމެ ފުރަތަމަ ބަޑިޖަހައި މަރާލާފައި ވަނީ އެތަނުގައި މަސައްކަތްކުރާ ފަސް އޮފިޝަލުން ކަމަށް ވެސް އެމީހާ ވަނީ ރޮއިޓަރސްއަށް ކިޔާދީފައެވެ.

އޭނާ ކިޔައިދިން ގޮތުގައި ބަޑީގެ އަޑު އިވުމުން މީހުން އެންމެ ފުރަތަމަ ހީކުރީ ހަވާ އަރުވާނީ ކަމަށާއި ބަޑިޖަހާކަން އެނގުނީ ފަހުން ކަމަށް ބުނެފައިވެއެވެ.

އެމީހާ ޑޭ ކެއާގައި ހުރި ކޮޓަރިއަކަށްވަދެ އެތާނގައި ނިދާފައި ތިބި ކުދިންނަށް ވަޅިން ހަމާލާދީ މަރާލާފައިވާ ކަމަށާއި އެތަނުގައި މަސައްކަތްކުރަމުންދިޔަ މާބަނޑު އަންހެނަކު ވެސް މަރާލާފައިވާކަމަށް އޮފީސް މަސައްކަތްތެރިޔާއާ ހަވާލާދީ ރޮއިޓަރސްގައި ރިޕޯޓުކޮށްފައިވެއެވެ.

އޭނާ އެ ޑޭ ކެއާ ސެންޓަރަށް ދިން ހަމަލާތަކަށްފަހު އެތަނުން އޭނާގެ ދަރިފުޅު ނުފެނުމުން ގެއަށް ދިޔަ ކަމަށާއި، ގެއަށްގޮސް އޭނާގެ އަންހެނުންނާއި ދަރިފުޅަށް ހަމަލާދީ އެމީހުން މަރާލީކަމަށް ފުލުހުންގެ ތަރުޖަމާން ކިޔައިދިނެވެ. އަދި އެމީހުން މަރާލުމަށްފަހު އޭނާ އަމިއްލައަށް މަރުވެފައިވާކަމަށް ވެސް ތަރުޖަމާނު ކިޔާދިނެވެ.

މިފަދަ ހާދިސާތަކަކީ ތައިލޭންޑުގައި އާންމު ހާދިސާތަކެއް ނޫނެވެ. އަދި އާންމުން ބަޑި ގެންގުޅުމަކީ ވެސް އެގައުމުގައި މަނާކަމެކެވެ. އަދި ގަވައިދާ ހިލާފަށް ބަޑި ގެންގުޅޭ ނަމަ އަދަބެއްގެ ގޮތުގައި 10 އަހަރު ދުވަހާ ހަމައަށް ޖަލަށް ލެވޭނެއެވެ. އެހެންނަމަވެސް ތައިލޭންޑަކީ ދެކުނު އޭޝިއާގެ އެހެން ގައުމުތަކާ އަޅާބަލާއިރު، ގަވައިދާ ހިލާފަށް މީހުން ބަޑި ގެންގުޅުން ގިނަ ގައުމެކެވެ. ކައިރި އެހެން ގައުމުތަކުން ވަގަށް ބަޑި އެތެރެކޮށް ބޭނުންކުރާ މީހުން އެގައުމުގައި އުޅެއެވެ.

ފުލުހުން މައުލޫމާތުދޭ ގޮތުގައި މިހާދިސާގައި އެމީހާ ގެންގުޅުނު ބަޑިއަކީ ގަވައިދާ ހިލާފަށް ގެންގުޅުނު ބަޑިއެއް ނޫނެވެ.

މިހާދިސާއާ ގުޅިގެން ތައިލޭންޑްގެ ބޮޑުވަޒީރު ޕްރަޔުތު ޗަންއޮޗާ ވަނީ ފޭސްބުކް މެދުވެރިކޮށް ބަޔާނެއް ނެރުއްވާފައެވެ. އެގޮތުން މިހާދިސާގެ ވާހަކަ އެއްސެވީ ހައިރާންވެ ހުންނަވާ ކަމަށާއި ފުލުހުންގެ އެންމެ އިސްވެރިޔާއަށް ހާދިސާ ހިނގި ސަރަހައްދަށް ގޮސް ވަގުތުން ފިޔަވަޅުތައް އެޅުމަށް އަންގަވާފައިވާނެ ކަމަށް ބޮޑުވަޒީރުގެ ބަޔާނުގައި ވިދާޅުވެފައިވެއެވެ. އަދި މިކަމުގައި ފިޔަވަޅު އަޅަންޖެހޭ މީހުން ހޯދާ ވަގުތުން ފިޔަވަޅު އެޅުމަށް ވެސް އަންގަވާފައިވާނެ ކަމަށް ވިދާޅުވެފައިވެއެވެ.

ބޮޑުވަޒީރު ވަނީ ހާދިސާގައި އަސަރުކޮށްފައިވާ ފަރާތްތަކަށް ވަގުތުން އެހީތެރިކަން ފޯރުކޮށްދިނުމަށް ވެސް އަންގަވާފައެވެ.

މީގެ އިތުރުން ބުރާސްފަތި ދުވަހު ބޮޑުވަޒީރު ވަނީ ހާދިސާ ހިނގި ސަރަހައްދަށް ވަޑައިގެން މަރުވި މީހުންނާއި ކުދިންގެ އާއިލާތަކާ ބައްދަލުކުރައްވާފައެވެ.

ތައިލޭންޑްގެ ސަރުކާރުން ވަނީ ހާދިސާގައި މަރުވި މީހުންގެ އާއިލާތަކަށް އެމީހުންގެ ޖަނާޒާގެ ކަންތައްތައް ކުރިއަށް ގެންދިޔުމަށް ފައިސާގެ އެހީ ފޯރުކޮށްދޭނެ ކަމަށް ބުނެފައެވެ. އަދި ހާދިސާގައި އަނިޔާވި މީހުންނަށް ފަރުވާދިނުމަށް ވެސް ފައިސާގެ އެހީ ސަރުކާރުން ފޯރުކޮށްދޭނެ ކަމަށް ވަނީ ބުނެފައެވެ.

ތައިލޭންޑުގެ މިހާދިސާ އަކީ މިގޮތަށް އެންމެ ގިނަ އަދަދެއްގެ ކުޑަކުދިން އެކަކު މަރާލާފައިވާ އެއް ހާދިސާއެވެ. އެގޮތުން 2011 ވަނަ އަހަރު ނޯވޭގައި އަންޑްރެސް ބްރެވިކް ކިޔާ މީހަކު 69 މީހުން މަރާލާފައި ވާއިރު، އޭގެ ތެރޭގައި ގިނައީ ފުރާވަރުގެ ކުދިންނެވެ. އަދި 1996 ވަނަ އަހަރު ސްކޮޓްލޭންޑްގައި ހިނގި މިފަދަ ހާދިސާއެއްގައި 16 ކުޑަކުދިން މަރާލާފައިވާއިރު، މިއަހަރު އެމެރިކާގެ ޓެކްސަސްގެ ސްކޫލެއްގައި ހިނގި މިފަދަ ހާދިސާއެއްގައި 19 ކުދިން މަރާލާފައިވެއެވެ.

2004 ވަނަ އަހަރު ރަޝިއާގެ ގްރޫޕަކުން ސްކޫލެއް ހިސާރުކޮށް ހިނގި ހާދިސާއެއްގައި 186 ކުދިން މަރާލާފައިވެއެވެ.