އަންނަ ނޮވެމްބަރު މަހު ޤަތަރުގައި ފަށާ ފީފާ ވޯލްޑް ކަޕާ ގުޅިގެން އެސްޓީއޯ އިން "ހޭވައްލާ ތައްޔާރު"ގެ ނަމުގައި ޚާއްސަ ޕްރޮމޯޝަނެއް ފަށައިފިއެވެ.

ބުދަ ދުވަހުގެ ހެނދުނު އެސްޓީއޯ ޕީޕަލްސް ޗޮއިސްގައި އޮތް އިވެންޓުގައި މި ޕްރޮމޯޝަން ފައްޓަވައިދެއްވީ އެ ކުންފުނީގެ މެނޭޖިން ޑައިރެކްޓަރު ޙުސެއިން އަމްރުއެވެ. ޕްރޮމޯޝަން ކުރިއަށް ދާނީ އެސްޓީއޯގެ ޕީޕަލްސް ޗޮއިސް އާއި ރީޖަނަލް ފިހާރަތަކުގައެވެ.

މި ޕްރޮމޯޝަންގެ ދަށުން ނަސީބުވެރި ފަރާތްތަކަށް ޚާއްސަ އިނާމުތަކެއް ލިބޭ ގޮތަށް ވަނީ ހަމަޖެހިފައެވެ. އެގޮތުން މި ޕްރޮމޯޝަންގައި ހިމެނޭ އައިޓަމްތަކުން 15 އިންސައްތައާ ހަމައަށް ޑިސްކައުންޓު ދިނުމަށް ވަނީ ނިންމާފައެވެ. މީގެ އިތުރުން ގަންނަ ފިލިޕްސް ބްރޭންޑުގެ 50 އިންޗީގެ ޓީވީއަކާއެކު ސައުންޑް ސްޕީކަރ ބާ އެއް ހިލޭ ލިބޭނެއެވެ. މީގެ އިތުރުން ކޮންމެ ޓީވީއަކާއެކު ބްރެކެޓް ވެސް ހިލޭ ލިބޭނެއެވެ.

މި ޕްރޮމޯޝަނާ ގުޅޭ ގޮތުން ވާހަކަ ދައްކަވަމުން އެސްޓީއޯގެ ޕަބްލިކް ރިލޭޝަން މެނޭޖަރު ޢަބްދުﷲ މުޙައްމަދު ވިދާޅުވީ، ޕްރޮމޯޝަންގެ ދަށުން ގްރޭންޑް އިނާމުގެ ގޮތުގައި ވެސް ޚާއްސަ އިނާމުތަކެއް ލިބޭނެ ކަމަށެވެ.

މި ޕްރޮމޯޝަންގެ ގްރޭންޑް އިނާމެއްގެ ގޮތުގައި އެއް ވަނަ އަށް ހޮވޭ ފަރާތަަކަށް އައިފޯން 14 ޕްރޯ މެކްސް އެއް ލިބޭނެއެވެ. ދެ ވަނަ އަށް ހޮވޭ ފަރާތަކަށް ޕީއެސް 5 އެއް ވީއާރުއާއެކު ލިބޭ އިރު، ތިން ވަނަ އަށް ހޮވޭ ފަރާތަކަށް އެސްޓީއޯ ޕީޕަލްސް ޗޮއިސްގެ 15،000 ރުފިޔާގެ ގިފްޓް ވައުޗަރެއް ލިބޭނެއެވެ. މި ގިފްޓު ވައުޗަރުގެ ދަށުން ގޭއާއި ބަދިގޭގެ ސާމާނު ނެގުމުގެ ފުރުސަތު އޮންނާނެއެވެ.

މީގެ އިތުރުން ވެސް 500 ރުފިޔާ އިން މަތިން ކުރާ ކޮންމެ ވިޔަފާރިއަކަށް ކޫޕަނެއް ލިބޭނެއެވެ. އަދި އެސްޓީއޯ ޕީޕަލްސް ޗޮއިސްގައި ވަގުތުން އިނާމު ލިބޭ ބައެއް ގޭމުތައް ވެސް ހުންނާނެއެވެ.

މި ޕްރޮމޯޝަން ކުރިއަށް ގެންދިޔުމަށް ހަމަޖެހިފައިވަނީ މިއަދުން ފެށިގެން ނޮވެމްބަރު މަހުގެ 30 ވަނަ ދުވަހުގެ ނިޔަލަށެވެ.