އަބޫ ދާބީގެ ވިޒް އެއަރ އިން ރާއްޖެއަށް ސީދާ ދަތުރުތައް ފަށައިފި

އަބޫ ދާބީގެ ވިޒް އެއަރއިން ރާއްޖެއަށް ސީދާ ދަތުރުތައް ފަށައިފިއެވެ.

ވިޒް އެއަރގެ ފްލައިޓުތައް ރާއްޖެއަށް ލޯންޗުކޮށްފައިވަނީ ފުރަތަމަ ފްލައިޓް Dh359 އާއެކުއެވެ. އެ ފްލައިޓު ރާއްޖެ އައިސްފައިވަނީ އަންގާރަ ދުވަހުގެ ހަވީރެވެ.

ވިޒް އެއަރގެ ދަތުރުތައް ފެށުމާއެކު ހަފްތާއަކު ހަތަރު ދުވަހު އެ އެއަރލައިންގެ ދަތުރުތައް ރާއްޖެއަށް ބާއްވާނެއެވެ. އެއީ އަންގާރަ، ބުރާސްފަތި، ހޮނިހިރު އަދި އާދިއްތައިގައެވެ. އަދި އަންނަ ނޮވެމްބަރު މަހު ހަފްތާއަކު 6 ދުވަހު ދަތުރުތައް ބާއްވަން ވަނީ ނިންމާފައެވެ. އަދި ޑިސެމްބަރު މަހު ކޮންމެ ދުވަހަކު ދަތުރުތައް ބާއްވަން ދަނީ މަސައްކަތް ކުރަމުންނެވެ.

ވިޒް އެއަރގެ ދަތުރުތައް ފެށުމަށް އަންގާރަ ދުވަހު ބޭއްވި ރަސްމިއްޔާތުގައި މީޑިއާތަކަށް މައުލޫމާތުދެއްވަމުން ވިޒް އެއަރ އަބޫ ދާބީގެ މެނޭޖިންގ ޑިރެކްޓަރ މައިކަލް ބަރލުއިސް ވިދާޅުވީ ވިޒް އެއަރގެ ދަތުރުތައް ރާއްޖެއަށް ފުޅާކުރެވިގެން ދިޔަކަމާމެދު އުފާކުރައްވާ ކަމަށެވެ. އަދި މިއީ ދަތުރުކުރާ ގިނަ ބަޔަކަށް އިތުރު އޮޕްޝަންތަކެއް ލިބިގެންދާނެ ކަމެއް ކަމަށް ގަބޫލުކުރައްވާކަަމަށް މައިކަލް ވިދާޅުވިއެވެ.

ރާއްޖެ އެމްވީއަށް މައުލޫމާތުދެއްވަމުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލްގެ) ސީއީއޯ އަދި މެނޭޖިންގ ޑިރެކްޓަރ މަހުޖޫބް ޝުޖާއު ވިދާޅުވީ ވިޒް އެއަރގެ ދަތުރުތައް ފެށުމާއެކު އެއަރޕޯޓުގެ މޫވްމެންޓުތައް އިތުރުވެގެންދާނެ ކަމަށެވެ. އަދި އެއީ ދުވާހެއްގެ މައްޗަށް ރާއްޖެ އެތެރެވާ މީހުންގެ އަދަދު އިތުރުވެގެންދާނެ ކަމެއް ކަމަށެވެ.

ވިޒް އެއަރގެ ދަތުރުތައް ފެށުމާއި ގުޅިގެން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ ވިޒް އެއަރގެ ދަތުރުތައް މި ފެށުނީ ވައިގެ ދަތުރުފަތުރުގެ އަގުތައް ވަރަށް ބޮޑަށް އުފުލިފައިވާ ދަނޑިވަޅެއްގައި ކަމަށެވެ. އަދި ރާއްޖޭގެ ފަތުރުވެރިކަމަށް 50 އަހަރު ފުރި 51 ވަނަ އަހަރު ގުނަންފެށި ފުރަތަމަ ދުވަހު އަލަށް ރާއްޖެއަށް އެއަރލައިނެއް އޮޕަރޭޓްކުރަން ފެށުމަކީ ރަނގަޅު ފާލެއް ކަމަށް މިނިސްޓަރ ވިދާޅުވިއެވެ.

ވިޒް އެއަރއިން ރަނގަޅު ޚިދުމަތްތަކަކާއެކު ހެޔޮ އަގުގައި ދަތުރުކުރެވޭނެއެވެ. އެ އެއަރލައިންގެ ވެބްސައިޓުންނާއި، މޯބައިލް އެޕްލިކޭޝަން މެދުވެރިކޮށް ޓިކެޓް ބުކް ކުރެވޭނެއެވެ.